I-se-kiat 第 4 章 - 巴克禮全羅

1

Jîn-chú ah, lí tio̍h the̍h chı̍t tè chng, hē tī lí ê bīn-chêng; ūi Iâ-lō͘-sat-léng siâⁿ tī hí téng-bīn.

2

Koh ûi-khùn kong-kek--i, khí thô͘-tui kong-kek--i, tī sì-ûi an-siat tōa-thûi kong-kek--i.

3

Koh tio̍h the̍h thih-pán, hē tī lí kap siâⁿ ê tiong-kan, chún-chòe thih-chhiûⁿ; lí ê bīn tiāⁿ-tiāⁿ ǹg--i, chiū siâⁿ siū ûi-khùn, lí beh ûi-khùn i. Che thang chòe tiāu-thâu tī Í-sek-lia̍t ke.

4

Lí tio̍h khi tò-pêng tó-teh, tam-tng Í-sek-lia̍t ke ê chōe; chiàu lí khi tò-pêng tó--teh ê jı̍t jōa-chōe, lí tam-tng in ê chōe iā sī án-ni.

5

Góa chiong in hōan-chōe ê nî hō͘ lí ēng jı̍t ê siàu-gia̍h lâi tí--i, chiū-sī saⁿ-pah káu-cha̍p jı̍t; lí chiàu án-ni tam-tng Í-sek-lia̍t ke ê chōe-kòa.

6

Lí í-keng móa chiah ê jı̍t, tio̍h koh khi chiàⁿ-pêng tó-teh, tam-tng Iû-tāi ke ê chōe-kòa, Góa kā lí hān sì-cha̍p jı̍t, chı̍t-jı̍t tí chı̍t-nî.

7

Só͘-í lí ê bīn tio̍h tiāⁿ-tiāⁿ ǹg siū ûi-khùn ê Iâ-lō͘-sat-léng, chhiú-kut le̍k theh-theh, soan-thôan lâi kong-kek--i.

8

Khòaⁿ ah, Góa beh ēng soh hē tī lí ê sin-chiūⁿ; tì-kàu lí bōe-ōe hoan kè-pêng, kàu lí ûi-khùn siâⁿ ê jı̍t móa.

9

Lí tio̍h the̍h sió-be̍h, tōa-be̍h, tāu-á, âng-tāu, sóe-á, kap chho͘-be̍h, tóe tī chı̍t ê khì-kū-lāi; ūi-tio̍h pún-sin ēng--i lâi chòe-piáⁿ, chiàu lí tó thán-khi ê jı̍t ê siàu-gia̍h, chiū-sī saⁿ-pah káu-cha̍p jı̍t, lí tio̍h chia̍h--i.

10

Lí só͘ chia̍h ê sı̍t-bu̍t, tio̍h chiàu chhìn-tāng, ta̍k-jı̍t chia̍h jī-cha̍p sià-khek-le̍k, chiàu-sî lâi chia̍h.

11

Lí lim chúi ia̍h tio̍h chiàu niû, ta̍k-jı̍t chı̍t-him ê la̍k-hūn-chı̍t; chiàu-sî lâi lim.

12

Lí chia̍h chit ê piáⁿ, chhin-chhiūⁿ chia̍h tōa-be̍h-piáⁿ chı̍t-iūⁿ; tio̍h ēng lâng só͘ pàng ê pùn, pek--i tī chèng-lâng ê ba̍k-chiu-chêng.

13

Iâ-hô-hoa kóng, Í-sek-lia̍t lâng tī Góa só͘ kóaⁿ in kàu ê lia̍t-kok-tiong, ia̍h tek-khak án-ni chia̍h bô chheng-khì ê piáⁿ.

14

Góa kóng, Ai ah, Chú Iâ-hô-hoa ah, góa pêng-sò͘ bē-bat bak-tio̍h lâ-sâm, tùi sòe-hàn kàu-taⁿ, bē-bat chia̍h ka-kī sí--ê, á-sī hō͘ iá-siù thiah-lı̍h--ê; hit ê khó-ò͘ⁿ ê bah, ia̍h bē-bat jı̍p góa ê chhùi.

15

Tùi án-ni I tùi góa kóng, Khòaⁿ ah, Góa hō͘ lí ēng gû-sái lâi thòe lâng ê pùn; lí tio̍h chiong lí ê piáⁿ pek tī hit téng-bīn.

16

I koh tùi góa kóng, Jîn-chú ah, khòaⁿ ah, Góa beh tī Iâ-lō͘-sat-léng tōan-cho̍at in só͘ óa-khò ê bí-niû; in chia̍h-piáⁿ tio̍h chiàu chhìn, chún-chat lâi chia̍h; lim chúi ia̍h tio̍h chiàu niû, gông-ngia̍h lâi lim.

17

Hō͘ in khiàm-kheh piáⁿ kap chúi, saⁿ-kap gông-ngia̍h, koh tī in ê chōe-kòa lâi siau-bia̍t.