Chhòng-sè-kì 第 37 章 - 巴克禮全羅

1

Ngá-kok khiā-khí Ka-lâm tōe, chiū-sī i ê lāu-pē kià-kha ê só͘-chāi.

2

Ngá-kok ê sè-hē kì tī ē-tóe. Iok-sek cha̍p-chhit hè kap i hiah ê hiaⁿ saⁿ-kap kò͘ iûⁿ; i sī chı̍t ê gín-á kap i ê lāu-pē ê sòe-î Phek-la̍h ê kiáⁿ, Sek-phàⁿ ê kiáⁿ, siông-siông chòe-tīn; Iok-sek chiong i hiah ê hiaⁿ ê pháiⁿ phín-hēng kā in lāu-pē kóng.

3

Taⁿ Í-sek-lia̍t thiàⁿ Iok-sek khah iâⁿ-kè tī thiàⁿ i ê chèng-kiáⁿ, in-ūi Iok-sek sī i nî-lāu siⁿ-ê; i kā i chòe chı̍t niá chhái-sek ê saⁿ.

4

Iok-sek hiah ê hiaⁿ khòaⁿ-kìⁿ lāu-pē thiàⁿ Iok-sek, kè-thâu tī thiàⁿ in; chiū òan-hūn Iok-sek, bōe-ōe kap i kóng hô-bo̍k ê ōe.

5

Iok-sek bāng-kìⁿ chı̍t ê bāng, kā i hiah ê hiaⁿ kóng; in chiū koh-khah òan-hūn i.

6

Iok-sek tùi in kóng, Chhiáⁿ lín thiaⁿ góa só͘ bāng-kìⁿ ê bāng.

7

Lán tī hn̂g-nı̍h hâ gō͘-kak; góa só͘-hâ-ê khí-lâi khiā, lín só͘-hâ-ê ûi-lûi lâi pài góa só͘ hâ-ê.

8

I ê hiaⁿ ìn kóng, Chóng-bô lí chin-chiàⁿ beh chòe góan ê ông mah? chin-chiàⁿ beh kóan-hat góan mah? In chiū ūi-tio̍h i ê bāng, kap i ê ōe, koh-khah òan-hūn i.

9

Āu-lâi i koh bāng-kìⁿ chı̍t ê bāng, ia̍h kā i ê hiaⁿ kóng, Lí khòaⁿ, góa iū-koh bāng-kìⁿ chı̍t ê bāng; ū jı̍t, ge̍h, kap cha̍p-it lia̍p chhiⁿ teh pài góa.

10

Iok-sek kā i ê lāu-pē kap i ê hiaⁿ kóng; in lāu-pē chiū chek-pī i, kóng, Lí só͘ bāng-kìⁿ chit ê bāng sī cháiⁿ-iūⁿ? chóng-bô góa kap lín lāu-bú lín hiaⁿ-tī, lóng beh phak-teh pài lí mah?

11

I ê hiaⁿ lóng òan-tò͘ i; i ê lāu-pē ēng chiah ê ōe kì tī sim-lāi.

12

Iok-sek ê hiaⁿ khì Sī-kiàm, chhī lāu-pē ê iûⁿ.

13

Í-sek-lia̍t tùi Iok-sek kóng, Lín hiaⁿ kiám m̄-sī tī Sī-kiàm chhī iûⁿ mah? Lí lâi, góa beh chhe lí khì in hia.

14

I ìn kóng, Góa tī-chia. I kā i kóng, Lí khì khòaⁿ lín hiaⁿ ū pêng-an á-bô, iûⁿ-kûn ū pêng-an á-bô; tò-lâi kā góa kóng. Chiū chhe i chhut Hi-pek-lûn ê soaⁿ-kok; i chiū khì kàu Sī-kiàm.

15

Ū lâng tn̄g-tio̍h i tī soaⁿ-nı̍h bê-lō͘; chiū mn̄g i kóng, Lí teh chhē sím-mı̍h?

16

I kóng, Góa teh chhē góa ê hiaⁿ; chhiáⁿ kā góa kóng, in tī tah-lo̍h teh chhī iûⁿ.

17

Hit-lâng kóng, In í-keng lī-khui chia; in-ūi góa thiaⁿ-kìⁿ in teh kóng, Lán lâi-khì To-tan. Iok-sek chiū khì jip i ê hiaⁿ, tú-tio̍h in tī To-tan.

18

In hn̄g-hn̄g khòaⁿ-kìⁿ i, i iáu-bē kiâⁿ kàu in hia, in chiū saⁿ-kap kè-bô͘ beh hāi-sí i.

19

Tāi-ke saⁿ-kap kóng, Lí khòaⁿ, chòe-bāng-ê lâi-lah.

20

Hò͘-lâi, taⁿ lán kā i thâi-sí, hiat tī chı̍t ê ta-chíⁿ; chiah lâi kóng ū pháiⁿ-siù chia̍h-i; lán chiah khòaⁿ i ê bāng chiong-lâi cháiⁿ-iūⁿ.

21

Liû-piān thiaⁿ-kìⁿ, chiū kiù i thoat-lī in ê chhiú; kóng, Lán m̄-thang hāi i ê sìⁿ-miā.

22

Liû-piān koh tùi in kóng, M̄-thang hō͘ i lâu-huih; thang kā i hiat tī chit ê khòng-iá ê ta-chíⁿ, m̄-thang hē chhiú hāi i; ì-sù sī beh kiù i thoat-lī in ê chhiú, hō͘ i tò-khì i ê lāu-pē hia.

23

Iok-sek kàu i ê hiaⁿ hia, hit-tia̍p in chiū thǹg Iok-sek ê gōa-saⁿ, chiū-sī i seng-khu hit-niá chhái-sek ê saⁿ;

24

chiū lia̍h i, hiat-lo̍h chíⁿ, hit ê chíⁿ sī ta-ê, lāi-bīn bô chúi.

25

In chē-teh chia̍h-piáⁿ; kia̍h-ba̍k khòaⁿ, khòaⁿ-kìⁿ chı̍t-tīn Í-sı̍t-má-lī lâng tùi Ki-lia̍t lâi; ēng lo̍k-tô pē hiuⁿ-liāu, jú-hiuⁿ, bu̍t-io̍h, beh tòa lo̍h-khì Ai-kı̍p.

26

Iû-tāi tùi chiah ê hiaⁿ-tī kóng, Lán thâi-sí lán ê sió-tī, khǹg-ba̍t i ê huih, ū sím-mı̍h lī-ek?

27

Lán lâi kā i bōe hō͘ Í-sı̍t-má-lī lâng; m̄-thang hē-chhiú hāi i; in-ūi i sī lán ê sió-tī, lán ê kut-jio̍k. Hiaⁿ-tī thiaⁿ-i.

28

Ū hiah ê Bí-tiân ê seng-lí lâng tùi hia kè, i ê hiaⁿ chiū kā Iok-sek tùi chíⁿ-lāi pu̍ih-khí-lâi, chiong i bōe hō͘ Í-sı̍t-má-lī lâng, tit-tio̍h jī-cha̍p ê gûn. Hiah ê lâng chiū tòa Iok-sek khì Ai-kı̍p.

29

Liû-piān tò-tńg-lâi chíⁿ-piⁿ, khòaⁿ-kìⁿ Iok-sek bô tī chíⁿ-lāi, chiū thiah-lı̍h ka-kī ê saⁿ.

30

Tò-khì sió-tī hia, kóng, Gín-á bô-khì lah; iā góa nih, góa beh tah-lo̍h khì?

31

In chiū thâi chı̍t chiah soaⁿ-iûⁿ-káng, chiong Iok-sek hit niá saⁿ ùn-huih;

32

chiū chhe lâng the̍h hit niá chhái-sek ê saⁿ khì in lāu-pē hia, kóng, Góan chhē-tio̍h chit-niá, chhiáⁿ lí jīn-khòaⁿ sī lí ê kiáⁿ ê gōa-saⁿ á m̄-sī.

33

I jīn-tit, chiū kóng, Che sī góa ê kiáⁿ ê gōa-saⁿ, ū pháiⁿ-siù kā-chia̍h-i; Iok-sek tek-khak hō͘ i thiah-chhùi.

34

Ngá-kok chiū thiah-lı̍h saⁿ, io hâ môa-pò͘, ūi i ê kiáⁿ ai-siong chōe-chōe jı̍t.

35

I ê kiáⁿ kap i ê cha-bó͘-kiáⁿ lóng khí-lâi an-ùi i; i m̄-khéng siū an-ùi; kóng, Góa tek-khak ai-siong lo̍h im-hú, kàu góa ê kiáⁿ hia. I ê lāu-pē ūi-tio̍h i thî-khàu.

36

Bí-tiân lâng tòa Iok-sek kàu Ai-kı̍p, chiong i bōe hō͘ Hoat-ló ê jîn-sîn, sī-ōe-tiúⁿ, Pho-thê-hoat.