Chhòng-sè-kì 第 21 章 - 巴克禮全羅

1

Iâ-hô-hoa chiàu I chêng ê ōe kòan-kò͘ Sat-la̍h; tùi án-ni Iâ-hô-hoa chiàu I só͘ kóng-ê kā Sat-la̍h chòe-chiâⁿ.

2

A-pek-la̍h-hán nî-lāu ê sî, Sat-la̍h hôai-īn; kàu Siōng-tè tùi i kóng ê jı̍t-kî, chiū kā i siⁿ chı̍t ê kiáⁿ.

3

A-pek-la̍h-hán kā Sat-la̍h só͘ siⁿ ê kiáⁿ, hō miâ kiò Í-sat.

4

Í-sat chhut-sì poeh-jı̍t, A-pek-la̍h-hán chiàu Siōng-tè só͘ hoan-hù-ê, kā i ê kiáⁿ kiâⁿ kat-lé.

5

I ê kiáⁿ Í-sat chhut-sì ê sî, A-pek-la̍h-hán chı̍t-pah hè.

6

Sat-la̍h kóng, Siōng-tè hō͘ góa hoaⁿ-hí chhiò; kìⁿ-nā thiaⁿ-kìⁿ-ê, beh kap góa tâng hoaⁿ-hí chhiò.

7

Koh kóng, Chī-chūi ōe tāi-seng kā A-pek-la̍h-hán kóng, Sat-la̍h beh hō͘ eⁿ-á suh-leng? in-ūi tī i nî-lāu ê sî, góa kā i siⁿ chı̍t ê kiáⁿ.

8

Gín-á chiām-chiām tōa, chiū tn̄g-leng; Í-sat tn̄g-leng ê jı̍t, A-pek-la̍h-hán pâi-siat tōa iân-sia̍h.

9

Tng-sî Ai-kı̍p lâng Hā-kah kā A-pek-la̍h-hán só͘ siⁿ ê kiáⁿ teh léng-chhiò, hō͘ Sat-la̍h khòaⁿ-kìⁿ;

10

chiū tùi A-pek-la̍h-hán kóng, Tio̍h kóaⁿ-chhut chit ê lú-pī kap i ê kiáⁿ; in-ūi lú-pī ê kiáⁿ bōe-thang kap góa ê kiáⁿ Í-sat tâng chòe hō͘-sû.

11

A-pek-la̍h-hán in-ūi i ê kiáⁿ ê iân-kò͘ put-chí iu-būn.

12

Siōng-tè kā A-pek-la̍h-hán kóng, Lí m̄-thang ūi-tio̍h chit ê gín-á í-kı̍p lí ê lú-pī iu-būn; kìⁿ-nā Sat-la̍h tùi lí kóng ê, lí lóng tio̍h thiaⁿ; in-ūi tùi Í-sat siⁿ-ê, chiah beh chheng-chòe lí ê hō͘-è.

13

Lūn-kàu lú-pī ê kiáⁿ, Góa ia̍h beh hō͘ i chiâⁿ-chòe chı̍t-kok, in-ūi i ia̍h sī lí siⁿ-ê.

14

A-pek-la̍h-hán chá-chá khí-lâi, the̍h piáⁿ kap chı̍t phê-tē ê chúi hō͘ Hā-kah; hē tī i ê keng-thâu-téng; liân gín-á sòa kah i khì; i chiū khì, kàu Pia̍t-sī-pa ê khòng-iá chiū kiâⁿ bô lō͘.

15

Phê-tē lāi ê chúi ēng-liáu, Hā-kah chiū chiong gín-á pàng tī sòe châng chhiū kha.

16

Pún-sin kiâⁿ-khui, iok-lio̍k cho̍h chı̍t ki chìⁿ ê hn̄g, saⁿ-tùi-bīn teh chē; kóng, Góa put-jím khòaⁿ gín-á sí; chiū saⁿ-tùi-bīn chē, chhut-siaⁿ tōa thî-khàu.

17

Siōng-tè thiaⁿ-kìⁿ gín-á ê siaⁿ; Siōng-tè ê sù-chiá tùi thiⁿ-nı̍h kiò Hā-kah kóng, Hā-kah, lí ū sím-mı̍h tāi-chì? m̄-bián kiaⁿ; Siōng-tè í-keng thiaⁿ-kìⁿ gín-á tī-hia ê siaⁿ.

18

Khí-lâi, ia̍h hō͘ gín-á khí-lâi, khan tī lí ê chhiú; Góa beh hō͘ i chiâⁿ-chòe tōa-kok.

19

Siōng-tè khui i ê ba̍k-chiu, i chiū khòaⁿ-kìⁿ chúi-chíⁿ; chiū chiong phê-tē khì jı̍p-chúi kàu móa-móa, sòa hō͘ gín-á lim.

20

Siōng-tè kap gín-á tī-teh, i chiū chiām-chiām tōa; tiàm tī khòng-iá, chiâⁿ-chòe siā-chìⁿ ê lâng.

21

I khiā-khí tī Pa-lân ê khòng-iá; i ê lāu-bú tùi Ai-kı̍p tōe kā i chhōa chı̍t ê bó͘.

22

Tng hit-sî A-pí-bí-le̍k, kap i ê kun-tiúⁿ Hui-kok, tùi A-pek-la̍h-hán kóng, Kìⁿ-nā lí só͘ kiâⁿ ê sū, Siōng-tè kap lí tī-teh.

23

Taⁿ lí tī-chia tio̍h kí Siōng-tè kap góa chiù-chōa, m̄-thang khi-hū góa, kap góa ê kiáⁿ, í-kı̍p góa ê sun; góa àn-cháiⁿ-iūⁿ hó khóan-thāi lí, lí ia̍h tio̍h chiàu án-ni khóan-thāi góa, í-kı̍p lí só͘ kià-ku ê tōe-hng.

24

A-pek-la̍h-hán kóng, Góa beh chiù-chōa.

25

Chêng A-pí-bí-le̍k ê lô͘-po̍k pà-chiàm chı̍t kháu chúi-chíⁿ, A-pek-la̍h-hán ūi chit ê sū hiâm A-pí-bí-le̍k.

26

A-pí-bí-le̍k kóng, Chī-chūi chòe chit ê tāi-chì, góa m̄-chai; lí ia̍h bē ū kā góa kóng, kàu kin-á-jı̍t góa chiah thiaⁿ-kìⁿ.

27

A-pek-la̍h-hán chiong iûⁿ kap gû hō͘ A-pí-bí-le̍k; nn̄g-lâng chiū saⁿ-kap lı̍p-iok.

28

A-pek-la̍h-hán chiong chhit chiah bú ê iûⁿ-ko lēng-gōa pàng tī chı̍t só͘-chāi.

29

A-pí-bí-le̍k mn̄g A-pek-la̍h-hán kóng, Lí chiong chhit chiah bú ê iûⁿ-ko lēng-gōa pàng tī chı̍t só͘-chāi, sī sím-mı̍h ì-sù?

30

Ìn kóng, Lí tio̍h tùi góa ê chhiú siu chí chhit chiah bú ê iûⁿ-ko, chòe góa khui chit kháu chíⁿ ê chèng-kù.

31

Só͘-í miâ hit só͘-chāi kiò Pia̍t-sī-pa, in-ūi in nn̄g-lâng tī-hia ū chiù-chōa.

32

In tī Pia̍t-sī-pa lı̍p-iok; A-pí-bí-le̍k chiū kap i ê kun-tiúⁿ Hui-kok khí-sin tò-khì Hui-lī-sū tōe.

33

A-pek-la̍h-hán tī Pia̍t-sī-pa chai chı̍t châng sûi-si-liú chhiū; koh tī-hia kiû-kiò Iâ-hô-hoa éng-éng tī-teh Siōng-tè ê miâ.

34

A-pek-la̍h-hán tī Hui-lī-sū lâng ê tōe kià-ku chōe-chōe jı̍t.