I-sài-a 第 64 章 - 巴克禮全羅

1

Gōan Lí lı̍h-khui thiⁿ lâi kàng-lîm, hō͘ chiah ê soaⁿ tín-tāng tī Lí ê bīn-chêng,

2

(chhin-chhiūⁿ hé sio ta-chhâ, chhin-chhiūⁿ hé hō͘ chúi kún), hō͘ Lí ê tùi-te̍k chai Lí ê miâ, hō͘ lia̍t-kok tī Lí ê bīn-chêng ngia̍uh-ngia̍uh-chhoah.

3

Lí bat kiâⁿ thang kiaⁿ ê sū, góan só͘ bô phah-sǹg, hit-sî Lí kàng-lîm, chiah ê soaⁿ tín-tāng tī Lí ê bīn-chêng.

4

Tùi kó͘-chá í-lâi lâng bē-bat thiaⁿ-kìⁿ, hī-khang bē-bat thiaⁿ-kìⁿ, ba̍k-chiu bē-bat khòaⁿ-kìⁿ, tī Lí í-gōa ū sím-mı̍h Siōng-tè, ūi-tio̍h thèng-hāu i ê lâng kiâⁿ tāi-chì.

5

Lí ngiâ-chih hit-ê hoaⁿ-hí kiâⁿ-gī, kap kì-liām Lí ê tō-lō͘ ê lâng; khòaⁿ ah, Lí bat siū-khì, góan bat hōan-chōe, chhin-chhiūⁿ án-ni í-keng kú, góan iáu ōe tit-tio̍h kiù mah?

6

Góan lóng chhin-chhiūⁿ bô chheng-khì ê lâng, só͘-ū ê gī lóng chhin-chhiūⁿ ù-òe ê saⁿ; góan lóng chhin-chhiūⁿ chhiū-hio̍h chiām-chiām ta--khì; góan ê chōe-kòa chhin-chhiūⁿ hong kā góan chhe--khì.

7

Koh bô lâng kiû-kiò Lí ê miâ, bô lâng chhut-la̍t khîⁿ-tiâu Lí; in-ūi Lí ng-bīn m̄-khòaⁿ góan, hō͘ góan in-ūi góan ê chōe-kòa tì-kàu siau-bô.

8

Iâ-hô-hoa ah, taⁿ Lí iû-gôan sī góan ê pē; góan sī thô͘, Lí sī sio-hûi sai-hū, góan lóng sī Lí ê chhiú só͘-chō--ê.

9

Iâ-hô-hoa ah, Lí m̄-thang tōa siū-khì, ia̍h m̄-thang éng-óan kì-liām chōe-kòa; kiû Lí àⁿ-lo̍h lâi khòaⁿ, góan lóng sī Lí ê peh-sìⁿ.

10

Lí chiah ê sèng-siâⁿ pìⁿ-chòe khòng-iá, Sek-an pìⁿ-chòe khòng-iá; Iâ-lō͘-sat-léng chiâⁿ-chòe pha-hng.

11

Góan sèng koh súi ê chhù, chiū-sī góan ê lia̍t-chó͘ o-ló Lí ê só͘-chāi, hō͘ hé sio-lio--khì; góan só͘ him-bō͘--ê lóng hong-hòe.

12

Iâ-hô-hoa ah, ū chiah ê sū, Lí iáu jím-ōe-tiâu mah? Lí iáu chēng-chēng hō͘ góan chhim-chhim siū khó͘-lān mah?