Thôan-tō 第 10 章 - 巴克禮全羅

1

Sí ê hô͘-sîn hō͘ chòe hiuⁿ-liāu--ê ê iû hoat-chhut chhàu-bī; án-ni chı̍t-tiám-á ê gû-gōng iā ōe pāi-hōai tōa tì-hūi kap chun-kùi.

2

Tì-hūi ê lâng ê sim sī tī i ê chiàⁿ-chhiú pêng, gû-gōng ê lâng ê sim sī tī i ê tò-chhiú pêng.

3

Koh gōng-lâng kiâⁿ tī lō͘--nih, khiàm-kheh tì-hūi, tùi chèng-lâng kóng i sī gōng-lâng.

4

Chiáng-kôan--ê ê sim-sîn siūⁿ beh kong-kek lí, m̄-thang lī-khui lí ê pún-ūi, in-ūi un-hô ōe bián-tit tōa ê kè-sit.

5

Góa khòaⁿ-kìⁿ jı̍t-kng ê ē-bīn, ū chı̍t hāng m̄-hó, chhin-chhiūⁿ chhut tī chiáng-kôan--ê ê chhò-gō͘;

6

chiū-sī an-tì gōng-lâng tī kôaiⁿ-ūi, hó-gia̍h lâng chē tī kē-ūi.

7

góa khòaⁿ-kìⁿ lô͘-po̍k khiâ bé, kùi-cho̍k chhin-chhiūⁿ lô͘-po̍k kiâⁿ tī tōe--nih.

8

Ku̍t hām-khiⁿ-ê beh ka-kī po̍ah tī hí(**hit) lāi-bīn; thiah-chhiûⁿ-ê beh hō͘ chôa kā--tio̍h.

9

Phah-chio̍h-ê ōe siū chio̍h siong, phòa-chhâ-ê ōe tùi án-ni tú-tio̍h gûi-hiám.

10

Thih-khì í-keng tun, nā bô bôa-lāi i ê chhùi, chiū tio̍h ke-chhut chōe-chōe la̍t; to̍k-to̍k tit-tio̍h tì-hūi ê kà-sī, chiū ū lī-ek.

11

Bē liām-chiù ê sî, chôa nā kā--tio̍h lâng, liām-chiù ê lâng chiū bô lī-ek.

12

tì-hūi ê lâng ê só͘ kóng sī un-hūi ê ōe; gû-gōng ê chhùi thun-bia̍t ka-kī.

13

I ê chhùi só͘ kóng ê ōe khí-thâu sī gû-gōng; i ê ōe ê lō͘-bé sī hāi lâng ê tian-kông.

14

Gōng-lâng chōe-chōe ōe; to̍k-to̍k lâng m̄-chai chiong-lâi cháiⁿ-iūⁿ; i sin-āu só͘ beh ū ê sū chī-chūi ōe kā i kóng ah?

15

Gōng-lâng ê lô-lo̍k tì-kàu hō͘ in ià-siān, in-ūi jı̍p siâⁿ ê lō͘ i iā m̄-chai.

16

Pang-kok ah, lí ê ông nā sī gín-ná, lí ê kùi-cho̍k chá-khí-sî iàn-lo̍k, lí chiū ū chai-ē.

17

Pang-kok ah, lí ê ông nā sī chun-kùi ê lâng ê kiáⁿ, lí ê kùi-cho̍k chiàu-sî lim-chia̍h, ūi-tio̍h beh pó͘ in ê la̍t, m̄-sī in-ūi hò͘ⁿ lim, lí chiū ū hok-khì.

18

In-ūi pîn-tōaⁿ chhù-kòa lap--lo̍h-khì; ūi-tio̍h chhiú pîn-tōaⁿ chhù chiū lāu.

19

Iân-sia̍h sī ūi-tio̍h hoaⁿ-hí lâi siat, chiú sī hō͘ lâng khòaⁿ-o̍ah; chîⁿ-gûn chòe bān-sū ê lō͘-ēng.

20

Lí m̄-thang chiù-chó͘ kun-ông, sim iā m̄-thang án-ni siūⁿ; tī lí ê khùn-pâng iā m̄-thang chiù-chó͘ hó-gia̍h lâng; in-ūi khong-tiong ê chiáu beh thôan-pò͘ chit ê siaⁿ, ū sı̍t-kó͘--ê iā beh kóng-khí chit ê sū.