Chhut Ai-ki̍p-kì 第 40 章 - 巴克禮全羅

1

Iâ-hô-hoa hoan-hù Mô͘-se kóng,

2

Chiaⁿ-ge̍h chhoe-it, lí tio̍h khí chū-chı̍p ê hōe-bō͘.

3

Lí tio̍h hē hoat-kūi tī hit lāi-bīn, ēng tiùⁿ-lî jia-cha̍h-i.

4

Kng toh jı̍p-khì, pâi-siat téng-bīn ê mı̍h; kng teng-tâi jı̍p-khì, tiám i ê teng.

5

Kng sio-hiuⁿ ê kim-tôaⁿ, hē tī hoat-kūi-chêng, kòa hōe-bō͘ mn̂g ê mn̂g-lî.

6

Chiong sio-chè ê tôaⁿ, hē tī chū-chı̍p ê hōe-bō͘ mn̂g-chêng.

7

Chiong sóe-tn̄g ê phûn, hē tī hōe-bō͘ kap tôaⁿ ê tiong-kan, tóe chúi tī phûn-lāi.

8

Koh tī sì-ûi khiā tiûⁿ-ûi, kòa tiûⁿ-mn̂g ê mn̂g-lî.

9

Ēng boah ê iû boah hōe-bō͘, kap kî-tiong hōan só͘-ū-ê, hun-piat i kap lóng-chóng ê khì-kū chòe-sèng; i chiū chòe-sèng.

10

Koh boah sio-chè ê tôaⁿ, kap i lóng-chóng ê khì-kū, hun-piat tôaⁿ chòe-sèng; tôaⁿ chiū chòe chì-sèng.

11

Iā tio̍h boah sóe-tn̄g ê phûn, hun-piat i chòe-sèng.

12

Koh tio̍h chhōa A-lûn kap i hiah-ê kiáⁿ, kàu hōe-bō͘ mn̂g-chêng, ēng chúi kā in sóe.

13

Iā kā A-lûn chhēng sèng-saⁿ, koh ēng iû boah i, hun-piat i chòe-sèng, hō͘ i chòe chè-si lâi ho̍k-sāi Góa.

14

Koh chhōa i hiah-ê kiáⁿ lâi, kā in chhēng lāi-phàu.

15

Tio̍h kā in boah-iû, chhin-chhiūⁿ boah in lāu-pē chı̍t-iūⁿ, hō͘ in chòe chè-si lâi ho̍k-sāi Góa; in siū boah-iû beh éng-óan chòe chè-si, kàu ta̍k sè-tāi.

16

Mô͘-se án-ni kiâⁿ; lóng sī chiàu Iâ-hô-hoa só͘ hoan-hù i ê lâi kiâⁿ.

17

Tē-jī nî chiaⁿ-ge̍h chhoe-it, hōe-bō͘ chiū khiā-khí-lâi.

18

Mô͘-se khiā hōe-bō͘ hē hiah-ê khū, khiā hiah-ê pán, chhng hiah-ê hôaiⁿ-kông, khiā hiah-ê thiāu.

19

Tī hōe-bō͘ téng tah pò͘-pîⁿ, chiong pò͘-pîⁿ ê kòa, khàm tī i ê téng-bīn, sī chiàu Iâ-hô-hoa só͘ hoan-hù Mô͘-se-ê.

20

Koh ēng lu̍t-hoat hē tī kūi-lāi, ēng kǹg chhng tī kūi-nı̍h, hē si-un-só͘ tī kūi-téng.

21

Kng kūi jı̍p hōe-bō͘, kòa jia-cha̍h ê tiùⁿ-lî, jia-cha̍h hoat-kūi, sī chiàu Iâ-hô-hoa só͘ hoan-hù Mô͘-se-ê.

22

Koh chiong toh hē tī hōe-bō͘-lāi, tī hōe-bō͘ ê pak-sì, tī tiùⁿ-lî gōa;

23

hit téng-bīn ēng piáⁿ pâi tī Iâ-hô-hoa ê bīn-chêng; sī chiàu Iâ-hô-hoa só͘ hoan-hù Mô͘-se-ê.

24

Koh hē teng-tâi tī hōe-bō͘-lāi, kap toh saⁿ-tùi, tī hōe-bō͘ ê lâm-pêng.

25

Tī Iâ-hô-hoa ê bīn-chêng tiám-teng; sī chiàu Iâ-hô-hoa só͘ hoan-hù Mô͘-se-ê.

26

Koh hē kim-tôaⁿ tī hōe-bō͘-lāi ê tiùⁿ-lî chêng;

27

tī hit téng-bīn sio phang-liāu ê hiuⁿ; sī chiàu Iâ-hô-hoa só͘ hoan-hù Mô͘-se-ê.

28

Koh kòa hōe-bō͘ mn̂g ê mn̂g-lî.

29

Tī chū-chı̍p ê hōe-bō͘ mn̂g-chêng, hē sio-chè ê tôaⁿ, chiong sio-chè kap sò͘-chè hiàn ti7hit téng-bīn; sī chiàu Iâ-hô-hoa só͘ hoan-hù Mô͘-se-ê.

30

Hē sóe-tn̄g ê phûn tī hōe-bō͘ kap tôaⁿ ê tiong-kan, phûn-lāi tóe chúi, thang sóe-tn̄g.

31

Mô͘-se kap A-lûn kap i hiah-ê kiáⁿ, tī-hia sóe-chhiú sóe-kha.

32

In jı̍p hōe-bō͘ ê sî, á-sī chiū-kūn tôaⁿ ê sî, chiū sóe; sī chiàu Iâ-hô-hoa só͘ hoan-hù Mô͘-se-ê.

33

Tī hōe-bō͘ kap tôaⁿ ê sì-ûi, khiā tiùⁿ-ûi, iā kòa tiùⁿ-ûi mn̂g ê mn̂g-lî; án-ni Mô͘-se chiū ôan-kang.

34

Hit-sî hûn jia-khàm hōe-bō͘, Iâ-hô-hoa ê êng-kng chhiong-móa hōe-bō͘.

35

Mô͘-se bōe-ōe jı̍p hōe-bō͘, in-ūi hûn thêng tī hit téng-bīn; koh Iâ-hô-hoa ê êng-kng chhiong-móa tī hōe-bō͘.

36

Hûn tùi hōe-bō͘ siu chiūⁿ-khì ê sî, Í-sek-lia̍t lâng chiū khí-sin kiâⁿ in ê lō͘-chām.

37

Hûn nā bô siu chiūⁿ-khì, in chiū bô khí-sin kiâⁿ, tı̍t-tı̍t kàu hûn siu chiūⁿ-khì.

38

Jı̍t-sî Iâ-hô-hoa ê hûn tī hōe-bō͘ téng, mî-sî hit tiong-kan ū hé, tī Í-sek-lia̍t chôan-ke ê ba̍k-chiu-chêng; tī in só͘ kiâⁿ ê lō͘-chām lóng sī.57