I-sài-a 第 38 章 - 巴克禮全羅

1

Hiah ê jı̍t ê tiong-kan, Hi-se-ka phòa-pīⁿ teh-beh sí. A-mô͘-su ê kiáⁿ, sian-ti Í-sài-a, khì kìⁿ i, tùi i kóng, Iâ-hô-hoa án-ni kóng, Lí tio̍h siat-hoat lí ê ke-sū, in-ūi lí teh-beh sí, bōe-o̍ah.

2

Hi-se-ka chiū o̍at-tńg bīn ǹg piah, kî-tó Iâ-hô-hoa, kóng,

3

Iâ-hô-hoa ah, kiû Lí kì-liām góa tī Lí ê bīn-chêng cháiⁿ-iūⁿ chûn ôan-chôan ê sim, chiàu sêng-sı̍t lâi kiâⁿ, koh chòe Lí só͘ khòaⁿ-chòe hó--ê. Hi-se-ka chiū tōa-siaⁿ thî-khàu.

4

Tùi án-ni Iâ-hô-hoa ê ōe lîm-kàu Í-sài-a kóng,

5

Lí khì kā Hi-se-ka kóng, Lí ê chó͘ Tāi-pı̍t ê Siōng-tè Iâ-hô-hoa án-ni kóng, Góa í-keng thiaⁿ-kìⁿ lí ê kî-tó, khòaⁿ-kìⁿ lí ê ba̍k-sái; khòaⁿ ah, Góa beh ke-thiⁿ lí ê hè-siū cha̍p-gō͘ nî.

6

Koh Góa beh kiù lí kap chit ê siâⁿ thoat-lī A-su̍t ông ê chhiú; ia̍h beh pó-hō͘ chit ê siâⁿ.

7

Iâ-hô-hoa beh chiâⁿ I só͘ kóng--ê, che sī Iâ-hô-hoa beh hō͘ lí ê tiāu-thâu;

8

khòaⁿ ah, A-hap-su ê jı̍t-kui tè-jı̍t chìn-chêng ê iáⁿ, Góa beh hō͘ i thè-āu cha̍p-tō͘. Tùi án-ni chìn-chêng ê jı̍t-iáⁿ, kó-jiân tī jı̍t-kui ê téng-bīn, thè-āu cha̍p-tō͘.

9

Iû-tāi ông Hi-se-ka phòa-pīⁿ í-keng hó, chiū chòe si, kóng:

10

Góa kóng, tú-tú tī góa tiong-liân ê jı̍t, beh jı̍p im-kan ê mn̂g;Bōe-tit-thang hióng-siū góa iáu chhun ê nî.

11

Góa kóng, Góa bōe kìⁿ--tio̍h Iâ-hô-hoa, chiū-sī tī o̍ah-lâng ê tōe, bōe kìⁿ-tio̍h Iâ-hô-hoa;Góa bōe-tit-thang kap tiàm tōe-chiūⁿ ê peh-sìⁿ saⁿ-kap khòaⁿ lâng ê bīn.

12

Góa khiā-khí ê só͘-chāi siū chhian-sóa lī-khui góa, chhin-chhiūⁿ kò͘-iûⁿ ê lâng ê pò͘-pîⁿ chı̍t-iūⁿ;Góa chiong sìⁿ-miā kńg--khí-lâi, chhin-chhiūⁿ chit-pò͘ ê lâng kńg-pò͘ chı̍t-iūⁿ; I beh chiong góa tùi pò͘-kui-thâu chián-tn̄g.Tùi chá-khí kàu ê-hng, Lí beh hō͘ góa kiat-kio̍k.

13

Góa hō͘ ka-kī an-chēng kàu thiⁿ-kng; I chhin-chhiūⁿ sai at-chı̍h góa it-chhè ê kut-thâu;Tùi chá-khí kàu ê-hng, Lí beh hō͘ góa kiat-kio̍k.

14

Góa chhin-chhiūⁿ ìⁿ-á, chhin-chhiūⁿ pe̍h-ho̍h, gí-bú gí-ngiáu; koh chhin-chhiūⁿ ka-chui ai-kiò;Góa in-ūi kia̍h-thâu khòaⁿ, ba̍k-chiu ian-n̄g.Iâ-hô-hoa ah, góa siū ap-chè, kiû Lí kā góa pó-jīn.

15

Góa beh kóng sím-mı̍h ah? I kā góa kóng--ê, ia̍h kā góa chiâⁿ--lah;Góa in-ūi sim-lāi ê khó͘-chhó͘, tī it-seng ê nî-jı̍t, beh ûn-ûn-á kiâⁿ.

16

Chú ah, lâng tit-tio̍h o̍ah sī chāi-tī chiah-ê,Góa ê sim-sîn o̍ah--teh, ia̍h lóng sī tùi án-ni;Só͘-í kiû Lí hō͘ góa koh-hó, iû-gôan o̍ah--teh.

17

Khòaⁿ ah, góa siū chin-tōa ê kan-khó͘, sī ūi-tio̍h beh hō͘ góa tit-tio̍h pêng-an;Lí in-ūi thiàⁿ góa ê lêng-hûn, chiū kiù góa thoat-lī bia̍t-bô ê khiⁿ;In-ūi Lí chiong góa it-chhè ê chōe, hiat tī Lí ê ka-chiah-āu.

18

In-ūi im-kan bōe-ōe kám-siā Lí, sí-bô bōe-ōe o-ló Lí;Lo̍h hûn-bōng ê lâng bōe-ōe ǹg-bāng Lí ê sêng-sı̍t.

19

Chí-ū o̍ah-lâng, o̍ah-lâng beh kám-siā Lí, chhin-chhiūⁿ góa kin-á-jı̍t kám-siā Lí chı̍t-iūⁿ;Chòe lāu-pē-ê beh hō͘ kiáⁿ-jî chai Lí ê sêng-sı̍t.

20

Iâ-hô-hoa piān-piān beh kiù góa, Só͘-í góan chāi-siⁿ ê jı̍t beh tī Iâ-hô-hoa ê chhù,Ēng si-hiân ê ga̍k-khì, chhiùⁿ góa ê si-koa.

21

Í-sài-a bat kóng, Tio̍h the̍h chı̍t tè bû-hoa-kó-piáⁿ, lâi tah tī lia̍p-á. Ông chiū tit-tio̍h hó.

22

Hi-se-ka iā bat kóng, Góa ōe chiūⁿ Iâ-hô-hoa ê chhù, ū sím-mı̍h tiāu-thâu?