I-sài-a 第 56 章 - 巴克禮全羅

1

Iâ-hô-hoa án-ni kóng, Lín tio̍h siú kong-pêng, kiâⁿ kong-gī; in-ūi Góa ê kiù-un í-keng kūn, Góa ê kong-gī beh hián-bêng.

2

Lâng án-ni kiâⁿ, sè-kan lâng án-ni chhî-siú i, siú an-hioh-jı̍t bô kan-hōan-tio̍h, kìm-chí ka-kī ê chhiú bô chòe pháiⁿ; hit-hō lâng ū hok-khì.

3

Kap Iâ-hô-hoa liân-ha̍p ê gōa-pang lâng bo̍h-tit kóng, Iâ-hô-hoa tek-khak chiong góa kap I ê peh-sìⁿ pun-lī; thài-kàm ia̍h bo̍h-tit kóng, Khòaⁿ ah, góa sī ko͘-tâ ê chhiū.

4

In-ūi lūn-kàu kìⁿ-nā siú Góa chiah ê an-hioh-jı̍t, kéng Góa só͘ hoaⁿ-hí ê sū, kap chhî-siú Góa ê iok ê thài-kàm, Iâ-hô-hoa án-ni kóng,

5

Chiah ê lâng, Góa beh hō͘ in tī Góa ê chhù, tī Góa ê chhiûⁿ-ûi-lāi, ū kì-hō ū miâ-jī, pí ū kiáⁿ cha-bó͘-kiáⁿ khah-hó; Góa beh hō͘ i éng-óan ê miâ bōe-ōe chián-tû.

6

Iáu-ū hiah-ê kap Iâ-hô-hoa liân-ha̍p ê gōa-pang lâng, beh ho̍k-sāi I, beh thiàⁿ Iâ-hô-hoa ê miâ, beh chòe I ê lô͘-po̍k, kìⁿ-nā siú an-hioh-jı̍t bô kan-hōan, koh chhî-siú Góa ê iok ê lâng;

7

Góa beh chhōa in kàu Góa ê sèng-soaⁿ, hō͘ in tī kî-tó Góa ê chhù lâi hoaⁿ-hí; in ê sio-chè kap lé-mı̍h, tī Góa ê tôaⁿ-téng, tek-khak tit-tio̍h chiap-la̍p; in-ūi Góa ê chhù beh chheng-chòe bān peh-sìⁿ kî-tó ê chhù.

8

Chú Iâ-hô-hoa, chiū-sī chio-chı̍p Í-sek-lia̍t siū kóaⁿ-sòaⁿ--ê, kóng, Hiah-ê siū chio-chı̍p ê lâng í-gōa, Góa iáu beh chio-chı̍p pa̍t-lâng lâi kui-óa i.

9

Soaⁿ-iá chiah ê siù lóng tio̍h lâi thun-chia̍h, chhiū-nâ-lāi chiah ê siù, ia̍h tio̍h án-ni.

10

I ê siú-bāng--ê sī chhiⁿ-mî, lóng bô tì-sek, lóng sī é-káu, bōe pūi ê káu, to̍k-to̍k bîn-bāng, tó-teh, ài khùn.

11

Chiah ê káu tham-chia̍h, m̄-chai pá; chiah ê bo̍k-chiá bōe-ōe bêng-pe̍k, ta̍k-lâng kiâⁿ ka-kī ê phian-lō͘, ta̍k-ê tùi kok hong-biān kiû ka-kī ê lī-ek.

12

In kóng, Lâi lah, góa khì phâng-chiú, lán lim kāu-chiú kàu-pá; bîn-á-jı̍t beh chhin-chhiūⁿ kin-á-jı̍t, ke̍k-tōa bô-pí.