I-sài-a 第 4 章 - 巴克禮全羅

1

Tī hit-jı̍t chhit ê hū-jîn-lâng beh khîⁿ chı̍t ê ta-po͘-lâng, kóng, Góan chia̍h ka-kī ê bí-niû, chhēng ka-kī ê i-chiûⁿ; to̍k-to̍k kiû lí chún góan kui tī lí ê miâ, lâi tû--khì góan ê kiàn-siàu.

2

Kàu hit-jı̍t Iâ-hô-hoa só͘ hoat-siⁿ ê íⁿ beh súi koh êng-kng; thó͘-tōe ê chhut-sán beh chòe Í-sek-lia̍t tô-thoat ê lâng ê êng-kng thé-biān.

3

Hōan-nā lâu tī Sek-an, chûn tī Iâ-lō͘-sat-léng, kì-chài tī Iâ-lō͘-sat-léng eng-kai tit-tio̍h o̍ah ê lâng lóng beh chheng-chòe sèng;

4

chiū-sī tī Chú ēng sím-phòaⁿ ê sîn, sio-húi ê sîn, sóe-tû Sek-an cha-bó͘-kiáⁿ ê ù-òe, chheng-khì Iâ-lō͘-sat-léng tiong thâi-lâng lâu-huih ê sî.

5

Iâ-hô-hoa beh tī Sek-an soaⁿ piàn-tōe kap i hiah ê hōe ê téng-bīn, jı̍t--sî khí hûn kap ian, mî--sî ū hé-iām ê kng; in-ūi tī lóng-chóng êng-kng ê téng-bīn, tek-khak ū jia-khàm.

6

Beh ū têng-á, jı̍t--sî thang chòe ìm-ńg lâi siám-pī jo̍ah, iā thang chòe tô-siám bih sin ê só͘-chāi, siám-pī kông-hong tōa-hō͘.