I-se-kiat 第 24 章 - 巴克禮全羅

1

Tē káu-nî cha̍p-ge̍h chhoe-cha̍p jı̍t, Iâ-hô-hoa ê ōe koh lîm-kàu góa, kóng,

2

Jîn-chú ah, kin-á-jı̍t tú-tú sī Pa-pí-lûn ông chiū-kūn Iâ-lō͘-sat-léng ê jı̍t, lí tio̍h chiong kin-á-jı̍t kì i ê miâ.

3

Tio̍h tùi chit ê pōe-ge̍k ê ke siat phì-jū, kóng, Chú Iâ-hô-hoa án-ni kóng, Chiong tiáⁿ chhāi tī hé--nih; í-keng chhāi hó, chiū piàⁿ chúi tī lāi-bīn,

4

chiong bah-tè, chiū-sī it-chhè pûi-súi ê bah-tè, chêng-thúi āu-thúi, lóng khioh hē tī lāi-bīn; kéng hó ê kut thia̍p hō͘ i móa.

5

Chhú iûⁿ-kûn-tiong tē-it hó--ê, chiong chhâ thia̍p tī tiáⁿ-ē, hō͘ tiáⁿ kún chhiâng-chhiâng, thang chiong kut kûn tī hí lāi-bīn.

6

Chú Iâ-hô-hoa án-ni kóng, Ū chai-ē ah, chit ê hō͘ lâng lâu-huih ê siâⁿ, chiū-sī siⁿ sian ê tiáⁿ, i ê sian iáu-bē tû--khì, tio̍h chiong bah-tè tùi hit tiong-kan chı̍t-tè chı̍t-tè the̍h-chhut-lâi; bô kā i liam-khau.

7

Siâⁿ-tiong ū siū-thâi ê lâng ê huih, piàⁿ tī kng-kng ê chio̍h-pôaⁿ-téng, bô piàⁿ tī tōe--nih, thang ēng thô͘ khàm.

8

Chit ê siâⁿ-lāi só͘ lâu ê huih, piàⁿ tī kng-kng ê chio̍h-pôaⁿ-téng, bô thang jia-khàm, sī Góa hō͘ i án-ni; ūi-tio̍h beh kek tōa siū-khì, kiâⁿ pò-èng.

9

Só͘-í Chú Iâ-hô-hoa án-ni kóng, Ū chai-ē ah, chit ê hō͘ lâng lâu-huih ê siâⁿ, Góa ia̍h beh thia̍p tōa-tui ê hé-chhâ.

10

Thiⁿ-chhâ hō͘ hé chin iām, chiong bah kûn nōa, chiong thng ngâu khó, hō͘ kut hu-lu--khì.

11

Chiong tiáⁿ, piàⁿ khang, chhāi tī teh to̍h ê thòaⁿ-téng, hō͘ tiáⁿ pek-jia̍t, hō͘ tâng sio âng, iûⁿ kî-tiong ê ù-òe, tû hit téng-bīn ê sian.

12

I tio̍h-bôa ià-siān, chóng-sī só͘ siⁿ tōa-tōa ê sian, iû-gôan bô lak; i ê sian chiū nā tī hé--nih, ia̍h bōe tû-khì.

13

Tī lí ê ù-òe tiong ū îm-hēng, Góa bat chheng-khì lí, lí iáu-kú bô chheng-khì; só͘-í lí ê ù-òe bōe koh tit-tio̍h chheng-khì, kàu Góa tùi lí hoat-chhut ê tōa siū-khì soah.

14

Góa Iâ-hô-hoa bat kóng--i; hit ê sū tek-khak chiâⁿ, Góa iā beh kiâⁿ--i, tek-khak bô hóan-hok, tek-khak bô lîn-bín, ia̍h bô thè-hóe; lâng beh chiàu lí ê kú-tōng, chiàu lí ê kiâⁿ-chòe sím-phòaⁿ lí; che sī Chú Iâ-hô-hoa kóng--ê.

15

Iâ-hô-hoa ê ōe koh lîm-kàu góa kóng,

16

Jîn-chú ah, khòaⁿ ah, Góa beh chiong lí ê ba̍k-chiu só͘ ì-ài--ê hut-jiân chhú--khì; chóng-sī lí m̄-thang pi-ai thî-khàu, ia̍h m̄-thang lâu ba̍k-sái.

17

To̍k-to̍k thang àm-chīⁿ thó͘-khùi, m̄-thang chhut-siaⁿ, m̄-thang pān-lí song-sū, thâu-khak iû-gôan tio̍h pau thâu-kun, kha iû-gôan tio̍h chhēng-ôe, m̄-thang ng lí ê chhùi-tûn, iā m̄-thang chia̍h tiàu-song ê piáⁿ.

18

Tùi án-ni, góa chiong chit ê sū chá-khí-sî kā peh-sìⁿ kóng; ê-hng góa ê bó͘ chiū sí; keh chá-khí, góa chiū thàn bēng-lēng lâi kiâⁿ.

19

Peh-sìⁿ mn̄g góa kóng, Lí án-ni chòe, kap góan ū sím-mı̍h kan-sia̍p? lí thái-thó bô kā góan kóng?

20

Góa ìn in kóng, Iâ-hô-hoa ê ōe lîm-kàu góa kóng,

21

Lí tio̍h kā Í-sek-lia̍t-ke kóng, Chú Iâ-hô-hoa án-ni kóng, Khòaⁿ ah, Góa beh phah lâ-sâm Góa ê sèng-só͘, chiū-sī lín ê sè-le̍k só͘ khoa-kháu, lín ê ba̍k-chiu só͘ ì-ài, lín ê sim só͘ thiàⁿ-sioh--ê; koh lín só͘ lâu tī-hia ê kiáⁿ cha-bó͘-kiáⁿ beh tó tī to-ē.

22

Hit-sî, lín beh chiàu góa só͘ kiâⁿ--ê lâi kiâⁿ, bô ng lín ê chhùi-tûn, ia̍h bô chia̍h tiàu-song ê piáⁿ.

23

Lín ê thâu-khak iû-gôan pau thâu-kun, kha beh chhēng ôe, bô pi-ai, bô thî-khàu; lín beh tī lín ê chōe-ok tiong siau-bia̍t, saⁿ tùi-bīn thó͘-khùi.

24

Í-se-kiat beh án-ni chòe lín ê tiāu-thâu, hōan-nā i só͘ kiâⁿ--ê, lín ia̍h beh án-ni kiâⁿ, chit ê tāi-chì nā kàu, lín chiū chai Góa sī Iâ-hô-hoa.

25

Jîn-chú ah, tng Góa tû-khì in só͘ óa-khò ê, kap in só͘ hoaⁿ-hí ê êng-kng, in ê ba̍k-chiu só͘ ì-ài--ê, in ê sim só͘ thiàⁿ-sioh--ê, chiū-sī in ê kiáⁿ-jî,

26

hit-jı̍t tit-tio̍h thoat-lī ê lâng kiám bô lâi lí chia, hō͘ lí chhin-hī thiaⁿ-kìⁿ chit ê sū mah?

27

Tng hit-jı̍t, lí ê chhùi chiū khui, lí chiū kap tit-tio̍h thoat-lī ê lâng kóng-ōe, bô koh é-káu; lí beh án-ni chòe in ê tiāu-thâu; in chiū chai Góa sī Iâ-hô-hoa.