I-sài-a 第 59 章 - 巴克禮全羅

1

Khòaⁿ ah, Iâ-hô-hoa ê chhiú m̄-sī té, bōe-ōe chín-kiù; hī-khang m̄-sī tāng, bōe-ōe thiaⁿ.

2

Chiū-sī lín ê chōe-kòa hō͘ lín kap Siōng-tè keh-tn̄g, lín ê chōe-ok hō͘ I tùi lín ng-bīn, bô thiaⁿ.

3

In-ūi lín ê chhiú bak--tio̍h huih, lín ê chńg-thâu-á bak-tio̍h chōe-ok, lín ê chhùi-tûn kóng pe̍h-chha̍t, lín ê chı̍h kóng-chhut pháiⁿ-ōe.

4

Bô lâng ēng kong-gī lâi pín-bêng, bô lâng chiàu sêng-sı̍t lâi piān-hō͘; lóng sī óa-khò hu-ké, kóng pe̍h-chha̍t; só͘ hôai-īn--ê sī chân-hāi, só͘ siⁿ--ê sī siâ-phiah.

5

In pū to̍k-chôa ê nn̄g, kiⁿ ti-tu bāng, lâng chia̍h i ê nn̄g tek-khak sí, chit ê nn̄g nā ta̍h-phòa tek-khak chhut ok-chôa.

6

In só͘ kiⁿ ê bāng bōe-ōe chiâⁿ-chòe i-ho̍k, in só͘-chòe--ê bōe-ōe ka-kī jia-khàm; in só͘-kiâⁿ--ê lóng sī chōe-ok, in ê chhiú só͘ chòe--ê lóng sī kiông-pō.

7

In ê kha cháu lâi kiâⁿ-pháiⁿ, in kín-kín beh lâu bô-chōe ê lâng ê huih; in ê liām-thâu lóng sī siâ-phiah ê liām-thâu; só͘ keng-kè ê tōa-lō͘, lóng sī pha-hng húi-bia̍t.

8

Pêng-an ê lō͘ in m̄-chai, só͘ kiâⁿ ê lō͘-kèng bô ū kong-pêng; in ūi-tio̍h pún-sin chō oan-khiau ê lō͘, kìⁿ-nā kiâⁿ-i--ê, lóng bōe hiáu-tit pêng-an.

9

In-ūi án-ni, kong-pêng lī-khui góan hn̄g-hn̄g, kong-gī tui góan bô-tio̍h; góan ǹg-bāng kng-liāng, hóan-tńg sī o͘-àm; ǹg-bāng kng-bêng, hóan-tńg kiâⁿ tī àm-tiong.

10

Góan bong chhiûⁿ, óa piah, chhin-chhiūⁿ chhiⁿ-mî lâng; góan sì-kòe bong, chhin-chhiūⁿ bô ba̍k-chiu ê lâng; góan jı̍t-tiong-tàu tian-tian tó-tó, chhin-chhiūⁿ hông-hun ê sî chı̍t-iūⁿ; góan tī ióng-chòng ê lâng ê tiong-kan; chhin-chhiūⁿ sí-lâng chı̍t-iūⁿ.

11

Góan háu chhin-chhiūⁿ hîm, ai-ai-chhan chhin-chhiūⁿ ka-chui; ǹg-bāng kong-pêng, chóng-sī lóng bô; ǹg-bāng kiù-un, chóng-sī lī-khui góan hn̄g-hn̄g.

12

Góan ê kè-sit tī Lí ê bīn-chêng ke-thiⁿ chōe-chōe, chōe-ok chòe kan-chèng kò góan; chōe-kòa kap góan saⁿ-kap tī-teh, lūn-kàu góan ê chōe-kòa, góan lóng chai;

13

chiū-sī pōe-ge̍k m̄-jīn Iâ-hô-hoa, oat-tò-tńg m̄-tè góan ê Siōng-tè, kóng-chhut chè-ap kap pōe-ge̍k ê ōe, sim siūⁿ pe̍h-chha̍t ōe, chiū sòa kóng-chhut.

14

Koh kong-pêng chóan-tńg thè-āu, kong-gī khiā tī hn̄g-hn̄g; sêng-sı̍t po̍ah-tó tī koe-lō͘, chèng-tı̍t ia̍h bōe chìn jı̍p.

15

Sêng-sı̍t chió-chió; lī-khui pháiⁿ--ê hóan-tńg chiâⁿ-chòe siū-chhiúⁿ ê mı̍h; hit-sî Iâ-hô-hoa khòaⁿ-kìⁿ, in-ūi bô kong-gī, chiū put-chí bô hoaⁿ-hí.

16

I khòaⁿ bô lâng chín-kiù, bô lâng thòe-kiû, put-chí gông-ngia̍h; chiū ēng ka-kī ê chhiú lâi kiù ka-kī; ēng I ê kong-gī hû-chhî pún-sin.

17

I ēng kong-gī chòe khoe-kah lâi chhēng, ēng chín-kiù chòe thâu-khoe lâi tì; ēng pò kiû-siû chòe i-ho̍k lâi chhēng, ēng jia̍t-sim chòe gōa-phàu lâi moa.

18

I beh chiàu in ê kiâⁿ-chòe lâi pò-èng, siū-khì I ê tùi-te̍k, pò-èng I ê kiû-siû; tùi chèng hái-sū kiâⁿ pò-èng.

19

Án-ni lâng tùi jı̍t-lo̍h ê só͘-chāi beh kèng-ùi Iâ-hô-hoa ê miâ; tùi jı̍t-chhut ê tōe-hng, ia̍h beh kèng-ùi I ê êng-kng; in-ūi I beh lâi, chhin-chhiūⁿ kín-lâu ê hô-chúi, sī Iâ-hô-hoa ê khì só͘ chhui-pek--ê.

20

Beh ū chı̍t-ūi kiù-sio̍k ê chú lâi kàu Sek-an, ia̍h kàu Ngá-kok cho̍k-tiong lī-khui kè-sit ê lâng hia; che sī Iâ-hô-hoa kóng--ê.

21

Iâ-hô-hoa kóng, Lūn-kàu Góa, Góa kap in só͘ lı̍p ê iok chiū-sī án-ni; Góa ê Sîn tī lí ê téng-bīn--ê, Góa ê ōe, Góa só͘ hē tī lí ê chhùi--ê, bô beh lī-khui lí ê chhùi, bô lī-khui lí ê kiáⁿ-sun ê chhùi, ia̍h bô lī-khui lí ê kiáⁿ-kiáⁿ sun-sun ê chhùi, tùi-taⁿ kàu éng-óan; che sī Iâ-hô-hoa kóng--ê.