I-sài-a 第 16 章 - 巴克禮全羅

1

Lín tio̍h chiong iûⁿ-á hiàn hō͘ tōe-hng chiáng-kôan--ê, tùi Se-la̍h ǹg khòng-iá, sàng kàu Sek-an siâⁿ ê soaⁿ.

2

Mô͘-ap khiā-khí ê peh-sìⁿ tī A-lóan ê tō͘-thâu, chhin-chhiūⁿ sì-kòe pe ê chiáu, chhin-chhiūⁿ thiah-phòa ê chiáu-á-siū.

3

Lí tio̍h siat kè-bô͘, kiâⁿ kong-pêng, hō͘ lí ê iáⁿ tī tiong-tàu ê sî, chhin-chhiūⁿ o͘-àm mî; siū kóaⁿ-tio̍k ê lâng hō͘ i bih; tô-cháu ê peh-sìⁿ m̄-thang kā i lō͘-chhut.

4

Lí tio̍h iông-ún Góa chiah ê siū kóaⁿ-tio̍k ê lâng kap lí saⁿ-kap tiàm. Lūn-kàu Mô͘-ap, lí tio̍h chòe i siám-bih ê só͘-chāi, thoat-lī chân-hāi--ê ê bīn-chêng; in-ūi le̍k-sek lâng-ê kui tī bô, húi-bia̍t ê sū soah--khì, thún-ta̍h lâng--ê tùi kok-tiong tû-bia̍t.

5

Beh ū pó-chō in-ūi chû-ài lâi kiàn-siat, beh ū sêng-sı̍t--ê chē tī hit téng-bīn, tī Tāi-pı̍t ê pò͘-pîⁿ-lāi teh sím-phòaⁿ, kiû kong-pêng, kín-kín kiâⁿ kong-gī.

6

Góan thiaⁿ-kìⁿ Mô͘-ap lâng ê kiau-ngō͘, i kiau-ngō͘ kàu-ke̍k; i ê chū-ko, i ê kiau-ngō͘, i ê tōa siū-khì; phín-phóng ê ōe sī khang-khang.

7

Só͘-í Mô͘-ap beh ūi-tio̍h Mô͘-ap thî-khàu, lâng-lâng lóng beh thî-khàu; lín beh ūi-tio̍h Kiat-jíⁿ Hap-lia̍t-siat ê phû-tô-piáⁿ lâi thó͘-khùi, siū-phah chin siong-tiōng.

8

In-ūi Hi-sı̍t-pún ê chhân ta--khì; Se-pí-má ê phû-tô-chhiū ia̍h sī án-ni; lia̍t-kok ê chú at-chı̍h i tē-it hó ê ki, chiah ê ki chhun kàu Ngá-siā, thòaⁿ kàu khòng-iá; i ê ki chhun-chhut pôaⁿ-kè hái.

9

Só͘-í góa beh ūi-tio̍h Se-pí-má ê phû-tô-chhiū ai-khàu kap Ngá-siā lâng ê ai-khàu chı̍t-iūⁿ; Hi-sı̍t-pún, Í-lī-a-lī ah, góa beh ēng ba̍k-sái kòan-ak lí, in-ūi lín siu-sêng ké-chí kap gō͘-kak ê sî, hoah-hiàm ê siaⁿ hut-jiân kàu.

10

Tùi pûi ê chhân-tiong chhiúⁿ-khì hoaⁿ-hí khòai-lo̍k, tī phû-tô-hn̂g tek-khak bô chhiùⁿ-koa, ia̍h bô hoaⁿ-hí ê siaⁿ; ta̍h-chiú-ê tī chiú-khut-lāi bô ta̍h-chhut chiú; góa hō͘ i hoaⁿ-hí ê siaⁿ soah.

11

In-ūi án-ni, góa ê sim-pak ūi-tio̍h Mô͘-ap chhin-chhiūⁿ khîm chhut siaⁿ, góa ê sim-tn̂g ūi-tio̍h Kiat-jíⁿ Hap-lia̍t-siat ia̍h sī án-ni.

12

Mô͘-ap lâng tiâu-kìⁿ ê sî, tī kôaiⁿ ê só͘-chāi ià-siān, koh kàu i ê sèng-só͘ kî-tó, ia̍h bōe chiâⁿ.

13

Che sī Iâ-hô-hoa chêng lūn Mô͘-ap só͘ kóng ê ōe.

14

Chóng-sī hiān-chāi Iâ-hô-hoa ê ōe kóng, Saⁿ-nî-lāi, chiàu tn̂g-kang ê nî-hān, Mô͘-ap ê êng-kng kap i ê chèng-lâng beh tú-tio̍h lêng-jio̍k; só͘ chhun ê lâng chin-chió, bô chiūⁿ-sǹg.