Chhòng-sè-kì 第 47 章 - 巴克禮全羅

1

Iok-sek jı̍p-khì kā Hoat-ló kóng, Góa ê lāu-pē kap góa ê hiaⁿ-tī tòa in ê iûⁿ-kûn, gû-kûn, kap it-chhè só͘-ū-ê, tùi Ka-lâm tōe lâi; taⁿ tī Ko-san ê tōe.

2

Iok-sek tùi i ê hiaⁿ-tī ê tiong-kan kéng gō͘ lâng, chhōa in khì kìⁿ Hoat-ló.

3

Hoat-ló mn̄g Iok-sek ê hiaⁿ-tī kóng, Lín chòe sím-mı̍h thâu-lō͘? In kā Hoat-ló kóng, Lí ê lô͘-po̍k pún-sin, kap góan ê chó͘-kong, lóng sī kò͘-iûⁿ ê lâng.

4

In koh kā Hoat-ló kóng, Ka-lâm tōe ki-hng chin siong-tiōng, lô͘-po̍k ê iûⁿ-kûn bô chháu thang chia̍h; só͘-í góan lâi, sī beh kià-kha tī-chia; taⁿ kiû lí iông-ún lí ê lô͘-po̍k tiàm tī Ko-san tōe.

5

Hoat-ló kā Iok-sek kóng, Lí ê lāu-pē kap lí ê hiaⁿ-tī lâi kàu lí chia;

6

Ai-kı̍p tōe lóng tī lí ê bīn-chêng; hō͘ lí ê lāu-pē kap lí ê hiaⁿ-tī tòa tī kok-lāi tē it hó ê tōe; in thang tòa tī Ko-san ê tōe; lí nā chai in tiong-kan khah ū pún-sū ê lâng, chiū phài in kóan-kò͘ góa ê cheng-siⁿ.

7

Iok-sek chhōa i ê lāu-pē Ngá-kok jı̍p-khì khiā tī Hoat-ló ê bīn-chêng; Ngá-kok chiū kā Hoat-ló chiok-hok.

8

Hoat-ló mn̄g Ngá-kok kóng, Lí it-seng ê nî-jı̍t sī jōa chōe ah?

9

Ngá-kok kā Hoat-ló kóng, góa kià-kha tī sè-kan ê nî-jı̍t sī chı̍t-pah saⁿ-cha̍p hè. Góa it-seng ê nî-jı̍t ia̍h chió, ia̍h kan-khó͘, m̄-ta̍t-tio̍h góa ê lia̍t-chó͘ kià-kha tī sè-kan ê nî-jı̍t.

10

Ngá-kok koh kā Hoat-ló chiok-hok; chiū tùi Hoat-ló ê bīn-chêng chhut-khì.

11

Iok-sek chiàu Hoat-ló ê bēng-lēng, chiong Ai-kı̍p kok tē-it hó ê tōe, chiū-sī Lân-sek ê tōe, hō͘ i ê lāu-pē kap i hiaⁿ-tī khiā-khí, chòe sán-gia̍p.

12

Iok-sek ēng bí-niû hōng-sêng i ê lāu-pē, kap i ê hiaⁿ-tī, kap i ê lāu-pē chôan-ke; lóng chiàu in ê lâng-gia̍h lâi kiong-kip in.

13

Ki-hng chin siong-tiōng, chôan-tōe lóng bô bí-niû; sīm-chì Ai-kı̍p tōe kap Ka-lâm tōe ê lâng, in-ūi ki-hng ê iân-kò͘, gō kàu hūn-khì.

14

Iok-sek chū-chı̍p Ai-kı̍p tōe kap Ka-lâm tōe só͘ ū ê gûn, chiū-sī in tia̍h bí-niû ê gûn; Iok-sek chiū chiong hiah ê gûn tòa kàu Hoat-ló ê keng.

15

Ai-kı̍p tōe kap Ka-lâm tōe ê gûn lóng ēng-liáu; Ai-kı̍p chèng-lâng lóng lâi kìⁿ Iok-sek kóng, Góan ê gûn lóng ēng-liáu lah, kiû lí hō͘ góan bí-niû; góan siáⁿ-sū tio̍h sí tī lí ê bīn-chêng?

16

Iok-sek kóng, Nā sī gûn ēng-liáu, lín ê cheng-siⁿ thang khan-lâi; góa ūi-tio̍h lín ê cheng-siⁿ beh hō͘ lín bí-niû.

17

In chiū chiong cheng-siⁿ kóaⁿ kàu Iok-sek hia; Iok-sek chiū ēng bí-niû ōaⁿ in ê bé, iûⁿ-kûn, gû-kûn, kap lû; hit-nî ūi-tio̍h ōaⁿ in it-chhè ê cheng-siⁿ, chiū ēng bí-niû iúⁿ-chhī in.

18

Hit-nî í-keng kè; tē-jī nî, in koh lâi kìⁿ Iok-sek, kā i kóng, Góan bōe môa-tit góa ê chú, góan ê gûn lóng ēng-liáu, cheng-siⁿ ia̍h lóng kui tī góa ê chú, góan tī góa ê chú ê bīn-chêng, tû góan ê sin-thé kap góan ê chhân-tōe í-gōa, bô chhun chı̍t-hāng.

19

góan siáⁿ-sū lâng sí, tōe pha-hng, tī lí ê ba̍k-chiu-chêng ah? kiû lí ēng bí-niû bóe góan kap góan ê tōe; góan kap góan ê tōe chòe Hoat-ló ê lō͘-ēng; koh ēng chéng-chí hō͘ góan, hō͘ góan tit-tio̍h o̍ah, bián sí, thó͘-tōe ia̍h bián pha-hng.

20

Tùi án-ni Iok-sek ūi Hoat-ló bóe Ai-kı̍p só͘ ū ê tōe; Ai-kı̍p lâng in-ūi hō͘ ki-hng só͘ pek, ta̍k-lâng lóng bōe i ê chhân-tōe; hiah ê tōe chiū lóng kui tī Hoat-ló.

21

Iok-sek chiàu chiah ê siâⁿ-ip chhian-sóa Ai-kı̍p ê peh-sìⁿ tùi Ai-kı̍p chit-pêng kàu tī hit-pêng.

22

To̍k-to̍k chè-si ê tōe Hoat-ló bô bóe-i; in-ūi chè-si ū tùi Hoat-ló tit-tio̍h tiāⁿ-tio̍h ê niû; in chia̍h Hoat-ló só͘ hō͘ in ê niû; só͘-í in bô bōe in ê tōe.

23

Iok-sek kā peh-sìⁿ kóng, Góa kin-á-jı̍t ūi Hoat-ló bóe lín kap lín ê tōe; khòaⁿ ah, tī-chia ū chéng-chí hō͘ lín, lín thang khì choh-chhân;

24

kàu siu-sêng ê sî, lín tio̍h chiong gō͘-hūn-chı̍t la̍p hō͘ Hoat-ló; sì-hūn kui lín, chòe chhân-nı̍h ê chéng-chí, ia̍h chòe lín kap lín ke-lāi lâng ê chia̍h-mı̍h, í-kı̍p lín ê gín-á ê chia̍h-mı̍h.

25

In kóng, Lí ū kiù góan ê sìⁿ-miā; gōan góan tī góa ê chú ê bīn-chêng tit-tio̍h un-tián, góan beh chòe Hoat-ló ê lô͘-po̍k.

26

Án-ni Iok-sek ūi Ai-kı̍p ê tōe, siat-lı̍p tiāⁿ-tio̍h ê lē, kàu tī kin-á-jı̍t; Hoat-ló tit-tio̍h gō͘-hūn ê chı̍t-hūn; to̍k-to̍k chè-si ê tōe bô kui Hoat-ló.

27

Í-sek-lia̍t lâng khiā-khí Ai-kı̍p kok, Ko-san ê tōe, in tī-hia kiàn-tì sán-gia̍p, koh siⁿ-thòaⁿ ke̍k-kî chōe.

28

Ngá-kok tiàm tī Ai-kı̍p tōe cha̍p-chhit nî. Ngá-kok it-seng ê nî-jı̍t sī chı̍t-pah sì-cha̍p-chhit hè.

29

Í-sek-lia̍t sí ê jı̍t kūn lah; i chiū kiò i ê kiáⁿ Iok-sek lâi, kā i kóng, Góa nā tī lí ê bīn-chêng tit-tio̍h un-tián, chhiáⁿ lí hē chhiú tī góa ê tōa-thúi-ē, ēng chû-ài kap sêng-sı̍t khóan-thāi góa; m̄-thang bâi-chòng góa tī Ai-kı̍p.

30

Góa kap góa ê pē-kong tâng-khùn ê sî, lí tio̍h chiong góa tòa chhut Ai-kı̍p, bâi-chòng tī in bâi-chòng ê tōe. Iok-sek kóng, Góa beh chiàu lí ê ōe lâi kiâⁿ.

31

Ngá-kok kóng, Lí tio̍h tùi góa chiù-chōa; i chiū tùi i chiù-chōa. Tùi án-ni Í-sek-lia̍t óa chhn̂g-thâu kèng-pài Siōng-tè.