I-sài-a 第 19 章 - 巴克禮全羅

1

Lūn Ai-kı̍p ê be̍k-sī. Khòaⁿ ah, Iâ-hô-hoa chē kín-kín ê hûn lîm-kàu Ai-kı̍p; Ai-kı̍p ê ngó͘-siōng tī I ê bīn-chêng ngia̍uh-ngia̍uh-chhoah; Ai-kı̍p lâng ê sim tī lāi-bīn siau-iûⁿ.

2

Góa beh kek-tōng Ai-kı̍p lâng kong-kek Ai-kı̍p lâng, hiaⁿ-tī kong-kek hiaⁿ-tī, chhù-piⁿ kong-kek chhù-piⁿ, siâⁿ kong-kek siâⁿ, kok kong-kek kok.

3

Ai-kı̍p lâng ê sim-sîn beh tī lāi-bīn sit-táⁿ; Góa beh pāi-hōai in ê kè-bô͘; in beh kiû ngó͘-siōng kap liām-chiù--ê, chòe tâng-ki ê, kiâⁿ siâ-su̍t ê.

4

Góa beh chiong Ai-kı̍p lâng kau tī chân-jím ê chú ê chhiú, kiông-pō ê ông beh kóan-hat in; che sī Chú bān-kun ê Iâ-hô-hoa kóng ê.

5

Hái-tiong ê chúi beh cho̍at-tn̄g, hô-chúi beh siau-bô ta--khì.

6

Kang-hô beh pìⁿ chhàu-bī, Ai-kı̍p ê hô-chúi beh kiám-chió, ta-la--khì; lô͘-úi kap lô͘-tek lóng ko͘-tâ.

7

Hô-piⁿ kap Hô(**hô)-kháu ê chháu-po͘, í-kı̍p Hô-piⁿ só͘ chai-chèng--ê lóng ko͘-tâ, siū sàu-tû bô--khì.

8

Thó-hî--ê beh thî-khàu, pàng-tiò tī Hô--nih-ê beh pi-siong; pha-bāng tī chúi--nih-ê beh soe-pāi.

9

Cheh iù-tōe ê, kap chit pe̍h-pò͘ ê, lóng beh kiàn-siàu.

10

Kok-ka ê thiāu-chio̍h beh tú-tio̍h phah-chhùi, só͘ ū ê chhiàⁿ-kang lâng sim beh hôan-ló.

11

Só-an ê siú-léng ke̍k-kî gû-gōng; Hoat-ló tōa tì-hūi ê bô͘-sū só͘ kè-e̍k--ê chiâⁿ-chòe gû-chhún. Lín thái-thó káⁿ tùi Hoat-ló kóng, Góa sī tì-hūi lâng ê kiáⁿ-sun, góa sī sian-ông ê kiáⁿ-sun?

12

Lí ê tì-hūi ê lâng tī toh-lo̍h? bān-kun ê Iâ-hô-hoa lūn Ai-kı̍p só͘ tiāⁿ-tio̍h ê chí-ì, in thang lâi chai, thang kā lí kóng lah.

13

Só-an ê siú-léng lóng pìⁿ-chòe gōng, Lô-hut ê siú-léng lóng siū bê-he̍k; Ai-kı̍p chi-phài chhù-kak-thâu ê chio̍h chhōa i ê peh-sìⁿ tī bê-lō͘.

14

Iâ-hô-hoa ēng kōai-biū ê sîn chham-jı̍p tī in tiong-kan, tì-kàu in chhōa Ai-kı̍p it-chhè só͘-kiâⁿ-ê lóng chha-chhok, chhin-chhiūⁿ chia̍h-chiú-chùi ê lâng áu-thò͘ ê sî, tang-tó sai-oai chı̍t-iūⁿ.

15

Ai-kı̍p ê tiong-kan, bô-lūn thâu kap bé, chang-ki kap lô͘-úi só͘ chòe ê kang, bô chı̍t-hāng ōe chiâⁿ.

16

Kàu hit-jı̍t Ai-kı̍p beh chhin-chhiūⁿ hū-jîn-lâng chı̍t-iūⁿ, koh beh kiaⁿ-hiâⁿ ngia̍uh-ngia̍uh-chhoah, in-ūi bān-kun ê Iâ-hô-hoa ê chhiú ê bú-lāng, chiū-sī I tī in ê téng-bīn só͘ bú-lāng ê.

17

Iû-tāi tōe beh chòe Ai-kı̍p só͘ kiaⁿ-hiâⁿ ê; kìⁿ-nā tùi i kóng-khí Iû-tāi tōe i chiū kiaⁿ-hiâⁿ; che sī bān-kun ê Iâ-hô-hoa tùi tī Ai-kı̍p só͘ tiāⁿ-tio̍h ê chí-ì.

18

Tng hit-jı̍t Ai-kı̍p tōe beh ū gō͘ ê siâⁿ kóng Ka-lâm ê khiuⁿ-kháu, koh kí bān-kun ê Iâ-hô-hoa lâi chiù-chōa; beh ū chı̍t-ê chheng-chòe bia̍t-bô ê siâⁿ.

19

Tng hit-jı̍t tī Ai-kı̍p tōe ê tiong-kan, beh ūi-tio̍h Iâ-hô-hoa khí chı̍t-chō-tôaⁿ; tī Ai-kı̍p ê pian-kài, beh ūi Iâ-hô-hoa khiā chı̍t-ki thiāu.

20

Che lóng beh tī Ai-kı̍p tōe ūi bān-kun ê Iâ-hô-hoa chòe kì-hō kap chèng-kù; Ai-kı̍p lâng in-ūi siū lâng ê chè-ap, ai-kiû Iâ-hô-hoa, I chiū chhe chı̍t-ūi chín-kiù--ê, chiū-sī ū châi-lêng--ê lâi chín-kiù in.

21

Iâ-hô-hoa beh hō͘ Ai-kı̍p lâng bat I; tī hit-jı̍t Ai-kı̍p lâng tek-khak bat Iâ-hô-hoa, ia̍h beh hiàn chè-mı̍h kap lé-mı̍h kèng-pài I; koh tùi Iâ-hô-hoa hē-gōan siā-gōan.

22

Iâ-hô-hoa beh phah Ai-kı̍p, ia̍h phah, ia̍h i-tī i; in beh kui-ǹg Iâ-hô-hoa, I beh thiaⁿ in ê kî-tó, lâi i-tī in.

23

Tng hit-jı̍t beh ū tōa-lō͘ tùi Ai-kı̍p thàu-kàu A-su̍t; A-su̍t lâng beh jı̍p Ai-kı̍p, Ai-kı̍p lâng ia̍h beh jı̍p A-su̍t; Ai-kı̍p lâng beh kap A-su̍t lâng saⁿ-kap ho̍k-sāi Iâ-hô-hoa.

24

Tng hit-jı̍t Í-sek-lia̍t beh kap Ai-kı̍p chham A-su̍t, saⁿ-ê pîⁿ-lia̍t, hō͘ tōe-chiūⁿ ê lâng tit-tio̍h hok-khì.

25

In-ūi bān-kun ê Iâ-hô-hoa sù-hok in, kóng, Ai-kı̍p Góa ê peh-sìⁿ, A-su̍t Góa ê chhiú só͘-chō-ê, Í-sek-lia̍t Góa ê sán-gia̍p, lóng ū hok-khì.