Ka-lia̍p-thài 第 1 章 - 巴克禮全羅

1

Pó-lô chòe sù-tô͘ (m̄ sī chhut tī lâng, iā m̄ sī tùi lâng, chiū-sī tùi Iâ-so͘ Ki-tok kap hō͘ I tùi sí-lâng tiong koh-o̍ah ê Pē Siōng-tè )

2

. taⁿ kap tâng tī-teh ê chèng hiaⁿ-tī phoe kià hō͘ Ka-lia̍p-thài chiah ê kàu-hōe:

3

. gōan lín tùi Pē Siōng-tè kap lán ê Chú Iâ-so͘ Ki-tok tit-tio̍h un-tián pêng-an;

4

. I ūi-tio̍h lán ê chōe hiàn ka-kī, beh kiù lán chhut hiān-kim pháiⁿ ê sè-tāi, chiū-sī chiàu lán ê Pē Siōng-tè ê chí-ì;

5

. gōan êng-kng kui I kàu tāi-tāi. À-bēng.

6

. Chêng tī Ki-tok ê un tiàu lín ê, lín lī-khui I kàu chiah kín, khì thàn pa̍t iūⁿ ê hok-im, sī góa só͘ kî-kòai;

7

. hit ê pa̍t-ê m̄ sī hok-im, put-kò ū lâng kiáu-jiáu lín, ài phah-lōan Ki-tok ê hok-im nā-tiāⁿ.

8

. Taⁿ siat-sú góan, á-sī tùi thiⁿ lâi ê thiⁿ-sài thôan hok-im hō͘ lín, koh-iūⁿ tī góan só͘ bat thôan hō͘ lín ê, i tio̍h siū chiù-chó͘.

9

. Chhin-chhiūⁿ góan chêng bat kóng ê, taⁿ góa koh kóng i, nā ū lâng thôan hok-im hō͘ lín, koh-iūⁿ tī lín só͘ bat siū ê, i tio̍h siū chiù-chó͘.

10

. Góa taⁿ sī teh tùi lâng thiám-mī mah? Á-sī tùi Siōng-tè ah? Á-sī góa teh kiû hō͘ lâng hoaⁿ-hí ah? Góa nā iáu-kú ài hō͘ lâng hoaⁿ-hí, chiū m̄ sī Ki-tok ê lô͘-po̍k.

11

. Hiaⁿ-tī ah, góa pò lín chai lūn góa pêng-sò͘ só͘ thôan ê hok-im, hit-ê m̄ sī chiàu lâng ê ì-sù.

12

. In-ūi góa bē bat tùi lâng siū-tio̍h, iā bô siū lâng kà-sī, sī tùi Iâ-so͘ Ki-tok ê khé-sī.

13

. Lín bat thiaⁿ-kìⁿ góa chêng tī Iû-thài kàu só͘ kiâⁿ-chòe ê, chiū-sī khún-tio̍k Siōng-tè ê kàu-hōe chin thiám, lâi hām-hāi i.

14

. Koh góa tī Iû-thài kàu pí pún-cho̍k tâng-pòe ê chōe-chōe lâng khah chìn-pō͘, ūi-tio̍h góa chó͘-chong ê ûi-thôan koh khah jia̍t-sim.

15

. Nā-sī tùi góan lāu-bú ê thai hun-piat góa, ēng I ê un-tián tiàu góa ê Siōng-tè,

16

. kì-jiân hoaⁿ-hí chiong I ê Kiáⁿ hián-bêng tī góa, beh hō͘ góa soan-thôan I tī gōa-pang, góa chiū bô kap lâng chham-siông,

17

. iā bô chiūⁿ Iâ-lō͘-sat-léng chiū-kūn hiah ê tāi-seng góa chòe sù-tô͘ ê; to̍k-to̍k khì A-lat-pek, koh tò-tńg-lâi Tāi-má-sek.

18

. Saⁿ nî āu góa chiūⁿ Iâ-lō͘-sat-léng, khì thàm Ki-hoat, kap i tòa cha̍p-gō͘ jı̍t.

19

. Kî-û ê sù-tô͘, tû-khì Chú ê hiaⁿ-tī Ngá-kok í-gōa, góa lóng bô kìⁿ-tio̍h.

20

. Taⁿ góa só͘ siá hō͘ lín ê, góa tī Siōng-tè ê bīn-chêng bô pe̍h-chha̍t.

21

. Āu-lâi góa kàu Sū-lī-a kap Ki-lī-ka ê tōe-hng.

22

. Hit sî sio̍k Iû-thài tōe tiàm-tī Ki-tok chiah ê kàu-hōe, iáu-kú m̄ bat góa ê bīn; in kan-ta thiaⁿ-kìⁿ kóng,

23

. Chêng khún-tio̍k lán ê, taⁿ thôan i pêng-sò͘ só͘ hām-hāi ê kàu;

24

. chiū in-ūi góa kui êng-kng Siōng-tè.