Chhòng-sè-kì 第 26 章 - 巴克禮全羅

1

A-pek-la̍h-hán ê sî, thâu-chı̍t-pái ki-hng í-āu, hit só͘-chāi koh ū ki-hng. Í-sat chiū khì Ki-la̍h-jíⁿ, kàu Hui-lī-sū ê ông A-pí-bí-le̍k hia.

2

Iâ-hô-hoa tùi i chhut-hiān kóng, Lí m̄-thang lo̍h-khì Ai-kı̍p, tio̍h tòa tī Góa só͘ chí-sī lí ê tōe.

3

Lí kià-ku tī chit ê tōe, Góa beh kap lí tī-teh, sù-hok lí; in-ūi Góa beh chiong chiah ê tōe lóng hō͘ lí, kap lí ê hō͘-è; Góa beh kian-kò͘ Góa tùi lí ê pē A-pek-la̍h-hán só͘ chiù ê chōa.

4

Góa beh ke-thiⁿ lí ê hō͘-è, chhin-chhiūⁿ thiⁿ-nı̍h ê chhiⁿ hiah-chōe; koh beh chiong chiah ê tōe lóng hō͘ lí ê hō͘-è; koh tōe-chiūⁿ bān-kok beh in-ūi lí ê hō͘-è tit-tio̍h hok-khì.

5

Sī in-ūi A-pek-la̍h-hán thiaⁿ Góa ê ōe, siú Góa ê hoan-hù, Góa ê bēng-lēng, Góa ê lu̍t-lē, góa ê hoat-tō͘.

6

Í-sat khiā-khí Ki-la̍h-jíⁿ .

7

Hit só͘-chāi ê lâng mn̄g kàu i ê bó͘; i chiū kóng, I sī góa ê sió-bē; m̄-káⁿ kóng, Sī góa ê bó͘; sim-lāi siūⁿ, Kiaⁿ-liáu hit só͘-chāi ê lâng ūi-tio̍h Lī-pek-ka ê iân-kò͘ thâi góa; in-ūi i bīn-māu chin súi.

8

I tī-hia í-keng kú, Hui-lī-sū ông, A-pí-bí-le̍k, tùi thang-á khòaⁿ; khòaⁿ-kìⁿ Í-sat kap i ê bó͘ Lī-pek-ka teh kún-chhiò.

9

A-pí-bí-le̍k kiò Í-sat lâi, kā i kóng, I sı̍t-chāi sī lí ê bó͘; lí siáⁿ-sū kóng, I sī góa ê sió-bē? Í-sat kóng, Góa sim-lāi siūⁿ, kiaⁿ-liáu góa ūi-tio̍h i lâi sí.

10

A-pí-bí-le̍k kóng, Lí tùi góan só͘-chòe-ê sī sím-mı̍h sū? peh-sìⁿ ê tiong-kan, hiám-hiám ū lâng kap lí ê bó͘ saⁿ-kap khùn; lí chiū hō͘ góan hām-lo̍h chōe.

11

Tùi hit-tia̍p A-pí-bí-le̍k chiū hoan-hù chèng peh-sìⁿ kóng, Hōan-nā kha̍p-tio̍h chit-lâng kap i ê bó͘-ê, tiāⁿ-tio̍h beh hō͘ i sí.

12

Í-sat tī hit só͘-chāi chèng-choh, hit-nî tit-tio̍h pah-pē; Iâ-hô-hoa sù i hok-khì.

13

I chiū chiâⁿ-chòe tōa, ná-kú ná-tōa, kàu chiâⁿ-chòe tōa hù-hō͘.

14

I ū iûⁿ-kûn gû-kûn, ia̍h ū chōe-chōe lô͘-po̍k; Hui-lī-sū lâng chiū òan-tò͘ i.

15

Tng i ê lāu-pē A-pek-la̍h-hán tī-teh ê jı̍t, i ê lāu-pē ê lô͘-po̍k só͘ khui ê chíⁿ, Hui-lī-sū lâng lóng kā i that-khì, ēng thô͘ thūn-móa.

16

A-pí-bí-le̍k kā Í-sat kóng, Lí tio̍h lī-khui góan khì, in-ūi lí pí góan chám-jiân khah kiông-sēng.

17

Í-sat chiū lī-khui hia, tī Ki-la̍h-jíⁿ ê soaⁿ-kok tah pò͘-pîⁿ, tiàm hia khiā-khí.

18

Tng i ê lāu-pē A-pek-la̍h-hán tī-teh ê jı̍t, só͘ khui hiah ê chúi-chíⁿ, kàu A-pek-la̍h-hán sí-āu, hō͘ Hui-lī-sū lâng thūn-khì; Í-sat têng-chài kā i khui; iû-gôan chiàu in lāu-pē só͘ hō ê miâ lâi miâ hiah ê chíⁿ.

19

Í-sat ê lô͘-po̍k tī soaⁿ-kok teh ku̍t, tú-tio̍h chı̍t ê o̍ah-chúi ê chíⁿ.

20

Ki-la̍h-jíⁿ ê bo̍k-chiá kap Í-sat ê bo̍k-chiá saⁿ-chiⁿ, kóng, Chit ê chúi sī góan-ê. Í-sat chiū hō hit ê chíⁿ ê miâ kiò Ai-sek; in-ūi in kap i saⁿ-chiⁿ.

21

In koh khui chı̍t ê chíⁿ, ūi chit ê chíⁿ koh saⁿ-chiⁿ; chiū kiò i ê miâ Se-thê-ná.

22

Lī-khui hia koh khui chı̍t ê chíⁿ; in bô ūi chit ê chíⁿ koh saⁿ-chiⁿ; chiū kā i hō miâ Lī-hô-pek; sī kóng, Iâ-hô-hoa taⁿ hō͘ góan khui-khoah ê tōe; góan beh tī chit ê tōe heng-ōng.

23

Í-sat tùi hia chiūⁿ-khì Pia̍t-sī-pa.

24

Hit-mî Iâ-hô-hoa tùi i chhut-hiān kóng, Góa sī lí ê lāu-pē A-pek-la̍h-hán ê Siōng-tè, m̄-bián kiaⁿ; in-ūi Góa kap lí tī-teh, beh sù-hok lí, hō͘ lí ê hō͘-è heng-ōng, lóng sī ūi-tio̍h Góa ê lô͘-po̍k A-pek-la̍h-hán ê iân-kò͘.

25

I chiū tī-hia khí chı̍t chō tôaⁿ, kiû-kiò Iâ-hô-hoa ê miâ, tī-hia tah i ê pò͘-pîⁿ. Í-sat ê lô͘-po̍k chiū tī-hia khui chı̍t ê chíⁿ.

26

A-pí-bí-le̍k kap i ê pêng-iú A-hō͘-sat í-kı̍p i ê kun-tiúⁿ Hui-kok, tùi Ki-la̍h-jíⁿ lâi kìⁿ-i.

27

Í-sat tùi in kóng, Lín kì-jiân òan-hūn góa, kah góa lī-khui lín; taⁿ siáⁿ-sū lâi góa chia?

28

In kóng, Góan bêng-bêng khòaⁿ-kìⁿ Iâ-hô-hoa kap lí tī-teh, m̄-ta̍t-tio̍h lán tiong-kan lí góan chiù-chōa, hō͘ góan kap lí lı̍p-iok;

29

lí bô hāi góan, chhin-chhiūⁿ góan bē-bat kha̍p-tio̍h lí, to̍k-to̍k hó khóan-thāi lí, sàng lí an-jiân tò-khì; taⁿ lí sī Iâ-hô-hoa sù-hok-ê.

30

Í-sat chiū ūi in siat iân-sia̍h, in chiū chia̍h chiū lim.

31

Thàu-chá khí-lâi, tāi-ke chiù-chōa; Í-sat sàng in khí-sin, in chiū an-jiân lī-khui i khì.

32

Siâng hit-jı̍t, Í-sat ê lô͘-po̍k lâi, chiong in khui-chíⁿ ê sū thong-ti i; kóng, Góan tit-tio̍h chúi lah.

33

I chiū kiò hit ê chíⁿ ê miâ kiò Sī-pa; só͘-í kàu kin-á-jı̍t hit ê siâⁿ ê miâ kiò-chòe Pia̍t-sī-pa.

34

Í-sò sì-cha̍p hè ê sî, chhōa Hek-lâng Pí-lī ê cha-bó͘-kiáⁿ Iû-tek, kap Hek-lâng Í-lûn ê cha-bó͘-kiáⁿ Pa-sı̍t-boat chòe bó͘.

35

Chit nn̄g ê hū-jîn-lâng siông-siông hō͘ Í-sat kap Lī-pek-ka sim-lāi tōa iu-būn.