Hi-pek-lâi 第 12 章 - 巴克禮全羅

1

Í-keng ū chòe kan-chèng ê kàu hiah chōe, chhin-chhiūⁿ hûn ûi lán, chiū tio̍h pàng-hē ta̍k hō ê tāng tàⁿ, kap khòai-khòai tîⁿ-pòaⁿ lán ê chōe, ēng thun-lún lâi cháu só͘ an-pâi tī lán thâu-chêng ê lō͘-chām,

2

tio̍h chù-sîn khòaⁿ Iâ-so͘, chiū-sī chòe sìn ê gôan-thâu kap chhiâⁿ-bé ê. I ūi-tio̍h só͘ an-pâi tī I thâu-chêng ê khòai-lo̍k, chiū bô iàu-kín lêng-jio̍k, jím-siū sı̍p-jī-kè, taⁿ chē tī Siōng-tè pó-chō ê tōa pêng.

3

I thun-lún pháiⁿ lâng chhin-chhiūⁿ án-ni hêng-ge̍k I, lín tio̍h siūⁿ I, bián-tit lín ê sim sit-chì lâi ià-siān.

4

Lín kap chōe-ok saⁿ tùi-te̍k, iáu-bē bat tí-tng kàu lâu huih;

5

koh lín bōe kì-tit hit-ê ēng lí-khì khǹg lín chhin-chhiūⁿ khǹg kiáⁿ ê ōe, kóng, Góa ê kiáⁿ ah, Chú ê kéng-kài bo̍h-tit khòaⁿ-khin, Hō͘ I chek-pī, bo̍h-tit sit-chì;

6

In-ūi Chú só͘ thiàⁿ ê, chiū kéng-kài i; Koh hōan só͘ chiap-la̍p ê kiáⁿ, chiū ēng piⁿ phah i. "

7

Lín teh thun-lún, sī chòe kéng-kài ê lō͘-ēng; Siōng-tè khóan-thāi lín chhin-chhiūⁿ kiáⁿ; thái-thó ū kiáⁿ bô hō͘ lāu-pē kéng-kài ah?

8

Chèng kiáⁿ só͘ ū hūn ê kéng-kài lín nā bô siū-tio̍h; chiū-sī thau-siⁿ-ê, m̄ sī kiáⁿ.

9

Koh lán bat ū jio̍k-thé ê pē kéng-kài lán, lán siōng-chhiáⁿ kèng-ùi i; hô-hòng lán ê sîn ê Pē, kiám m̄ koh khah tio̍h hâng-ho̍k I, lâi tit-tio̍h o̍ah mah?

10

In-ūi hiah-ê sī chiām-sî chhut-chāi ka-kī ê ì-sù lâi kéng-kài lán; to̍k-to̍k chit-ê sī ūi-tio̍h lán ê lī-ek, hō͘ lán ū hūn tī I ê sèng-kiat.

11

Kìⁿ-nā kéng-kài ê sū, tī tng-sî chiàu-khòaⁿ m̄ sī hoaⁿ-hí, sī iu-būn; nā-sī āu-lâi, chiū tī hiah-ê tùi kéng-kài lâi liān-ta̍t ê lâng, kiat pêng-an ê ké-chí, chiū-sī gī ê ké-chí.

12

Só͘-í kha sng chhiú nńg ê, lín tio̍h hō͘ i ióng-kiāⁿ;

13

ūi-tio̍h lín ê kha pī-pān tı̍t-tı̍t ê lō͘, bián-tit pái-kha ê lâng oai-chho̍ah, hóan-tńg hō͘ i tit-tio̍h i-hó.

14

Tio̍h tì-ì kap chèng lâng hô-bo̍k, í-kı̍p chiâⁿ-sèng, in-ūi nā m̄ sī sèng bô lâng ōe kìⁿ-tio̍h Chú;

15

ia̍h tio̍h kín-sīn, kiaⁿ-liáu ū lâng sit-lo̍h Siōng-tè ê un; kiaⁿ-liáu ū khó͘ ê kun hoat-siⁿ lâi kiáu-jiáu lín, tì-kàu chōe-chōe lâng bak lâ-sâm;

16

kiaⁿ-liáu ū îm-lōan ê, á-sī tîm-le̍k sè-chêng ê, chhin-chhiūⁿ Í-sò; i in-ūi chı̍t tǹg chia̍h bōe tōa kiáⁿ ê gia̍p.

17

In-ūi lín chai, i āu-lâi ài sêng-chiap chiok-hok ê sî, ū tú-tio̍h khì-sak, in-ūi i chhē bô hóan-hóe ê tōe-pō͘, sui-jiân lâu ba̍k-sái pek-chhiat kiû, ia̍h bōe tit-tio̍h.

18

Taⁿ lín só͘ kàu ê m̄ sī ōe bong-tit ū hé-iām ê soaⁿ, kap ba̍t hûn, o͘-àm, tōa hong,

19

hō-thâu ê im, giân-gú ê siaⁿ; thiaⁿ-kìⁿ ê lâng kiû bo̍h-tit koh kap in kóng;

20

in-ūi só͘ bēng-lēng ê, in tng bōe tiâu, sī kóng, Chiū nā cháu-siù óa-tio̍h soaⁿ, iā tio̍h ēng chio̍h-thâu tìm sí;

21

koh só͘ khòaⁿ-kìⁿ ke̍k-kî thang kiaⁿ, tì-kàu Mô͘-se kóng, Góa put-chí kiaⁿ kàu ngia̍uh-ngia̍uh-chhoah;

22

to̍k-to̍k lín só͘ kàu ê chiū-sī Sûn-soaⁿ, chin-o̍ah Siōng-tè ê siâⁿ, thiⁿ-téng ê Iâ-lō͘-sat-léng, bān-bān ê thiⁿ-sài,

23

hiah ê ū miâ kì tī thiⁿ-nı̍h ê tōa kiáⁿ ê chū-hōe kap kong-hōe, sím-phòaⁿ chèng lâng ê Siōng-tè, tit-tio̍h chiâu-chn̂g ê gī lâng ê lêng-hûn,

24

sin-iok ê tiong-pó Iâ-so͘, kap só͘ hiù ê huih, chit ê huih só͘ kóng ê pí A-pek khah hó.

25

Kín-sīn bo̍h-tit kū-cho̍at tùi lín kóng ê. In-ūi tī tōe-nı̍h lâi thôan bēng-lēng ê, nā kū-cho̍at i, siōng-chhiáⁿ bōe-ōe tô-siám, hô-hòng lán ûi-pōe tùi thiⁿ thôan bēng-lēng ê ah?

26

Tong-sî I ê siaⁿ hō͘ tōe tín-tāng; nā-sī taⁿ ū èng-ún kóng, Iáu ū chı̍t pái góa m̄ nā hō͘ tōe iô-choah, ia̍h beh hō͘ thiⁿ iô-choah.

27

Só͘ kóng, Iáu ū chı̍t pái, sī chí-bêng siū tín-tāng ê mı̍h, chiū-sī siū-chō ê mı̍h, beh tú-tio̍h chhian-sóa, hō͘ hiah ê bô siū tín-tāng ê tn̂g-tn̂g tī-teh.

28

Só͘-í lán tit-tio̍h bōe-ōe tín-tāng ê kok, tio̍h ū un-hūi, thang ēng khiân-sêng kèng-ùi lâi ho̍k-sāi hō͘ Siōng-tè hoaⁿ-hí;

29

in-ūi lán ê Siōng-tè chiū-sī iām-iām ê hé.