Chhòng-sè-kì 第 14 章 - 巴克禮全羅

1

Tng Àm-la̍h-hui chòe Sī-ná ông, A-lio̍k chòe Í-la̍h-sat ông, Ki-tāi-ló-má chòe Í-lân ông, Thê-ta̍t chòe Ko-ìn ông ê sî,

2

in lâi kong-kek Só͘-to-má ông Pí-la̍h, Gô-mô͘-la̍h ông Pí-sa, Ap-má ông Sī-la̍p, Sé-phian ông Sī-bí-pia̍t, í-kı̍p Pí-la̍h ông (Pí-la̍h chiū-sī Só-jíⁿ)

3

In lóng chū-hōe tī Se-têng ê soaⁿ-kok; Se-têng soaⁿ-kok chiū-sī Iâm-hái.

4

In ho̍k-sāi Ki-tāi-ló-má cha̍p-jī nî kú; kàu cha̍p-saⁿ-nî pōe-pōan.

5

Cha̍p-sì-nî Ki-tāi-ló-má, kap tâng hōe-bêng chiah ê ông, lóng lâi, tī A-te̍k-lu̍t-ka-lêng thâi-iâⁿ Lí-ho̍at-im lâng, tī Hâm So͘-se lâng, tī Sa-bî-ki-lia̍t-têng Í-bí lâng,

6

tī Hô-lī lâng ê Se-jíⁿ soaⁿ Hô-lī lâng, kàu kūn tī khòng-iá ê Í-le̍k-pa-lân.

7

In tò-tńg kàu An-bı̍t-pa, chiū-sī Ka-te-su, kong-kek A-má-le̍k chôan-tōe, kap khiā-khí tī Hap-sé-sūn-tha-má ê A-mô͘-lī lâng.

8

Tùi hit-tia̍p Só͘-to-má ông, Gô-mô͘-la̍h ông, Ap-má ông, Sé-phian ông, Pí-la̍h ông, (Pí-la̍h chiū-sī Só-jíⁿ), lóng chhut-lâi tī Se-têng ê soaⁿ-kok pâi-tīn, kap in kau-chiàn;

9

chiū-sī kap Í-lân ông Ki-tāi-ló-má, Ko-ìn ông Thê-ta̍t, Sī-ná ông Àm-la̍h-hui, Í-la̍h-sat ông A-lio̍k kau-chiàn; sì ê ông tùi-te̍k gō͘ ê ông.

10

Se-têng soaⁿ-kok lóng sī chio̍h-iû khiⁿ; Só͘-to-má Gô-mô͘-la̍h chiah ê ông tô-cháu, po̍ah tī-hia; kî-û-ê cháu chiūⁿ-soaⁿ.

11

In chiū chiong Só͘-to-má Gô-mô͘-la̍h ê châi-bu̍t, í-kı̍p in ê kan-niû lóng chhiúⁿ, chòe in khì.

12

Koh chiong A-pek-lân ê tı̍t Lô-tek, kap i ê châi-bu̍t chhiúⁿ-khì; hit-sî Lô-tek tòa tī Só͘-to-má.

13

Ū chı̍t ê tô-cháu ê lâng lâi kā Hi-pek-lâi lâng A-pek-lân kóng; hit-sî A-pek-lân khiā-khí tī A-mô͘-lī lâng Bān-lī ê siōng-chhiū hit só͘-chāi, Bān-lī kap Í-sı̍t-kok kap A-nái lóng sī hiaⁿ-tī, ū kap A-pek-lân liân-bêng.

14

A-pek-lân thiaⁿ-kìⁿ i ê tı̍t hō͘ lâng lia̍h-khì, chiū chhōa seng-ióng tī i ê ke-nı̍h cheng-liān ê chòng-teng, saⁿ-pah cha̍p-poeh lâng, tui-jip kàu Tàn.

15

I kap i ê lô͘-po̍k thàu-mî pun-tūi, kong-kek-in; tui kàu Tāi-má-sek tò-pêng ê Hô-pa.

16

Chiong it-chhè ê châi-bu̍t chhiúⁿ tò-tńg, liân i ê tı̍t-á Lô-tek kap i ê châi-bu̍t, í-kı̍p hū-lú peh-sìⁿ, ia̍h lóng chhiúⁿ tò-tńg.

17

A-pek-lân thâi-iâⁿ Ki-tāi-ló-má, í-kı̍p kap i chòe-tīn chiah ê ông, tò-lâi ê sî, Só͘-to-má ông chhut-lâi, kàu Sa-bí ê soaⁿ-kok, ngiâ-chih i; Sa-bí ê soaⁿ-kok chiū-sī Ông ê soaⁿ-kok.

18

Ia̍h ū Sat-léng ông Be̍k-ki-sé-tek tòa piáⁿ kap chiú chhut-lâi; i sī Chì-kôaiⁿ Siōng-tè ê chè-si;

19

chiok-hok i kóng, Gōan thiⁿ-tōe ê Chú, Chì-kôaiⁿ ê Siōng-tè sù-hok A-pek-lân.

20

Chì-kôaiⁿ ê Siōng-tè chiong tùi-te̍k kau tī lí ê chhiú, eng-kai o-ló I. A-pek-lân chiong lóng-chóng só͘ tit-tio̍h-ê, cha̍p-hūn the̍h chı̍t-hūn hō͘ i.

21

Só͘-to-má ông kā A-pek-lân kóng, Chiong lâng kui góa; mı̍h lóng hō͘ lí.

22

A-pek-lân kā Só͘-to-má ông kóng, Góa ū kí thiⁿ-tōe ê Chú Chì-kôaiⁿ ê Siōng-tè Iâ-hô-hoa lâi chiù-chōa,

23

hōan-nā lí ê mı̍h, chiū chı̍t tiâu sòaⁿ chı̍t tiâu ôe-tòa, góa lóng m̄-the̍h, bián-tit lí kóng, Góa hō͘ A-pek-lân hó-gia̍h;

24

chí-ū siàu-liân lâng só͘ chia̍h ê, í-kı̍p kap góa tâng-kiâⁿ ê lâng A-nái, Í-sı̍t-kok, Bān-lī, só͘ èng-tit ê hūn-gia̍h, thang chhut-chāi in the̍h.