I-se-kiat 第 40 章 - 巴克禮全羅

1

Góan siū-lia̍h ê jī-cha̍p-gō͘ nî, tī nî-thâu, ge̍h ê chhoe-cha̍p jı̍t siâⁿ phòa liáu-āu tē cha̍p-sì nî, tú-tú hit-jı̍t Iâ-hô-hoa ê chhiú hē tī góa ê sin-chiūⁿ, chhōa góa kàu hia.

2

Tī Siōng-tè īⁿ-siōng-tiong tòa góa kàu Í-sek-lia̍t tōe, an-tì góa tī chin-kôaiⁿ ê soaⁿ, soaⁿ-téng ê lâm-pêng ū chhin-chhiūⁿ khí-chō ê siâⁿ.

3

I chhōa góa kàu hia; khòaⁿ ah, ū chı̍t-lâng, khóan-sit chhin-chhiūⁿ tâng ê khóan-sit, chhiú the̍h môa-soh, kap chhek-liông ê ko-chhioh, khiā tī mn̂g-kháu.

4

Hit ê lâng tùi góa kóng, Jîn-chú ah, kìⁿ góa só͘ hō͘ lí khòaⁿ--ê, lí tio̍h ēng lí ê ba̍k-chiu khòaⁿ, ēng lí ê hī-khang thiaⁿ, iā tio̍h ēng lí ê sim kì-tiâu; in-ūi lí siū tòa lâi chia tiâu-tî ūi-tio̍h beh hō͘ lí khòaⁿ chiah ê sū; kìⁿ lí só͘ khòaⁿ-kìⁿ--ê, lí lóng tio̍h kā Í-sek-lia̍t-ke kóng.

5

Khòaⁿ ah, chhù ê gōa-bīn sì-ûi ū chhiûⁿ, hit lâng ê chhiú the̍h chhek-liông ê ko-chhioh, tn̂g la̍k tiú, múi-tiú sī chı̍t-tiú koh chı̍t pa-chiúⁿ; i chiū niû chhiûⁿ kāu chı̍t ko-chhioh, kôaiⁿ chı̍t ko-chhioh.

6

I chiū kàu ǹg tang ê mn̂g, chiūⁿ i ê kiā-á; niû mn̂g ê hō͘-tēng, khoah chı̍t ko-chhioh; koh chı̍t ê hō͘-tēng, khoah iā chı̍t ko-chhioh.

7

Koh sī-ōe-pâng, ta̍k-keng tn̂g chı̍t ko-chhioh, khoah chı̍t ko-chhioh; saⁿ-lī gō͘ tiú; mn̂g ê hō͘-tēng, chiū-sī óa-kūn ǹg-chhù ê mn̂g ê léng-lông, khoah chı̍t ko-chhioh.

8

I iā niû ǹg chhù ê mn̂g ê léng-lông, khoah chı̍t ko-chhioh.

9

Koh niû mn̂g ê lông, khoah poeh-tiú; i ê thiāu nn̄g tiú; hit ê mn̂g ê léng-lông sī ǹg-chhù.

10

Tang--sì ê mn̂g ū sī-ōe-pâng, chit-pâng saⁿ-keng, hit-pâng saⁿ-keng, lóng tâng-chı̍t-iūⁿ ê chhùn-chhioh; chit-pêng ê thiāu kap hit pêng ê thiāu iā sī chı̍t-iūⁿ ê chhùn-chhioh.

11

I niû mn̂g-kháu, khoah cha̍p tiú, mn̂g ê tn̂g cha̍p-saⁿ tiú.

12

Sī-ōe-pâng thâu-chêng ê kài, chit-pêng chı̍t-tiú, hit-pêng iā ū kài, chı̍t-tiú; sī-ōe-pâng chit-pêng la̍k-tiú, hit-pêng la̍k-tiú.

13

Koh niû mn̂g tùi chit ê sī-ōe-pâng ê chhù-téng kàu hit ê sī-ōe-pâng ê chhù-téng, khoah jī-cha̍p-gō͘ tiú; mn̂g kap mn̂g saⁿ-tùi.

14

Koh chòe hiah ê thiāu la̍k-cha̍p tiú; ū īⁿ ēng thiāu chòe-kài, tī mn̂g ê sì-ûi.

15

Tùi jı̍p-mn̂g ê thâu-chêng kàu lāi-bīn mn̂g ê léng-lông ê thâu-chêng, kiōng gō͘-cha̍p tiú.

16

Chiah ê sī-ōe-pâng kap mn̂g-lāi sì-ûi ê thiāu, í-kı̍p in ê léng-lông, lóng ū koaiⁿ-ba̍t ê thang; koh sì-ûi ū thang ǹg lāi-bīn; ta̍k ki thiāu ê téng-bīn ū chang-chhiū.

17

I chhōa góa jı̍p gōa-īⁿ; khòaⁿ ah, ū pâng-keng, koh tī īⁿ ê sì-ûi ū pho͘-chio̍h ê tōe; pho͘-chio̍h tōe ê téng-bīn ū pâng saⁿ-cha̍p keng.

18

Pho͘-chio̍h ê tōe sī tī hiah ê mn̂g ê sin-piⁿ, kap hiah ê mn̂g pîⁿ-tn̂g; che sī ē-bīn pho͘-chio̍h ê tōe.

19

I tùi ē-bīn mn̂g ê thâu-chêng niû kàu lāi-īⁿ thâu-chêng ê gōa-bīn, khoah chı̍t-pah tiú; tang-bīn pak-bīn lóng sī án-ni.

20

Gōa-īⁿ ǹg pak ê mn̂g, i niû i ê tn̂g khoah.

21

I ê sī-ōe-pâng chit-pêng saⁿ-keng, hit-pêng saⁿ-keng; i ê thiāu, i ê léng-lông, lóng chiàu thâu chı̍t ê mn̂g ê pān; tn̂g gō͘-cha̍p tiú, khoah jī-cha̍p-gō͘ tiú.

22

I ê thang i ê léng-lông kap i ê chang-chhiū, lóng sī chiàu ǹg-tang ê mn̂g; lâng tùi chhit-chàn ê kiā-á chiūⁿ kàu hia; thâu-chêng ū hiah ê lông.

23

Lāi-īⁿ ū mn̂g kap tang--sì ê mn̂g pak--sì ê mn̂g saⁿ-tùi; i tùi mn̂g kàu mn̂g niû--i, chı̍t-pah tiú.

24

I chhōa góa ǹg lâm--sì khì; khòaⁿ ah, ū mn̂g ǹg-lâm; koh chiàu chêng ê chhùn-chhioh niû i ê thiāu kap i ê léng-lông.

25

I ê lāi-bīn kap i ê léng-lông sì-ûi lóng ū thang, kap chêng só͘ niû ê thang tâng chı̍t-iūⁿ; tn̂g gō͘-cha̍p tiú, khoah jī-cha̍p-gō͘ tiú.

26

Ū chhit-chàn kiā-á thang chiūⁿ kàu hia; thâu-chêng ū hiah ê léng-lông; thiāu-téng ū chang-chhiū, chit-pêng chı̍t-châng, hit-pêng chı̍t-châng.

27

Lāi-īⁿ ū mn̂g ǹg-lâm; tùi mn̂g kàu mn̂g i ǹg-lâm niû-i chı̍t-pah tiú.

28

I chhōa góa tùi lâm-mn̂g kàu lāi-īⁿ; chiū chiàu chêng ê chhùn-chhioh niû lâm-mn̂g;

29

i ê pâng, i ê thiāu, i ê léng-lông, lóng chiàu chêng ê chhùn-chhioh; i ê lāi-bīn kap i léng-lông sì-ûi lóng ū thang; tn̂g gō͘-cha̍p tiú, khoah jī-cha̍p-gō͘ tiú.

30

Chiu-ûi ū léng-lông, tn̂g jī-cha̍p-gō͘ tiú, khoah gō͘-tiú.

31

I ê lông ǹg gōa-īⁿ, thiāu-téng ū chang-chhiū, chiūⁿ poeh-chàn kiā-á kàu hia.

32

I chhōa góa kàu lāi-īⁿ, ǹg tang; i niû hit ê mn̂g, chiàu chêng ê chhùn-chhioh.

33

I ê pâng, i ê thiāu, i ê léng-lông, lóng chiàu chêng ê chhùn-chhioh; i ê lāi-bīn, kap i léng-lông sì-ûi lóng ū thang, tn̂g gō͘-cha̍p tiú, khoah jī-cha̍p-gō͘ tiú.

34

I ê lông ǹg gōa-īⁿ, thiāu-téng tī chit-pêng hit-pêng ū chang-chhiū; chiūⁿ poeh chàn kiā-á kàu hia.

35

I koh chhōa góa kàu pak-mn̂g, niû--i chiàu chêng ê chhùn-chhioh.

36

Koh niû i ê pâng, i ê thiāu, i ê léng-lông; lāi-bīn sì-ûi lóng ū thang, i ê tn̂g gō͘-cha̍p tiú, khoah jī-cha̍p-gō͘ tiú.

37

I ê thiāu ǹg gōa-īⁿ, thiāu-téng tī chit-pêng hit-pêng ū chang-chhiū; chiūⁿ poeh chàn kiā-á kàu hia.

38

Mn̂g ê thiāu-piⁿ ū pâng, kap i ê mn̂g; tī-hia sóe sio-chè ê seng-lé;

39

tī mn̂g-lông ê lāi-bīn, chit-pêng ū nn̄g tè toh, hit pêng ū nn̄g tè toh; tī hit téng-bīn thang lâi thâi sio-chè, sio̍k-chōe chè, pó͘-kè-sit ê chè ê seng-lé.

40

Chiūⁿ kàu ǹg pak ê mn̂g-kháu, chit-pêng ê gōa-bīn ū nn̄g tè toh, mn̂g-lông hit pêng iā ū nn̄g tè toh.

41

Tī mn̂g-piⁿ chit-pêng ū sì-tè toh, hit-pêng ū sì-tè toh, kiōng poeh tè; tī hit téng-bīn thâi seng-lé.

42

Ūi-tio̍h sio-chè ê lō͘-ēng ê sì tè toh, sī chio̍h phah--ê, tn̂g tiú-pòaⁿ, khoah tiú-pòaⁿ, kôaiⁿ chı̍t-tiú; thâi sio-chè kap chiah ê chè, só͘ ēng ê khì-kū hē tī hit téng-bīn.

43

Ū kau, khoah chı̍t pa-chiúⁿ, tèng-tiâu tī lāi-bīn ê sì-ûi; toh-téng ū chè-bah.

44

Lāi-mn̂g ê gōa-bīn, pak-mn̂g-piⁿ ê lāi-īⁿ, ū pâng-keng; ūi-tio̍h chhiùⁿ-koa ê lâng lâi siat; hiah ê pâng-keng ǹg-lâm, tang-mn̂g-piⁿ iā ū chı̍t-keng ǹg-pak.

45

I kā góa kóng, Chit-keng ǹg-lâm ê pâng sī hō͘ tam-tng kò͘-chhù ê chè-si ēng.

46

Hit-keng ǹg-pak ê pâng sī hō͘ tam-tng kò͘-tôaⁿ ê chè-si ēng; chiah-ê sī Lī-bī cho̍k-tiong Sat-tok ê kiáⁿ-sun, chiū-kūn Iâ-hô-hoa lâi ho̍k-sāi--ê.

47

I koh niû hit ê īⁿ, tn̂g chı̍t-pah tiú, khoah chı̍t-pah tiú; sī sù-hong--ê; tôaⁿ sī tī chhù-chêng.

48

I chhōa góa kàu chhù-chêng ê léng-lông, niû léng-lông ê ta̍k ki thiāu, chit-pêng gō͘ tiú, hit-pêng gō͘ tiú. Mn̂g ê khoah, chit-pêng saⁿ tiú, hit-pêng saⁿ tiú.

49

Léng-lông tn̂g jī-cha̍p tiú, khoah cha̍p-it tiú; ū lâng peh-chiūⁿ ê kiā-á; hiah ê thiāu-piⁿ, koh ū sòe-ki thiāu; chit-pêng chı̍t ki, hit-pêng chı̍t-ki.