Sin-bēng-kì 第 26 章 - 巴克禮全羅

1

Lí í-keng kàu Iâ-hô-hoa lí ê Siōng-tè só͘ siúⁿ-sù lí chòe-gia̍p ê tōe, sêng-chiap lâi khiā-khí i,

2

chiū tio̍h tùi Iâ-hô-hoa lí ê Siōng-tè siúⁿ-sù lí ê tōe, chiong só͘ siu ta̍k-hāng khí-thâu-se̍k ê thó͘-sán, the̍h tām-po̍h, hē tī kheng-nı̍h, khì Iâ-hô-hoa lí Siōng-tè só͘ beh kéng an-tì I ê miâ ê só͘-chāi;

3

tio̍h khì kìⁿ tng-sî chòe chè-si-ê, kā i kóng, Góa kin-á-jı̍t tùi Iâ-hô-hoa lí ê Siōng-tè kóng-bêng góa í-keng kàu Iâ-hô-hoa tùi lán ê lia̍t-chó͘ chiù-chōa siúⁿ-sù lán ê tōe.

4

Chè-si chiū tùi lí ê chhiú chih hit-kheng, lâi hē tī Iâ-hô-hoa lí Siōng-tè ê tôaⁿ-chêng.

5

Lí tio̍h tī Iâ-hô-hoa lí Siōng-tè ê bīn-chêng kóng, góa ê chó͘ sī chı̍t-ê teh-beh sí ê A-lân lâng, lo̍h-khì Ai-kı̍p kià-kha tī-hia, lâng-gia̍h chió-chió; tī-hia chiâⁿ-chòe chı̍t-kok tōa koh kiông, lâng-gia̍h koh chōe.

6

Ai-kı̍p lâng pháiⁿ khóan-thāi góan, khó͘-chhó͘ góan, ēng khó͘-kang kah góan chòe;

7

tùi hit-tia̍p góan ai-kiû Iâ-hô-hoa góan lia̍t-chó͘ ê Siōng-tè, Iâ-hô-hoa thiaⁿ góan ê siaⁿ, khòaⁿ-kìⁿ góan ê khó͘-chhó͘, góan ê tio̍h-bôa, góan ê ap-pek;

8

Iâ-hô-hoa chiū ēng tōa kôan-lêng ê chhiú, kap chhun-chhut ê chhiú-kut, kap tōa thang kiaⁿ ê sū, kap sîn-jiah, kî-sū, chhōa góan chhut Ai-kı̍p,

9

koh chhōa góan kàu chit só͘-chāi, ēng chit ê tōe siúⁿ-sù góan, chiū-sī lâu lin kap bı̍t ê tōe.

10

Khòaⁿ ah, chit ê tōe khí-thâu-se̍k ê, Iâ-hô-hoa ah, Lí só͘ siúⁿ-sù góa ê, góa taⁿ í-keng tòa-lâi. Āu-lâi lí tio̍h chiong i hē tī Iâ-hô-hoa lí Siōng-tè ê bīn-chêng, tī Iâ-hô-hoa lí Siōng-tè ê bīn-chêng kèng-pài I.

11

Lí kap Lī-bī lâng, í-kı̍p lín tiong-kan ê chhut-gōa lâng, tio̍h in-ūi Iâ-hô-hoa lí Siōng-tè só͘ siúⁿ-sù lí kap lí ê ke-kòan it-chhè ê hok-hūn lâi hoaⁿ-hí.

12

Ta̍k-pái kàu tē-saⁿ nî, chiū-sī cha̍p-hūn thiu chı̍t-hūn ê nî, lí thiu it-chhè ê thó͘-sán cha̍p-hūn ê chı̍t-hūn, pun hō͘ Lī-bī lâng, kap chhut-gōa lâng, kap ko͘-jî kóaⁿ-hū, hō͘ in tī lí ê siâⁿ-mn̂g, thang tit-tio̍h chia̍h-pá.

13

Lí koh tio̍h tùi Iâ-hô-hoa lí Siōng-tè ê bīn-chêng kóng, Góa í-keng tùi góa ê ke the̍h-chhut sèng-mı̍h, sòa hō͘ Lī-bī lâng kap chhut-gōa lâng, kap ko͘-jî kóaⁿ-hū, sī chiàu lí só͘ bēng-lēng góa it-chhè ê kài-bēng; Lí ê kài-bēng góa lóng bô hōan-tio̍h, iā bô bōe-kì-tit;

14

ku-song ê sî, góa bē-bat chia̍h i, bô chheng-khì ê sî, góa bē-bat the̍h-khí-lâi, iā bô ēng i chòe sí-lâng ê lō͘-ēng; góa thiaⁿ-thàn Iâ-hô-hoa góa Siōng-tè ê ōe, lóng chiàu Lí it-chhè só͘ bēng-lēng góa ê lâi kiâⁿ.

15

Kiû Lí tùi thiⁿ-nı̍h, tùi Lí khiā-khí ê sèng-só͘, àⁿ-lo̍h khòaⁿ, sù-hok Lí ê peh-sìⁿ Í-sek-lia̍t, kap Lí só͘ siúⁿ-sù góan ê tōe, chiàu Lí só͘ tùi góan ê lia̍t-chó͘ chiù-chōa ê, chiū-sī lâu lin kap bı̍t ê tōe.

16

Kin-á-jı̍t Iâ-hô-hoa lí ê Siōng-tè bēng-lēng lí kiâⁿ chiah ê lu̍t-lē hoat-tō͘; só͘-í lí tio̍h chīn-sim chīn-sèng chip-siú lâi kiâⁿ i;

17

kin-á-jı̍t lí sêng-jīn Iâ-hô-hoa chòe lí ê Siōng-tè, ún beh kiâⁿ I ê tō-lō͘, siú I ê lu̍t-lē, kài-bēng, hoat-tō͘, thiaⁿ-thàn I ê ōe.

18

Iâ-hô-hoa kin-á-jı̍t iā sêng-jīn lí chòe I ka-kī te̍k-pia̍t ê peh-sìⁿ, chiàu I só͘ èng-ún lí ê, hō͘ lí siú I it-chhè ê kài-bēng;

19

koh hō͘ lí tùi tī êng-kng, miâ-siaⁿ, chun-kùi, pôaⁿ-kè I só͘ chhòng-chō bān-kok ê peh-sìⁿ; hō͘ lí kui tī Iâ-hô-hoa lí ê Siōng-tè, chòe sèng-kiat ê peh-sìⁿ, chiàu I só͘ kóng ê.