Í-sū-thiap 第 4 章 - 巴克禮全羅

1

Bo̍k-tí-kái í-keng chai it-chhè ê só͘ chòe, Bo̍k-tí-kái chiū thiah-lı̍h saⁿ, chhēng môa-saⁿ, sám hé-hu, chhut-khì siâⁿ-lāi, tōa-siaⁿ pi-ai thî-khàu;

2

kàu tī ông ê mn̂g-chêng; in-ūi kìⁿ-nā chhēng môa-saⁿ--ê bōe-tit-thang jı̍p ông ê mn̂g.

3

Tī ta̍k-séng, chiū-sī ông ê bēng-lēng kap jū-chí só͘ kàu ê só͘-chāi, tī Iû-tāi lâng ê tiong-kan, ū pi-ai kìm-chia̍h thî-khàu chhám-chhoeh; koh ū chōe-chōe lâng tó tī môa-saⁿ kap hé-hu--nih.

4

Í-su-thiap ê kiong-lú kap i ê thài-kàm lâi kā i kóng; ông-hō͘ chiū iu-būn kàu-ke̍k; kià i-ho̍k hō͘ Bo̍k-tí-kái chhēng, ài thǹg--khì i ê môa-saⁿ, chóng-sī i m̄ sêng-siū.

5

Í-su-thiap chiū tiàu ông só͘ phài su-hāu i ê thài-kàm, miâ kiò Hap-tha-kek ê lâi, kah i khì Bo̍k-tí-kái hia, ài chai chit-ê sī sím-mı̍h tāi-chì, sím-mı̍h in-toaⁿ.

6

Hap-tha-kek chiū chhut-khì kàu siâⁿ ê khoan-khoah ê só͘-chāi, chiū-sī tī ông ê mn̂g-chêng, kàu Bo̍k-tí-kái hia.

7

Bo̍k-tí-kái chiū chiong i it-chhè só͘ tú-tio̍h-ê, í-kı̍p Hap-bān só͘ kóng beh hiàn tī ông ê khò͘-pâng ê gûn khak-sı̍t ê siàu-gia̍h, thang châu-bia̍t Iû-tāi lâng ê, lóng kā i kóng;

8

koh chiong i chhau-siá tī Su-san siâⁿ só͘ thôan beh châu-bia̍t Iû-tāi lâng ê jū-chí hō͘ i, hō͘ i the̍h hō͘ Í-su-thiap khòaⁿ, sòa kā i kóng-bêng, koh hoan-hù i jı̍p-khì kìⁿ ông lâi khún-kiû i, tī ông ê bīn-chêng ūi-tio̍h pún-cho̍k ê peh-sìⁿ khún-chhiat kî-kiû.

9

Hap-tha-kek tò-lâi ēng Bo̍k-tí-kái ê ōe kā Í-su-thiap kóng.

10

Í-su-thiap koh kā Hap-tha-kek kóng, thok i kā Bo̍k-tí-kái kóng,

11

Ông ê chèng jîn-sîn, kap ông hiah ê séng ê peh-sìⁿ, lóng chai ū chı̍t-tiâu tiāⁿ-tio̍h ê lē, nā bô siū tiàu, chū-choan jı̍p lāi-īⁿ kìⁿ ông ê, bô-lūn lâm-lú, nā m̄-sī ông kia̍h i kim ê kóaiⁿ-á hō͘ i tit-tio̍h o̍ah ê, chiū tio̍h hō͘ i sí; taⁿ góa bô siū tiàu kàu ông hia í-keng saⁿ-cha̍p jı̍t kú lah.

12

In chiū ēng Í-su-thiap ê ōe kā Bo̍k-tí-kái kóng.

13

Bo̍k-tí-kái hoan-hù lâng kā Í-su-thiap kóng, Lí m̄-thang phah-sǹg lí tī ông-kiong-lāi pí chèng Iû-tāi lâng khah ōe thoat-lī;

14

tī chit-sî lí nā chēng-chēng lóng bô kóng, Iû-tāi lâng beh tùi pa̍t-ūi tit-tio̍h thoat-lī, tit-tio̍h chín-kiù, lí kap lí ê lāu-pē ê ke ōe tú-tio̍h bia̍t-bô; beh siáⁿ-chai lí tit-tio̍h ông-hō͘ ê ūi m̄-sī ūi-tio̍h kin-á-jı̍t ê sî-sè ah?

15

Í-su-thiap chiū hoan-hù lâng hê-hok Bo̍k-tí-kái kóng,

16

Khì chio-chı̍p tī Su-san só͘ ū ê Iû-tāi lâng, ūi-tio̍h góa kìm-chia̍h saⁿ-jı̍t, jı̍t-mî bô chia̍h bô lim; góa kap góa ê kiong-lú iā beh kìm-chia̍h; jiân-āu góa beh bô chiàu-lē jı̍p-khì kìⁿ ông; sí chiū hō͘ i sí.

17

Bo̍k-tí-kái chiū khì, chiàu Í-su-thiap it-chhè só͘ bēng-lēng ê khì kiâⁿ.