I-sài-a 第 47 章 - 巴克禮全羅

1

Pa-pí-lûn ê chāi-sek-lú ah, lo̍h--lâi chē tī tîn-ai; Ka-le̍k-tí ê cha-bó͘-gín-ná ah, bô chō-ūi, tio̍h chē tī thô͘-kha; in-ūi lí bô koh chheng chòe nńg-chiáⁿ iù-siù ê.

2

Tio̍h ēng chio̍h-bō(**bô) bō(**bô) be̍h; tû-khì lí ê phè, thǹg lí ê tn̂g-saⁿ, lō͘-hiān lí ê kha-thúi, liâu-kè khoe.

3

Lí ê ē-thé beh lō͘-hiān, lí ê kiàn-siàu beh hō͘ lâng khòaⁿ-kìⁿ; Góa beh pò-siû, bô khoan-iông chı̍t-lâng.

4

Kiù-sio̍k góan ê Chú, I ê miâ sī bān-kun ê Iâ-hô-hoa, sī Í-sek-lia̍t ê Sèng-ê.

5

Ka-le̍k-tí ê cha-bó͘-gín-ná ah, lí tio̍h chēng-chēng chē, jı̍p tī àm-tiong; in-ūi lí bô koh chheng chòe lia̍t-kok ê chú-bú.

6

Góa siū-khì Góa ê peh-sìⁿ, Góa hō͘ Góa ê sán-gia̍p siū lêng-jio̍k, chiong in kau tī lí ê chhiú; lí lóng bô lîn-bín in, chiong lí ke̍k-tāng ê taⁿ kòa tī lāu-lâng ê sin-chiūⁿ.

7

Lí ka-kī kóng, Góa beh éng-éng chòe chú-bú; só͘-í lí bô chiong chiah ê sū khòa tī sim--nih, ia̍h bô siūⁿ i ê kiat-kio̍k.

8

Lí chit-ê iàn-lo̍k, an-jiân chē-ê, taⁿ tio̍h thiaⁿ chit ê ōe, lí sim-lāi kóng, Chí-ū góa, góa í-gōa bô pa̍t-ê; góa tek-khak bô tì-kàu chiú-kóaⁿ, ia̍h bô tú-tio̍h sí-kiáⁿ ê sū.

9

Chóng-sī sí-kiáⁿ chiú-kóaⁿ chit nn̄g kiāⁿ sū, tī chı̍t-jı̍t ba̍k-nih-kú ê tiong-kan beh lîm-kàu lí; tī lí kiâⁿ chōe-chōe siâ-su̍t, tōa-tōa ūi-hû liām-chiù ê sî, chí(**chit) nn̄g hāng sū beh chôan-jiân lîm-kàu lí.

10

Lí pêng-sò͘ óa-khò lí ê pháiⁿ, kóng, Bô lâng khòaⁿ-kìⁿ góa; lí ê tì-hūi chhang-miâ bê-he̍k lí; koh lí sim-lāi kóng, Chí-ū góa, góa í-gōa bô pa̍t-ê.

11

In-ūi án-ni chai-ē beh lîm-kàu lí; lí m̄-chai tùi toh-lo̍h lâi; chai-hāi kàu-tī lí, lí ia̍h bōe-ōe tû-khì; só͘-í m̄-chai ê húi-bia̍t ia̍h beh hut-jiân lîm-kàu lí.

12

Tio̍h khí-lâi khiā, ēng lí ê siâ-su̍t kap lí chōe-chōe ê hû-chiù, chiū-sī tùi lí siàu-liân só͘ tio̍h-bôa ha̍k-sı̍p--ê, kiám-chhái ōe tit-tio̍h lī-ek, á-sī tit-tio̍h khah-iâⁿ.

13

Lí ê kè-e̍k thài-chōe, tì-kàu ià-siān; taⁿ hō͘ hiah-ê koan thiⁿ-siōng--ê, khòaⁿ chhiⁿ-sîn--ê, tī ge̍h-chhoe kóng chhàm-gú ê, lóng khí-lâi, kiù lí thoat-lī só͘ beh lîm-kàu lí ê sū.

14

Khòaⁿ ah, in beh chhin-chhiūⁿ chháu-á siū hé sio; bōe-ōe kiù ka-kī thoat-lī hé-iām ê la̍t; ia̍h bô hé-thòaⁿ thang hang-sio, ia̍h bô hé thang chē tī i ê bīn-chêng.

15

Lí só͘ tio̍h-bôa ha̍k-sı̍p ê sū tùi-tī lí lóng beh chhin-chhiūⁿ án-ni; tùi lí siàu-liân ê sî kap lí chòe seng-lí--ê ia̍h ta̍k-lâng tò-khì i ê pún só͘-chāi, bô lâng kiù lí.