Sin-bēng-kì 第 33 章 - 巴克禮全羅

1

Siōng-tè ê lô͘-po̍k Mô͘-se, tī i iáu-bē sí ê tāi-seng, kā Í-sek-lia̍t lâng chiok-hok; só͘ chiok-hok ê ōe kì tī ē-tóe.

2

I kóng, Iâ-hô-hoa tùi Se-nái lâi, Ūi-tio̍h in tùi Se-jíⁿ khí-lâi; Tùi Pa-lân ê soaⁿ chiò-chhut kng, Tùi bān-bān sèng-ê hia lâi; Tùi I ê chiàⁿ-chhiú ūi-tio̍h in hoat-chhut lia̍t-hé ê lu̍t-hoat.

3

I put-chí thiàⁿ-thàng hiah ê peh-sìⁿ, I hiah ê sèng-ê lóng tī Lí ê chhiú; In chē tī Lí ê kha-ē, Thiaⁿ-siū Lí hiah ê ōe.

4

Mô͘-se ēng lu̍t-hoat thôan hō͘ lán, Chòe Ngá-kok hōe-chiòng ê sán-gia̍p.

5

Peh-sìⁿ ê siú-léng, Í-sek-lia̍t ê chèng chi-phài saⁿ-kap chū-hōe ê sî, I tī Iâ-su-lûn chòe-ông.

6

Gōan Liû-piān o̍ah-teh bô sí, Gōan i ê lâng-gia̍h bô chió.

7

I kā Iû-tāi chiok-hok, án-ni kóng, Kiû Iâ-hô-hoa thiaⁿ Iû-tāi ê siaⁿ, Chhōa i kàu i ê peh-sìⁿ hia; I bat ēng i ê chhiú ūi ka-kī kau-chiàn; Lí beh pang-chān i tí-tng i ê tùi-te̍k.

8

Lūn Lī-bī kóng, Lí ê Thó͘-bêng kap Lí ê O͘-lêng, kap Lí sèng-kiat ê lâng saⁿ-kap tī-teh; Lí tī Má-sat bat chhì i, Tī Bí-lī-pa ê chúi bat kap i saⁿ-chiⁿ.

9

I lūn-kàu i ê lāu-pē, i ê lāu-bú, chiū kóng, Góa m̄-bat khòaⁿ-kìⁿ i; Iā bô sêng-jīn i ê hiaⁿ-tī; Iā bô sêng-jīn i ê kiáⁿ-jî; In-ūi in kiâⁿ Lí ê ōe, Siú Lí ê iok.

10

In beh ēng Lí ê hoat-tō͘ kà-sī Ngá-kok, Ēng Lí ê lu̍t-hoat kà-sī Í-sek-lia̍t; In beh ēng hiuⁿ hē tī Lí ê bīn-chêng, Kap ka-nn̂g-chiah ê sio-chè tī Lí ê tôaⁿ-téng.

11

Gōan Iâ-hô-hoa sù-hok i ê sán-gia̍p, Chiap-la̍p i ê chhiú só͘ chòe ê kang; Hiah ê khí-lâi kong-kek i kap òan-hūn i ê lâng, Gōan Lí phah-chı̍h in ê io, hō͘ in bōe koh khí-lâi,

12

Lūn Piān-ngá-bín chiū kóng, Iâ-hô-hoa só͘ thiàⁿ ê beh kap I an-jiân khiā-khí; Iâ-hô-hoa thong-jı̍t pó-hō͘ i, I iā beh tiàm tī i ê keng-thâu-tiong.

13

Lūn Iok-sek chiū kóng, Gōan i ê tōe tit-tio̍h Iâ-hô-hoa sù-hok, Tit-tio̍h thiⁿ-téng ê pó-mı̍h, kap lō͘-chúi, Í-kı̍p tōe-ē só͘ khǹg ê chúi-gôan;

14

Tit-tio̍h jı̍t-thâu só͘ siⁿ ê pó-mı̍h, Ge̍h só͘ chhut ê pó-mı̍h;

15

Tit-tio̍h kó͘-chá ê soaⁿ ê chì-pó, Kap éng sè-tāi ê soaⁿ-niá ê pó-mı̍h;

16

Tit-tio̍h tōe ê pó-mı̍h kap kî-tiong só͘ chhiong-móa-ê, Í-kı̍p tiàm tī chhì-phè-lāi-ê ê un-hūi; Gōan hiah ê lóng kui tī Iok-sek ê thâu-khak, Kui tī hit-ê kap i ê hiaⁿ-tī pun-khui-ê ê thâu-khak-téng.

17

Chhin-chhiūⁿ gû ê thâu-chiūⁿ-siⁿ-ê, êng-kng sio̍k tī i, I ê kak sī iá-gû ê kak; Ēng in lâi tak bān peh-sìⁿ kàu tī tōe-ke̍k; Che sī Í-hoat-liân ê bān-bān, Má-ná-se ê chheng-chheng.

18

Lūn Se-pò͘-lûn chiū kóng, Se-pò͘-lûn ah, lí chhut-gōa thang hoaⁿ-hí; Í-sat-ka ah, tī lí ê pò͘-pîⁿ-lāi thang khòai-lo̍k.

19

In beh tiàu chiah ê peh-sìⁿ kàu soaⁿ-nı̍h, Tī-hia beh hiàn kong-gī ê chè; In-ūi in beh khip-siu hái-nı̍h ê hong-sēng, Kap soa-nı̍h só͘-khǹg ê pó-pòe.

20

Lūn Ka-tek chiū kóng, Khui-khoah Ka-tek-ê tit-tio̍h o-ló; I bih-teh chhin-chhiūⁿ bú ê sai, I thiah-lı̍h chhiú-kut kap thâu-khak.

21

I ūi ka-kī pī-pān tāi-seng tit-tio̍h ê gia̍p, In-ūi tī-hia ū siat lu̍t-hoat-ê ê hūn-gia̍h lâu-teh; I kap peh-sìⁿ ê siú-léng saⁿ-kap lâi, Kiâⁿ Iâ-hô-hoa ê kong-gī, Kap Í-sek-lia̍t saⁿ-kap kiâⁿ I ê phòaⁿ-tòan.

22

Lūn Tàn chiū kóng, Tàn sī sòe chiah sai, Tùi Pa-san thiàu-chhut.

23

Lūn Ná-hut-tha-lī chiū kóng, Ná-hut-tha-lī ah, tit-tio̍h un-hūi chhiong-chiok; Iā tit-tio̍h Iâ-hô-hoa ê sù-hok móa-móa ê, Beh tit-tio̍h sai-sì kap lâm-sì chòe gia̍p.

24

Lūn A-siat chiū kóng, Gōan A-siat in-ūi kiáⁿ chōe lâi tit-tio̍h hok-khì, Tit-tio̍h in ê hiaⁿ-tī ê hoaⁿ-hí; Thang ēng i ê kha ùn tī iû-nı̍h.

25

Lí ê mn̂g-kông sī thih-ê, tâng-ê; Lí ê jı̍t-chí cháiⁿ-iūⁿ, lí ê khùi-la̍t iā beh án-ni.

26

Iâ-su-lûn ah, bô ū chhin-chhiūⁿ Siōng-tè ê, I chē-thiⁿ lâi pang-chān lí, Iā chē kiong-chhong, hián-bêng I ê êng-kng.

27

Éng-o̍ah ê Siōng-tè chòe lí khiā-khí ê só͘-chāi, Éng-óan ê chhiú tī lí ê ē-bīn; I tī lí ê bīn-chêng kóaⁿ tùi-te̍k, Koh kóng, Húi-bia̍t i.

28

Í-sek-lia̍t an-jiân khiā-khí, Ngá-kok ê hō͘-è ka-kī tòa tī ngó͘-kok kap chiú ê tōe; I ê thiⁿ iā tih-lo̍h lō͘-chúi.

29

Í-sek-lia̍t ah, lí ū hok-khì; Chī-chūi chhin-chhiūⁿ lí chit-ê hō͘ Iâ-hô-hoa só͘ chín-kiù ê peh-sìⁿ ah? I sī lí ê tîn-pâi pó-hō͘ lí, Sī lí êng-iāu ê to-kiàm; Lí ê tùi-te̍k beh tâu-hâng lí; Lí beh ta̍h tī in kôaiⁿ ê só͘-chāi.