I-hut-só͘ 第 4 章 - 巴克禮全羅

1

Só͘-í góa tiàm-tī Chú chòe siû-hōan ê, khǹg lín kiâⁿ tāi-chì tio̍h ha̍p tī só͘ siū ê tiàu,

2

. hōan sū khiam-sùn, un-jiû, ēng thun-lún, tī jîn-ài saⁿ khoan-iông;

3

. ēng hô-pêng saⁿ kiat-liân, tì-ì siú Sèng Sîn só͘ siúⁿ-sù ê ha̍p-it.

4

. In-ūi thé chı̍t-ê, Sîn chı̍t-ê, chhin-chhiūⁿ lín siū tiàu ê ǹg-bāng iā sī chı̍t-ê,

5

. Chú chı̍t-ê, sìn chı̍t-ê, sóe-lé chı̍t-ê,

6

. Siōng-tè chı̍t-ê, chòe chèng-lâng ê Pē, tī bān-ū ê téng-bīn, kòan-chhòan tī bān-ū, tiàm-tī bān-ū ê.

7

. Chóng-sī ēng un-tián hō͘ lán ta̍k lâng, sī chiàu Ki-tok un-sù ê hūn-liōng.

8

. Só͘-í kóng, I seng kôaiⁿ ê sî chiū lia̍h hiah ê siū lia̍h ê, Iā chiong chiah ê un-sù pun hō͘ lâng,

9

. (Taⁿ kì-jiân kóng, I seng kôaiⁿ, kiám m̄ sī I bat kàng-lo̍h tī tōe ē mah?

10

. Hit ê kàng-lo̍h ê chiū-sī hit ê seng-kôaiⁿ tī chiah ê thiⁿ ê téng-bīn ê, beh chhiong-móa bān mı̍h.)

11

. I só͘ siúⁿ-sù ê, ū sù-tô͘; ū sian-ti, ū thôan hok-im ê, ū bo̍k-su kap sian-siⁿ,

12

. ūi-tio̍h beh hō͘ sèng-tô͘ chiâu-pī, lâi chòe chhe-ēng ê kang, khí-chō Ki-tok ê sin-thé;

13

. tı̍t-kàu lán chèng lâng tī sìn, í-kı̍p bat Siōng-tè ê Kiáⁿ, lâi ha̍p-it, kàu chiâⁿ chı̍t ê ôan-chôan ê lâng, kàu tit-tio̍h Ki-tok ê chhiong-móa lâi tióng-sêng, hit pan;

14

. beh hō͘ lán bô koh chòe gín-ná, hō͘ ta̍k iūⁿ kà-sī ê hong iô-choah phiau-liû, tiòng-tio̍h lâng ê khúi-kè, kap môa-phiàn, tì-kàu hō͘ lâng chha-biū ê hoat-su̍t;

15

. sī tiàm-tī jîn-ài kóng ōe chin-sı̍t, hō͘ lán tī bān hāng chiām-chiām tōa, kàu tī hit ê chòe Thâu ê, chiū-sī Ki-tok;

16

. tùi tī I, chôan sin kiat-ha̍p liân-lo̍k, chiū-sī tùi pah-chat ê saⁿ chiap-èng, chiàu ta̍k thé kai-jiân ê ūn-tōng, tì-kàu seng-khu ná tióng tōa, tī jîn-ài ka-kī khí-chō.

17

. Só͘-í góa kóng i, koh tī Chú chèng-bêng i, lín ê só͘ kiâⁿ m̄ thang koh chhin-chhiūⁿ gōa-pang lâng ê só͘ kiâⁿ, in ê sim-chì khang-khang,

18

. in ê sim-su o͘-àm, keh-tn̄g tī Siōng-tè ê o̍ah-miā, sī tùi in m̄ chai-iáⁿ, in ê sim kong-ngī;

19

. kì-jiân sòng-sit liông-sim, chiū hòng-chhiòng ka-kī tī siâ-phiah, tùi tham lâi kiâⁿ ta̍k iūⁿ ê ù-òe.

20

. Nā-sī lín ha̍k-sı̍p Ki-tok m̄ sī án-ni;

21

. lín nā kó-jiân thiaⁿ-kìⁿ I, koh tī I siū kà-sī, chiàu tī Iâ-so͘ só͘ ū ê chin-sı̍t;

22

. chiū-sī lūn-kàu chiông-chiân ê kiâⁿ-chòe, lín thǹg-khì kū ê lâng, chiū-sī chiàu ín-iú lâng ê su-io̍k teh pāi-hōai ê;

23

. koh lín sim-sîn ōaⁿ sin,

24

. chhēng hit ê sin ê lâng, chiū-sī chiàu Siōng-tè ēng chin-lí ê gī kap sèng lâi chhòng-chō ê.

25

. Só͘-í tio̍h tû-khì pe̍h-chha̍t, ta̍k lâng kap i ê chhù-piⁿ kóng chin-sı̍t, in-ūi lán saⁿ-kāng chòe thé.

26

. Lín siū-khì, tio̍h m̄ thang hōan-chōe; ū kek siū-khì, m̄ thang kàu jı̍t-lo̍h,

27

. iā m̄ thang hō͘ Mô͘-kúi ū phāng thang jı̍p.

28

. Thau-the̍h ê bo̍h-tit koh thau-the̍h, lêng-khó͘ tio̍h-bôa, chhin-chhiú chòe hó ê kang, chiah ū thang pun hō͘ khiàm-kheh ê lâng.

29

. Lín ê chhùi lóng m̄ thang kóng-chhut lâ-sâm ê ōe, to̍k-to̍k tio̍h kóng hó ōe, chiàu kı̍p-sî ê khiàm-kheh lâi chō-chiū i, hō͘ thiaⁿ ê lâng tit-tio̍h un-tián.

30

. Iā bo̍h-tit hō͘ Siōng-tè ê Sèng Sîn iu-būn, chiū-sī só͘ bat ēng lâi khàm-ìn lín, kàu tī sio̍k-hôe ê jı̍t ê.

31

.It-chhè ê khó͘-to̍k, òan-hūn, siū-khì, soan-jióng, húi-pòng, í-kı̍p it-chhè ê ok-to̍k, lóng tio̍h tùi lín tiong-kan tû-khì.

32

. Koh tio̍h ēng jîn-chû saⁿ khóan-thāi, chûn lîn-bín ê sim; tāi-ke saⁿ sià-bián, chhin-chhiūⁿ Siōng-tè tī Ki-tok bat sià-bián lín chı̍t iūⁿ.