Chhut Ai-ki̍p-kì 第 29 章 - 巴克禮全羅

1

Lí hun-piat in chòe-sèng, chòe chè-si ho̍k-sāi Góa, tio̍h án-ni kiâⁿ; chhú chı̍t-chiah kang ê gû-á, nn̄g-chiah bô hâ-chhû kang ê mî-iûⁿ,

2

koh bô-kàⁿ-piáⁿ, kap kiáu-iû ê bô-kàⁿ-piáⁿ, kap boah-iû bô-kàⁿ ê po̍h-piáⁿ, lóng tio̍h ēng hó ê mī-hún chòe-ê.

3

Chiah-ê piáⁿ tio̍h hē tī chı̍t kha kheng, tóe tī kheng-nı̍h tòa-lâi, koh khan hit chiah kang ê gû kap nn̄g chiah kang ê mî-iûⁿ lâi.

4

Tio̍h hō͘ A-lûn kap i hiah-ê kiáⁿ kàu hōe-bō͘ ê mn̂g-kháu ēng chúi sóe in.

5

Tio̍h the̍h hiah-ê i-ho̍k lâi, chiong lāi-saⁿ kap í-hut-tek lāi-bīn ê gōa-phàu, kap í-hut-tek, liân pó͘-kòa, kā A-lûn chhēng; iā ēng kî-khá ê kang só͘ chit í-hut-tek ê tòa kā i hâ;

6

ēng bō tì tī i ê thâu-khak, chiong sèng ê bián-liû tha̍h tī bō ê téng-bīn.

7

Tio̍h ēng boah ê iû tò tī i ê thâu-khak lâi boah i.

8

Tio̍h hō͘ i ê kiáⁿ lâi, kā in chhēng lāi-saⁿ.

9

Koh ēng tòa hâ A-lûn kap i hiah-ê kiáⁿ, kā in pau thâu-khak ê kun; in chiàu éng-óan ê lē tit-tio̍h chè-si ê chit; koh tio̍h kā A-lûn kap i hiah-ê kiáⁿ kiâⁿ siat-lı̍p ê lé.

10

Lí tio̍h khan hit chiah kang ê gû kàu hōe-bō͘-chêng; A-lûn kap i hiah-ê kiáⁿ tio̍h hōaⁿ-chhiú tī gû ê thâu-khak-téng.

11

Lí tio̍h tī Iâ-hô-hoa ê bīn-chêng, tī hōe-bō͘ ê mn̂g-kháu, thâi hit chiah gû;

12

chhú i ê huih tām-po̍h, ēng chńg-thâu-á boah tī tôaⁿ ê sì-kak; chiong huih lóng piàⁿ tī tôaⁿ-kha-nı̍h.

13

Tio̍h chiong it-chhè ngó͘-chōng ê iû, kap koaⁿ-téng ê bāng-se, kap nn̄g lia̍p io-chí, í-kı̍p io-chí ê iû, lóng sio tī tôaⁿ-téng.

14

To̍k-to̍k gû ê bah, kap i ê phê, i ê pùn, lóng tio̍h ēng hé sio tī iâⁿ-gōa; sī chòe sio̍k-chōe-chè.

15

Lí tio̍h khan chı̍t chiah kang ê mî-iûⁿ lâi; A-lûn kap i hiah-ê kiáⁿ tio̍h hōaⁿ-chhiú tī hit chiah iûⁿ ê thâu-khak-téng.

16

Tio̍h thâi hit chiah iûⁿ, chiong i ê huih hiù tī tôaⁿ ê sì-ûi.

17

Tio̍h chiong iûⁿ chhiat chı̍t-tè chı̍t-tè, sóe ngó͘-chōng kap thúi, lok tī chhiat kui tè ê bah kap thâu ê téng-bīn.

18

Tio̍h chiong kui chiah iûⁿ sio tī tôaⁿ-téng, sī hiàn hō͘ Iâ-hô-hoa ê sio-chè; sī phang-phang-ê, ēng hé sio hō͘ Iâ-hô-hoa ê chè.

19

Lí tio̍h chiong tē-jī chiah kang ê mî-iûⁿ khan-lâi; A-lûn kap i hiah-ê kiáⁿ tio̍h hōaⁿ-chhiú tī iûⁿ ê thâu-khak-téng.

20

Lí tio̍h thâi hit chiah iûⁿ, chhú i ê huih tām-po̍h, boah tī A-lûn chiàⁿ-pêng ê hī-á-sûi, kap i chiah-ê kiáⁿ, chiàⁿ-pêng ê hī-á-sûi, koh boah tī in chiàⁿ-chhiú ê tōa-pō͘-bú, kap chiàⁿ-kha ê tōa-pō͘-bú; koh chiong huih hiù tī tôaⁿ ê sì-ûi.

21

Lí tio̍h chhú tôaⁿ-téng ê huih tām-po̍h kap boah ê iû, hiù tī A-lûn kap i ê saⁿ, koh hiù tī i ê kiáⁿ kap i ê kiáⁿ ê saⁿ; i kap i ê saⁿ, i ê kiáⁿ kap i ê kiáⁿ ê saⁿ, lóng hun-piat chòe sèng.

22

Koh tio̍h chhú hit chiah iûⁿ ê iû, kap i ê pûi ê bé, kap khàm ngó͘-chōng ê iû, kap koaⁿ-téng ê bāng-se, nn̄g lia̍p io-chí, í-kı̍p io-chí ê iû, kap chiàⁿ-pêng ê thúi (che sī chiâⁿ siat-lı̍p ê lé ê iûⁿ);

23

koh tùi hit-khia hē tī Iâ-hô-hoa ê bīn-chêng tóe bô-kàⁿ-piáⁿ ê kheng-á-lāi, the̍h chı̍t tè piáⁿ, chı̍t tè kiáu-iû ê piáⁿ, chı̍t-tè po̍h-piáⁿ;

24

lóng hē tī A-lûn ê chhiú kap i ê kiáⁿ ê chhiú, iô tī Iâ-hô-hoa ê bīn-chêng, chòe iô-chè.

25

Lí tio̍h tùi in ê chhiú chih-lâi, sio tī tôaⁿ-téng sio-chè ê téng-bīn, chòe phang-phang tī Iâ-hô-hoa ê bīn-chêng; sī ēng hé sio hō͘ Iâ-hô-hoa ê chè.

26

A-lûn siū siat-lı̍p ê lé só͘ hiàn kang ê iûⁿ, lí tio̍h chhú i ê heng, iô tī Iâ-hô-hoa ê bīn-chêng, chòe iô-chè; che sī lí ê hūn-gia̍h.

27

Kiâⁿ siat-lı̍p ê lé só͘ hiàn kang ê iûⁿ, hit-ê iô-chè ê heng kap kú-chè ê thúi, chiū-sī só͘ iô-ê, só͘ kú-khí-ê, lí tio̍h hun-piat i chòe-sèng, chiū-sī sio̍k tī A-lûn kap i hiah-ê kiáⁿ-ê.

28

Che tio̍h chòe A-lûn kap i ê kiáⁿ-sun tùi Í-sek-lia̍t lâng só͘ tit-tio̍h éng-óan ê hūn-gia̍h; in-ūi sī kú-chè; tio̍h tùi Í-sek-lia̍t lâng pêng-an-chè ê tiong-kan chòe kú-chè; chiū-sī in hiàn hō͘ Iâ-hô-hoa ê kú-chè.

29

A-lûn ê sèng-saⁿ tio̍h lâu hō͘ i āu-tāi ê kiáⁿ-sun, thang chhēng i lâi siū boah-iû, iā chhēng i lâi siū siat-lı̍p.

30

I ê kiáⁿ, hit-ê sòa-chiap i tng chè-si ê, ta̍k-pái jı̍p hōe-bō͘, tī sèng-só͘ ho̍k-sāi ê sî, tio̍h chhēng chhit-jı̍t kú.

31

Kiâⁿ siat-lı̍p ê lé só͘ hiàn kang ê iûⁿ ê bah, lí tio̍h tī sèng ê só͘-chāi chú i.

32

A-lûn kap i ê kiáⁿ tio̍h tī hōe-bō͘ ê mn̂g-kháu chia̍h chit chiah iûⁿ ê bah kap kheng-á-lāi ê piáⁿ.

33

In tio̍h chia̍h só͘ ēng lâi sio̍k-chōe ê mı̍h, hō͘ in tam-tng chit, iā hun-piat in chòe-sèng; to̍k-to̍k gōa-lâng m̄-thang chia̍h, in-ūi che sī sèng-mı̍h.

34

Hit-ê kiâⁿ siat-lı̍p ê lé só͘ hiàn ê bah á-sī piáⁿ, nā ū lâu kàu keh chá-khí-ê, lí tio̍h chiong só͘ lâu-ê ēng hé sio i; m̄-thang chia̍h i, in-ūi sī sèng ê mı̍h.

35

Lí tio̍h chiàu Góa it-chhè só͘ hoan-hù-ê kiâⁿ tī A-lûn kap i ê kiáⁿ; kiâⁿ siat-lı̍p ê lé tio̍h chhit-jı̍t kú.

36

Ta̍k-jı̍t tio̍h hiàn kang ê gû chı̍t-chiah chòe sio̍k-chōe-chè; lí ūi tôaⁿ sio̍k-chōe ê sî chiū hō͘ i chheng-khì; iā tio̍h kā i boah-iû, hun-piat i chòe-sèng.

37

Lí tio̍h ūi tôaⁿ sio̍k-chōe chhit-jı̍t kú, hō͘ i chiâⁿ-sèng; tôaⁿ chiū chiâⁿ chòe chì-sèng; kìⁿ-nā bong-tio̍h i-ê lóng hun-piat chòe-sèng.

38

Lí só͘ tio̍h hiàn tī tôaⁿ-nı̍h-ê sī chiah-ê; chiū-sī bē móa-nî ê iûⁿ-á nn̄g-chiah, ta̍k-jı̍t tio̍h hiàn;

39

chá-khí-sî tio̍h hiàn chı̍t-chiah; hông-hun ê sî tio̍h hiàn hit-chiah.

40

Lí tio̍h ēng iù ê mī-hún chı̍t i-hoat cha̍p-hūn ê chı̍t, ēng khoeh-hó ê iû chı̍t-him sì-hūn ê chı̍t tiau-hô-ê, kap chı̍t chiah iûⁿ-á saⁿ-tâng hiàn; koh ēng chiú chı̍t-him sì-hūn ê chı̍t chòe kòan-tiān.

41

Iáu hit chiah-ê iûⁿ-á tio̍h tī hông-hun ê sî lâi hiàn, tio̍h chiàu chá-khí-sî ê sò͘-chè kap kòan-tiān ê lé liāu-lí i, chòe phang-phang, ēng hé sio lâi hiàn hō͘ Iâ-hô-hoa ê chè.

42

Che beh tī Iâ-hô-hoa ê bīn-chêng, tī hōe-bō͘ ê mn̂g-kháu, chòe lín ta̍k sè-tāi siông-siông hiàn ê sio-chè; Góa beh tī-hia kap lín siong-hōe, kap lí kóng-ōe.

43

Góa beh tī-hia kap Í-sek-lia̍t lâng siong-hōe, hōe-bō͘ chiū beh in-ūi Góa ê êng-kng chiâⁿ-chòe sèng.

44

Góa beh hō͘ hōe-bō͘ kap tôaⁿ chòe-sèng; iā beh hō͘ A-lûn kap i hiah-ê kiáⁿ chòe-sèng, chòe chè-si lâi ho̍k-sāi Góa.

45

Góa beh tiàm tī Í-sek-lia̍t lâng ê tiong-kan, chòe in ê Siōng-tè.

46

In beh chai Góa sī Iâ-hô-hoa in ê Siōng-tè, sī chhōa in chhut Ai-kı̍p tōe; thang hō͘ Góa tiàm tī in tiong-kan; Góa sī Iâ-hô-hoa in ê Siōng-tè.