Sin-bēng-kì 第 7 章 - 巴克禮全羅

1

Iâ-hô-hoa lí ê Siōng-tè chhōa lí jı̍p lí só͘ beh khì tit-tio̍h ê tōe, tùi lí ê bīn-chêng kóaⁿ-chhut chōe-chōe pang-kok, chiū-sī Hek lâng, Kek-ka-sat lâng, A-mô͘-lī lâng, Ka-lâm lâng, Pí-lī-sé lâng, Hi-bī lâng, Iâ-pò͘-su lâng, kiōng chhit-kok, lóng pí lí khah-tōa khah-béng;

2

Iâ-hô-hoa lí ê Siōng-tè chiong in kau-hù lí, hō͘ lí phah-iâⁿ i, hit-sî lí tio̍h it-chīn bia̍t in, m̄-thang kap in lı̍p-iok, iā m̄-thang lîn-bín in;

3

m̄-thang kap in kiat-chhin, lí ê cha-bó͘-kiáⁿ m̄-thang kè hō͘ i ê kiáⁿ, iā m̄-thang kā lí ê kiáⁿ chhōa i ê cha-bó͘-kiáⁿ.

4

In-ūi i beh hō͘ lí ê kiáⁿ o̍at-tńg bô tè Góa, khì ho̍k-sāi pa̍t ê siōng-tè; tì-kàu Iâ-hô-hoa tōa siū-khì lín, kín-kín bia̍t lín.

5

Chóng-sī lín tio̍h án-ni khóan-thāi in; thiah-húi in ê chè-tôaⁿ, phah-chhùi in tiau-khek ê thiāu, chhò in ê A-sài-lîm, ēng hé sio in só͘ chng ê ngó͘-siōng.

6

In-ūi lín chòe sèng-kiat ê peh-sìⁿ, kui tī Iâ-hô-hoa lí ê Siōng-tè. Iâ-hô-hoa lí ê Siōng-tè tùi tōe-chiūⁿ bān peh-sìⁿ-tiong kéng lí, te̍k-pia̍t chòe I ka-kī ê peh-sìⁿ.

7

Iâ-hô-hoa thiàⁿ lín, kéng lín, m̄-sī in-ūi lín ê lâng-gia̍h pí pa̍t-kok khah-chōe; in-ūi lín ê lâng-gia̍h sī bān-kok-tiong tē-it chió-ê;

8

sī in-ūi Iâ-hô-hoa thiàⁿ lín, koh in-ūi beh kiâⁿ I tùi lín lia̍t-chó͘ só͘ chiù-chōa ê, Iâ-hô-hoa chiah ēng tōa kôan-lêng ê chhiú chhōa lín chhut-lâi, tùi chòe lô͘-châi ê ke kiù-sio̍k lín, thoat-lī Ai-kı̍p ông Hoat-ló ê chhiú.

9

Só͘-í lí tio̍h chai Iâ-hô-hoa lí ê Siōng-tè, I sī Siōng-tè, sī sìn-sı̍t ê Siōng-tè, ūi-tio̍h thiàⁿ I siú I kài-bēng ê lâng, kiâⁿ I ê iok kap chû-ài, tı̍t-kàu chheng-tāi.

10

Kìⁿ-nā òan-hūn I ê lâng, I beh tng-bīn pò-èng lâi bia̍t in; òan-hūn I ê lâng, I beh tng-bīn pò-èng i, bô beh iân-chhiân.

11

Só͘-í lí tio̍h chip-siú góa kin-á-jı̍t só͘ bēng-lēng lí ê kài-bēng, lu̍t-lē, hoat-tō͘, lâi kiâⁿ i.

12

Āu-lâi lín nā thiaⁿ chiah ê hoat-tō͘, chip-siú lâi kiâⁿ i, Iâ-hô-hoa lí ê Siōng-tè in-ūi án-ni beh kā lí kiâⁿ I tùi lí ê lia̍t-chó͘ só͘ chiù-chōa ê iok kap chû-ài.

13

I beh thiàⁿ lí, sù-hok lí, hō͘ lí heng-ōng; iā beh tī I tùi lí ê lia̍t-chó͘ chiù-chōa siúⁿ-sù lí ê tōe, sù-hok lí ê thai só͘-siⁿ-ê, lí ê tōe só͘-chhut-ê, kap lí ê ngó͘-kok, lí ê chiú, lí ê iû, í-kı̍p lí ê gû-á, kap lí ê iûⁿ-á-kiáⁿ.

14

Lí beh tit-tio̍h sù-hok iâⁿ-kè bān peh-sìⁿ; lín tiong-kan ê lâm-lú bô chı̍t-ê bōe seng-ióng; lín tiong-kan ê cheng-siⁿ bô chı̍t-chiah bōe siⁿ-thòaⁿ.

15

Iâ-hô-hoa beh hō͘ it-chhè ê pīⁿ-chèng lī-khui lí; lí só͘ chai Ai-kı̍p ta̍k-iūⁿ ê pháiⁿ chèng-thâu, I bô hō͘ lí tú-tio̍h chı̍t-hāng; sī beh hō͘ it-chhè òan-hūn lí ê lâng tú-tio̍h.

16

Iâ-hô-hoa lí ê Siōng-tè só͘ beh kau-hù lí ê peh-sìⁿ, lí tio̍h lóng bia̍t in; lí ê ba̍k-chiu m̄-thang khó-lîn in, lí iā m̄-thang ho̍k-sāi in ê siōng-tè; in-ūi che beh chòe hāi lí ê lô-bāng.

17

Lí nā sim-lāi siūⁿ kóng, Chiah ê kok pí góa khah-tōa, góa thái-thó ōe kóaⁿ-tio̍k in ah?

18

Lí m̄-bián kiaⁿ in; tek-khak tio̍h kì-tit Iâ-hô-hoa lí ê Siōng-tè ǹg Hoat-ló kap Ai-kı̍p chôan-tōe só͘ kiâⁿ ê sū;

19

chiū-sī lí chhin-ba̍k khòaⁿ-kìⁿ ê tōa chhì-liān, sîn-jiah, kî-sū, kap tōa kôan-lêng ê chhiú, kap chhun-chhut-lâi ê chhiú-kut, lóng sī Iâ-hô-hoa lí ê Siōng-tè só͘ ēng lâi chhōa lí chhut-ê; Iâ-hô-hoa lí ê Siōng-tè iā beh án-ni kiâⁿ tī lí só͘ kiaⁿ it-chhè ê peh-sìⁿ.

20

Koh Iâ-hô-hoa lí ê Siōng-tè beh chhe tōa chiah phang, pe-kàu in tiong-kan, tı̍t-kàu in só͘ chhun lâi siám-bih-ê, bia̍t tī lí ê bīn-chêng.

21

Lí m̄-bián kiaⁿ in; in-ūi Iâ-hô-hoa lí ê Siōng-tè sī tōa koh thang kiaⁿ ê Siōng-tè, tī lín tiong-kan.

22

Iâ-hô-hoa lí ê Siōng-tè beh tī lí ê bīn-chêng chiām-chiām tû-bia̍t chiah ê kok; lí m̄-thang kín-kín bia̍t i kàu-chīn, kiaⁿ-liáu iá-siù ke-thiⁿ chōe-chōe lâi hāi lí.

23

Iâ-hô-hoa lí ê Siōng-tè beh chiong in kau-hù lí, hō͘ in tōa-kiaⁿ jiáu-lōan, tı̍t-kàu in bia̍t-bô;

24

koh beh ēng in hiah ê ông kau tī lí ê chhiú, lí beh tû-bia̍t in ê miâ tī thiⁿ-ē; tek-khak bô chı̍t-lâng ōe khiā tī lí ê bīn-chêng, tı̍t-kàu lí bia̍t-bô in.

25

In só͘ tiau-khek in ê siōng-tè ê siōng, lín tio̍h ēng hé sio i; i ê sin-chiūⁿ ê kim-gûn lí m̄-thang tham, iā m̄-thang the̍h i chòe ka-kī-ê; kiaⁿ-liáu lí ūi chit-ê hām-lo̍h lô-bāng; in-ūi che sī Iâ-hô-hoa lí ê Siōng-tè só͘ iàm-ò͘ⁿ-ê .

26

Kìⁿ-nā thang iàm-ò͘ⁿ ê mı̍h, lí m̄-thang tòa-jı̍p lí ê chhù, kiaⁿ-liáu lí iā chiâⁿ-chòe thang chiù-chó͘-ê, kap hiah ê mı̍h chı̍t-iūⁿ; lí tio̍h ke̍k-kî thòng-hūn, ke̍k-kî iàm-ò͘ⁿ; in-ūi sī thang chiù-chó͘-ê.