Í-sū-thiap 第 9 章 - 巴克禮全羅

1

Cha̍p-jī ge̍h, chiū-sī A-ta̍t ge̍h, cha̍p-saⁿ jı̍t ông ê bēng-lēng kap jū-chí tit-beh kú-hêng, chiū-sī Iû-tāi lâng ê tùi-te̍k ǹg-bāng tit-tio̍h kóan-hat in ê jı̍t, chóng-sī tāi-chì tùi-hóan, hóan-tńg hō͘ Iû-tāi lâng kóan-hat kìⁿ-nā òan-hūn in ê lâng.

2

hit-jı̍t tī A-hap-sûi-ló͘ ông ê ta̍k-séng, Iû-tāi lâng lóng chū-chı̍p tī in ê siâⁿ, hē chhiú kong-kek hiah ê beh hāi in ê lâng, bô lâng ōe tí-tng in, in-ūi chèng peh-sìⁿ lóng kiaⁿ in.

3

Ta̍k-séng ê siú-léng, tāi-sîn, chóng-tok, kap pān-lí ông ê sū ê lâng, lóng lâi pang-chān Iû-tāi lâng, in-ūi kiaⁿ Bo̍k-tí-kái.

4

In-ūi Bo̍k-tí-kái tī tiâu-têng chun-tōa, miâ-siaⁿ piàn-thôan ta̍k-séng; chit ê Bo̍k-tí-kái ná-seng ná-tōa.

5

Iû-tāi lâng ēng to phah in it-chhè ê tùi-te̍k, thâi-sí in, châu-bia̍t in, chhut-chāi ì-sù kiâⁿ tī òan-hūn in ê lâng;

6

tī Su-san siâⁿ, Iû-tāi lâng thâi-bia̍t gō͘-pah lâng;

7

koh thâi-sí Pa-san-tāi-tha, Ta̍t-hun, A-su-phàⁿ-tha,

8

Phò-la̍h-tha, A-tāi-lī-ngá, A-lī-tāi-tha,

9

Phàⁿ-má-su-tha, A-lī-sài, A-lī-tāi, Óa-iâ-sat-tha;

10

chí(**chit) cha̍p-lâng lóng sī Hap-bí-tāi-tha ê sun, Iû-tāi lâng ê tùi-te̍k Hap-bān ê kiáⁿ; chóng-sī bô chhiúⁿ in ê châi-bu̍t.

11

Tng hit-jı̍t chiong Su-san siâⁿ siū-thâi ê lâng-gia̍h thêng-pò tī ông ê bīn-chêng.

12

Ông kā ông-hō͘ Í-su-thiap kóng, Iû-tāi lâng tī Su-san siâⁿ thâi-sí tùi-te̍k gō͘-pah lâng, koh thâi-sí Hap-bān cha̍p ê kiáⁿ; tī ông kî-û ê ta̍k-séng m̄-chai chòe cháiⁿ-iūⁿ; taⁿ lí só͘ chhéng sī sím-mı̍h? beh hō͘ lí; lí só͘ kiû sī sím-mı̍h? iā beh chòe-chiâⁿ i.

13

Í-su-thiap chiū kóng, Ông nā lia̍h-chòe hó, kiû lí chún Su-san ê Iû-tāi lâng, bîn-á-jı̍t iā chiàu kin-á-jı̍t ê jū-chí lâi kiâⁿ, iā chiong Hap-bān cha̍p ê kiáⁿ tiàu tī chhâ-kè--nih.

14

Ông chiū bēng-lēng chiàu án-ni kiâⁿ; hit ê jū-chí thôan tī Su-san, lâng chiū chiong Hap-bān cha̍p ê kiáⁿ tiàu--khí-lâi.

15

A-ta̍t ge̍h cha̍p-sì jı̍t, Su-san ê Iû-tāi lâng koh chū-chı̍p tī Su-san. thâi-sí saⁿ-pah lâng; chóng-sī bô chhiúⁿ in ê châi-bu̍t.

16

Tī ông ta̍k-séng kî-ū ê Iû-tāi lâng iā lóng chū-chı̍p, khí-lâi pó-hō͘ ka-kī ê sìⁿ-miā, thoat-lī tùi-te̍k, hióng-siū pêng-an, thâi-sí òan-hūn in ê lâng chhit-bān gō͘-chheng, chóng-sī bô chhiúⁿ in ê châi-bu̍t.

17

A-ta̍t ge̍h cha̍p-saⁿ jı̍t kiâⁿ chit ê sū, cha̍p-sì jı̍t an-hioh, ēng chit-jı̍t siat iân-sia̍h chòe hoaⁿ-hí ê jı̍t.

18

Chóng-sī Su-san ê Iû-tāi lâng chí cha̍p-saⁿ cha̍p-sì jı̍t chū-chı̍p; cha̍p-gō͘ jı̍t an-hioh, ēng chit-jı̍t chòe siat iân-sia̍h hoaⁿ-hí ê jı̍t;

19

só͘-í tiàm tī hiuⁿ-siā ê Iû-tāi lâng, khiā-khí tī bô siâⁿ-chhiûⁿ ê po͘-thâu, taⁿ lóng ēng A-ta̍t ge̍h cha̍p-sì jı̍t chòe siat iân-sia̍h hoaⁿ-hí ê jı̍t, chòe hó ê jı̍t, ēng lé-mı̍h saⁿ-sàng.

20

Bo̍k-tí-kái kì-chài hiah ê sū, koh siá-phoe hō͘ A-hap-sûi-ló͘ ông ta̍k-séng hn̄g-kūn só͘ ū ê Iû-tāi lâng,

21

tiāⁿ-tio̍h in ta̍k-nî tio̍h siú A-ta̍t ge̍h cha̍p-sì cha̍p-gō͘ nn̄g jı̍t;

22

chí(**chit)nn̄g jı̍t sī Iû-tāi lâng thoat-lī tùi-te̍k tit-tio̍h pêng-an ê jı̍t; hit-ge̍h sī iu-būn piàn-chòe hoaⁿ-hí, pi-ai piàn-chòe hó ê jı̍t; iā tio̍h siú chí(**chit)nn̄g-jı̍t chòe siat iân-sia̍h hoaⁿ-hí, tāi-ke ēng lé-mı̍h saⁿ-sàng, chín-chè sòng-hiong lâng ê jı̍t.

23

Tùi án-ni Iû-tāi lâng, chiàu Bo̍k-tí-kái só͘ siá hō͘ in ê phoe, sêng-jīn beh chiàu in khí-thâu kiâⁿ-ê lâi siú i;

24

in-ūi Iû-tāi lâng ê tùi-te̍k, A-kah cho̍k Hap-bí-tāi-tha ê kiáⁿ Hap-bān, siat kè-bô͘ kong-kek Iû-tāi lâng beh bia̍t in, po̍ah phó͘-jíⁿ, chiū-sī thiu-chhiam, ūi-tio̍h beh pāi-hōai in, châu-bia̍t in;

25

chóng-sī chit ê tāi-chì kàu ông ê bīn-chêng, ông chiū kàng jū-chí hō͘ Hap-bān kè-bô͘ hāi Iû-tāi lâng ê pháiⁿ kè-bô͘ kui tī i ka-kī ê thâu-khak, koh tiàu i kap i hiah ê kiáⁿ tī chhâ-kè-téng.

26

Tùi án-ni in chiàu phó͘-jíⁿ ê miâ chiū kiò hiah ê jı̍t chòe phó͘-jíⁿ-jı̍t. In in-ūi chit tiuⁿ phoe lóng-chóng ê ōe, í-kı̍p in tī chit ê sū só͘ chhin-ba̍k khòaⁿ-kìⁿ chhin-sin tú-tio̍h ê sū,

27

Iû-tāi lâng chiū koat-ì sêng-jīn in kap in ê hō͘-è, í-kı̍p kìⁿ-nā kui-óa in ê lâng, nî-nî beh chiàu só͘ kì-chài, só͘ tiāⁿ-tio̍h ê kî, siú chí(**chit)nn̄g jı̍t, hō͘ i bô hòe-bô;

28

koh beh kì-liām lâi siú hiah ê jı̍t, tī ta̍k-tāi, ta̍k-ke, ta̍k-séng, ta̍k-siâⁿ, hō͘ phó͘-jíⁿ ê jı̍t tī Iû-tāi lâng ê tiong-kan bô hòe-bô; tī in ê hō͘-è kì-liām bô soah.

29

Hit-sî A-pí-hâi ê cha-bó͘-kiáⁿ ông-hō͘ Í-su-thiap kap Iû-tāi lâng Bo̍k-tí-kái, ēng choan(**chôan)-kôan siá lâi kian-kò͘ phó͘-jíⁿ ê tē-jī tiuⁿ phoe;

30

koh ēng hô-pêng sêng-sı̍t ê ōe, siá phoe hō͘ A-hap-sûi-ló͘ ông kok-lāi chı̍t-pah jī-cha̍p-chhit séng só͘ ū ê Iû-tāi lâng,

31

beh kian-kò͘ chit ê phó͘-jíⁿ ê jı̍t tī in só͘ tiāⁿ-tio̍h ê kî, chiàu Iû-tāi lâng Bo̍k-tí-kái kap ông-hō͘ Í-su-thiap só͘ bēng-lēng in ê, iā chiàu Iû-tāi lâng ūi ka-kī kap in ê hō͘-è só͘ tiāⁿ-tio̍h ê, kìm-chia̍h thî-khàu.

32

Í-su-thiap ê chiàu-bēng kian-kò͘ phó͘-jíⁿ ê sū, iā ū kì tī chheh--nih.