Hô-se-a 第 2 章 - 巴克禮全羅

1

Tio̍h tùi lín ê hiaⁿ-tī kóng, A-bí, koh tùi lín ê chí-bē kóng, Lō͘-hap-má.

2

Tio̍h kap lín lāu-bú piān-lūn, koh piān-lūn; in-ūi i m̄-sī Góa ê bó͘, Góa iā m̄-sī i ê tiōng-hu; kah i tû--khì bīn--nih ê îm-lōan, kap i heng-khám ê îm-hēng;

3

bián-tit Góa kā i thǹg kng-kng, hō͘ i chhin-chhiūⁿ tú-á chhut-sì ê jı̍t, hō͘ i chhin-chhiūⁿ khòng-iá, chhin-chhiūⁿ ta-sò ê tōe, hō͘ i tùi chhùi-ta lâi sí.

4

Góa bô beh lîn-bín i ê kiáⁿ, in-ūi in sī tùi îm-lōan siⁿ ê kiáⁿ.

5

In-ūi in ê lāu-bú kiâⁿ îm-lōan; hôai-īn--ê chòe-chhut kiàn-siàu sū; in-ūi i kóng, Góa beh tè góa só͘ lôan-ài ê lâng, góa ê piáⁿ, chúi, iûⁿ-mn̂g, môa, iû kap góa só͘ lim--ê, lóng sī in hō͘ góa.

6

Khòaⁿ ah, in-ūi án-ni, Góa beh ēng chhì-á chó͘-that i ê lō͘, choh-chhiûⁿ hō͘ i chhē-bô i ê lō͘.

7

I beh tui-jip só͘ lôan-ài ê lâng, nā-sī jip-bōe-tio̍h, i beh chhē in, chóng-sī chhē-bōe-tio̍h; chiū kóng, Góa beh tò-khì chhē góa ê pún-hu, in-ūi góa hit-sî ê kéng-hóng pí hiān-kim iáu khah-hó.

8

I m̄-chai i ê ngó͘-kok, chiú, iû, sī Góa hō͘ i; ke-thiⁿ i ê gûn kap kim--ê, iā sī Góa; i ēng chiah-ê ho̍k-sāi Pa-le̍k.

9

Só͘-í kàu siu-koah ê jı̍t, Góa beh chiong Góa ê ngó͘-kok tùi in the̍h tò-tńg; koh tī chhut-chiú ê sî, beh chiong Góa ê sin-chiú the̍h tò-tńg, iā beh chiong Góa hō͘ i thang jia chhiah-theh ê iûⁿ-mn̂g kap môa, chhiúⁿ tò-tńg.

10

Taⁿ Góa beh tī i só͘ lôan-ài ê lâng ê ba̍k-chiu-chêng, lō͘-chhut i ê îm-hēng; tek-khak bô lâng ōe kiù i thoat-lī Góa ê chhiú.

11

Góa beh soah in hiah ê iàn-lo̍k, choeh-iân, ge̍h ê chhoe-it, an-hioh-jı̍t, kap lóng-chóng ê choeh-kî.

12

Góa iā beh húi-hōai i ê phû-tô-chhiū, kap bû-hoa-kó chhiū, chiū-sī kóng, Che sī hiah-ê lôan-ài góa--ê hō͘ góa ê lé-sò͘; Góa beh hō͘ hiah-ê piàn-chòe chhiū-nâ, hō͘ iá-siù chia̍h--i.

13

I chêng-jı̍t sio-hiuⁿ ho̍k-sāi chiah ê Pa-le̍k, koh ēng hī-kau kap pa̍t-hō siú-sek ka-kī chng-thāⁿ, tè i saⁿ-lôan-ài ê lâng, lâi bōe-kì-tit Góa; in-ūi án-ni Góa beh pān--i. Che sī Iâ-hô-hoa kóng--ê.

14

Khòaⁿ ah, Góa beh chio-ho͘ i, chhōa i kàu khòng-iá, ēng ōe an-ùi i.

15

Góa iā beh tùi-hia siúⁿ-sù i phû-tô-hn̂g, koh siúⁿ-sù i A-kat ê soaⁿ-kok chòe ǹg-bāng ê mn̂g; i beh tī-hia ìn-siaⁿ, kap siàu-liân ê jı̍t bô koh-iūⁿ, kap tùi Ai-kı̍p tōe chiūⁿ-lâi ê jı̍t saⁿ-tâng.

16

Iâ-hô-hoa kóng, Tng hit-jı̍t lí beh kiò Góa kóng, Góa ê tiōng-hu ah, bô koh kiò Góa kóng, Góa ê Chú ah.

17

In-ūi Góa beh tùi in ê chhùi tû--khì chiah ê Pa-le̍k ê miâ, bô koh ēng chit ê miâ kì-liām i.

18

Tng hit-jı̍t Góa beh ūi-tio̍h in, kap chhân-iá ê cháu-siù, kap khong-tiong ê pe-chiáu, í-kı̍p tōe-chiūⁿ ê thâng-thōa lı̍p-iok; Góa iā beh tùi chit ê tōe-hng at-chı̍h keng, to, kau-chiàn, hō͘ in an-jiân tó-teh khùn.

19

Góa beh phèng-tiāⁿ lí éng-óan kui tī Góa, koh Góa beh ēng kong-gī, kong-pêng, chû-ài, lîn-bín, phèng-tiāⁿ lí kui Góa.

20

Góa iā beh ēng sêng-sı̍t phèng-tiāⁿ lí kui Góa, lí chiū beh bat Iâ-hô-hoa.

21

Iâ-hô-hoa kóng, Hit-jı̍t Góa beh ìn-tap, Góa beh ìn-tap thiⁿ, thiⁿ beh ìn-tap tōe;

22

tōe beh ìn-tap gō͘-kak, chiú, iû, chiah-ê beh ìn-tap Iâ-su-lia̍t.

23

Góa beh ūi ka-kī chai-chèng i tī chit ê tōe; pêng-sò͘ bô tit-tio̍h lîn-bín--ê, Góa beh lîn-bín--i; m̄-sī Góa ê peh-sìⁿ--ê, Góa beh tùi i kóng, Lí sī Góa ê peh-sìⁿ, i iā beh kóng, Lí sī góa ê Siōng-tè.