Sin-bēng-kì 第 23 章 - 巴克禮全羅

1

Kìⁿ-nā gōa-sīn siū-siong-ê, á-sī siū iam-koah-ê, m̄-thang jı̍p Iâ-hô-hoa ê hōe.

2

Su-thong lâi siⁿ ê kiáⁿ m̄-thang jı̍p Iâ-hô-hoa ê hōe; sui-jiân kàu i ê cha̍p-tāi, iā m̄-thang jı̍p Iâ-hô-hoa ê hōe.

3

A-bûn lâng á-sī Mô͘-ap lâng, m̄-thang jı̍p Iâ-hô-hoa ê hōe; sui-jiân kàu in ê cha̍p-tāi, éng-óan bōe thang jı̍p Iâ-hô-hoa ê hōe;

4

in-ūi lín chhut Ai-kı̍p ê sî, in bô ēng chia̍h-mı̍h kap chúi, tī lō͘-nı̍h ngiâ-chih lín; koh in-ūi in tùi-te̍k lín, chhiàⁿ Bí-só͘-pho-tāi-bí ê Pì-to̍at lâng, Pí-jíⁿ ê kiáⁿ, Pa-lân lâi chiù-chó͘ lín.

5

Chóng-sī Iâ-hô-hoa lí ê Siōng-tè m̄-thiaⁿ Pa-lân; Iâ-hô-hoa lí ê Siōng-tè hō͘ hit ê chiù-chó͘ piàn-chòe chiok-hok lí; in-ūi Iâ-hô-hoa lí ê Siōng-tè thiàⁿ lí.

6

Lí chı̍t-sì-lâng kàu éng-óan m̄-thang kā in tô͘-bô͘ pêng-an kap hok-khì.

7

M̄-thang òan-hūn Í-tong lâng, in-ūi i sī lí ê hiaⁿ-tī; m̄-thang òan-hūn Ai-kı̍p lâng, in-ūi lín bat chhut-gōa tī-hia;

8

in só͘ siⁿ ê kiáⁿ-sun kàu tē-saⁿ tāi thang jı̍p Iâ-hô-hoa ê hōe.

9

Lí ê kun-tūi chhut-khì kong-kek lí ê tùi-te̍k, tī iâⁿ-pôaⁿ tio̍h ka-kī kìm-kài it-chhè ê pháiⁿ-sū.

10

Lín tiong-kan nā ū lâng, tī mî-sî só͘ tú-tio̍h-ê, lâi bak bô chheng-khì, i chiū tio̍h chhut-khì kàu iâⁿ-gōa, m̄-thang jı̍p iâⁿ-lāi;

11

kàu beh àm ê sî, i tio̍h ēng chúi sóe, kàu jı̍t-lo̍h chiah thang jı̍p iâⁿ.

12

Lí tī iâⁿ-gōa kéng chı̍t-ūi thang chhut-khì kàu gōa-bīn ê só͘-chāi;

13

tī lí ê khì-kū-lāi tio̍h ū thuh-á; lí tī gōa-bīn chhut-kiong ê sî, tio̍h ēng i ku̍t thô͘, chiah o̍at-tńg-sin, khàm lí só͘ pàng ê;

14

in-ūi Iâ-hô-hoa lí ê Siōng-tè sì-kòe kiâⁿ tī lí ê iâⁿ-lāi, beh chín-kiù lí, chiong lí ê tùi-te̍k kau hō͘ lí; só͘-í lí ê iâⁿ-pôaⁿ eng-kai tio̍h ū sèng-kiat; bián-tit I khòaⁿ-kìⁿ lí tiong-kan ū ù-òe, chiū lī-khui lí.

15

Nā ū lô͘-po̍k thoat-lī i ê chú-lâng, cháu kàu lí hia, lí m̄-thang chiong i kau hō͘ i ê chú-lâng;

16

i beh kap lí tiàm, khiā lí tiong-kan, tī i só͘ kéng lí chı̍t ê siâⁿ-mn̂g-lāi ê só͘-chāi, chiū-sī i só͘ hoaⁿ-hí ê; lí m̄-thang khi-hū i.

17

Í-sek-lia̍t ê lú-chú-tiong m̄-thang ū kī-lú. Í-sek-lia̍t ê lâm-chú-tiong m̄-thang ū lôan-tông.

18

Chhiong-ki só͘ tit-tio̍h ê chîⁿ, á-sī káu-lūi ê kang-chîⁿ, lí m̄-thang tòa jı̍p Iâ-hô-hoa lí Siōng-tè ê tiān lâi siā-gōan; in-ūi chit nn̄g-hāng lóng sī Iâ-hô-hoa lí Siōng-tè só͘ iàm-ò͘ⁿ ê.

19

Lí ê hiaⁿ-tī he̍k-sī tùi lí chioh chîⁿ-gûn, á-sī chioh chia̍h-mı̍h, chioh kìⁿ-nā ōe siⁿ lī-sek ê mı̍h, lí lóng m̄-thang the̍h i ê lī-sek;

20

lí chioh gōa-cho̍k ê lâng, thang the̍h i ê lī-sek, chóng-sī chioh lí ê hiaⁿ-tī chiū m̄-thang the̍h i ê lī-sek; thang hō͘ Iâ-hô-hoa lí Siōng-tè tī lí só͘ khì beh tit-tio̍h chòe-gia̍p ê tōe, tī lí ê chhiú só͘ chòe it-chhè ê sū, sù-hok lí.

21

Lí tùi Iâ-hô-hoa lí ê Siōng-tè hē-gōan, siā i m̄-thang iân-chhiân; in-ūi Iâ-hô-hoa lí ê Siōng-tè tek-khak beh tùi lí thó; lí nā bô siā, chiū ū chōe;

22

lí nā bô hē-gōan, chiū bô chōe.

23

Kìⁿ-nā tùi lí ê chhùi só͘ chhut ê, chiàu lí í-keng hē-gōan tī Iâ-hô-hoa lí Siōng-tè lâi kam-sim hiàn ê, chiū-sī lí ê chhùi só͘ ín, lí tio̍h chip-siú lâi kiâⁿ i.

24

Lí jı̍p lí ê chhù-piⁿ ê phû-tô-hn̂g, thang chhut-chāi ì-sù chia̍h phû-tô kàu pá; chóng-sī m̄-thang tóe tī lí ê khì-kū-lāi.

25

Lí jı̍p lí ê chhù-piⁿ iáu-bē koah ê ngó͘-kok tiong, thang ēng chhiú tiah i ê sūi; chóng-sī m̄-thang ēng liâm-á koah lí ê chhù-piⁿ ê gō͘-kak.