Sin-bēng-kì 第 30 章 - 巴克禮全羅

1

Chiah ê tāi-chì, chiū-sī góa só͘ pâi-lia̍t tī lí ê bīn-chêng ê chiok-hok kap chiù-chó͘, chiong-lâi kàu tī lí, lí tī Iâ-hô-hoa lí Siōng-tè só͘ kóaⁿ lí kàu ê lia̍t-kok-tiong,

2

lí ê sim kì-tit i, lí kap lí ê kiáⁿ-sun nā chīn-sim chīn-sèng kui-ǹg Iâ-hô-hoa lí ê Siōng-tè, thiaⁿ-thàn I ê ōe, chiàu góa kin-á-jı̍t it-chhè só͘ bēng-lēng lí ê;

3

chiū Iâ-hô-hoa lí ê Siōng-tè beh hō͘ lí siū-lia̍h ê lâng tò-tńg-lâi, beh lîn-bín lí, beh tò-tńg-lâi chū-chı̍p lí tùi Iâ-hô-hoa lí Siōng-tè só͘ sì-sòaⁿ lí kàu ê lia̍t-kok lâi.

4

Lí siū kóaⁿ-tio̍k ê, nā ū tī thiⁿ-piⁿ ê, Iâ-hô-hoa lí ê Siōng-tè iā beh tùi hia chū-chı̍p lí, tòa lí tùi hia tò-lâi.

5

Iâ-hô-hoa lí ê Siōng-tè beh chhōa lí jı̍p lí ê lia̍t-chó͘ só͘ sêng-chiap ê tōe, lí iā sêng-chiap i; I iā beh hó khóan-thāi lí, hō͘ lí ê lâng-gia̍h ke-thiⁿ pí lí ê lia̍t-chó͘ khah-chōe.

6

Iâ-hô-hoa lí ê Siōng-tè beh tī lí ê sim, kap lí ê hō͘-è ê sim, kiâⁿ kat-lé, hō͘ lí chīn-sim chīn-sèng thiàⁿ Iâ-hô-hoa lí ê Siōng-tè, hō͘ lí thang tit-tio̍h o̍ah.

7

Iâ-hô-hoa lí ê Siōng-tè beh chiong che it-chhè ê chiù-chó͘ hē tī lí ê tùi-te̍k, kap òan-hūn lí khún-pek lí ê lâng ê sin-chiūⁿ;

8

lí beh tò-tńg thiaⁿ-thàn Iâ-hô-hoa ê ōe, kiâⁿ I it-chhè ê kài-bēng, chiū-sī góa kin-á-jı̍t só͘ bēng-lēng lí ê.

9

Lí nā thiaⁿ-thàn Iâ-hô-hoa lí Siōng-tè ê ōe, chip-siú chit ê lu̍t-hoat só͘ kì ê kài-bēng lu̍t-lē, koh chīn-sim chīn-sèng kui-ǹg Iâ-hô-hoa lí ê Siōng-tè, Iâ-hô-hoa lí ê Siōng-tè beh hō͘ lí ê chhiú só͘ chòe it-chhè ê sū, kap lí ê seng-khu só͘-siⁿ-ê, cheng-siⁿ só͘-chhut-ê, thó͘-tōe só͘-chhut-ê, chhiong-chiok ū chhun; in-ūi Iâ-hô-hoa beh koh hoaⁿ-hí lí, sù-hok lí, chhin-chhiūⁿ chêng hoaⁿ-hí lí ê lia̍t-chó͘ chı̍t-iūⁿ.

10

11

In-ūi góa kin-á-jı̍t só͘ bēng-lēng lí ê kài-bēng, m̄-sī lí só͘ chòe-bōe-kàu-ê, iā bô tī hn̄g-hn̄g.

12

M̄-sī tī thiⁿ-nı̍h, tì-kàu lí kóng, Chī-chūi ūi góan chiūⁿ-thiⁿ, tòa-lâi góan chia, hō͘ góan thiaⁿ lâi kiâⁿ i ah?

13

Iā m̄-sī tī hái-gōa, tì-kàu lí kóng, Chī-chūi ūi góan kè-hái tòa-lâi góan chia, hō͘ góan thiaⁿ lâi kiâⁿ i ah?

14

Chit ê ōe kap lí chin kūn, chiū-sī tī lí ê chhùi tī lí ê sim, hō͘ lí thang lâi kiâⁿ i.

15

Khòaⁿ ah, góa kin-á-jı̍t ū ēng o̍ah kap hok-khì, sí kap chai-ē, pâi-lia̍t tī lí ê bīn-chêng;

16

chiū-sī góa kin-á-jı̍t bēng-lēng lí thiàⁿ Iâ-hô-hoa lí ê Siōng-tè, kiâⁿ I ê tō-lō͘, siú I ê kài-bēng, lu̍t-lē, hoat-tō͘, hō͘ lí thang o̍ah-teh, ke-thiⁿ lâng-gia̍h, Iâ-hô-hoa lí Siōng-tè chiū beh tī lí só͘ beh jı̍p-khì sêng-chiap ê tōe sù-hok lí.

17

Siat-sú lí ê sim pōe-biū m̄ thiaⁿ-thàn, koh siū iú-he̍k, khì kèng-pài pa̍t ê siōng-tè ho̍k-sāi i;

18

góa kin-á-jı̍t chiū bêng-bêng kā lín kóng, lín tek-khak beh bia̍t-bô; tī lí kè Iok-tàn jı̍p-khì sêng-chiap ê tōe, lí ê jı̍t-chí bōe-ōe kú-tn̂g.

19

Góa kin-á-jı̍t kiò thiⁿ kiò tōe tùi lín chòe kan-chèng, góa ēng siⁿ-sí, chiok-hok chiù-chó͘, pâi-lia̍t tī lí ê bīn-chêng; só͘-í lí tio̍h kéng o̍ah-miā, hō͘ lí kap lí ê hō͘-è lóng ōe o̍ah-teh;

20

lâi thiàⁿ Iâ-hô-hoa lí ê Siōng-tè, thiaⁿ I ê ōe, kiat-liân tī I; in-ūi I sī lí ê o̍ah-miā, lí ê jı̍t-chí kú-tn̂g iā chāi tī I; hō͘ lí thang khiā-khí tī Iâ-hô-hoa tùi lí ê lia̍t-chó͘ A-pek-la̍h-hán, Í-sat, Ngá-kok, chiù-chōa só͘ beh siúⁿ-sù in ê tōe.