Ngá-kok 第 4 章 - 巴克禮全羅

1

Lín tiong-kan chiah ê cheng-chiàn tùi tá-lo̍h lâi, chiah ê saⁿ-chiⁿ tùi tá-lo̍h lâi? Kiám m̄ sī tùi lín ê iàn-lo̍k, kau-chiàn tī lín pah-thé tiong ê, lâi mah?

2

Lín tham-lôan, iā bô só͘ ū; lín thâi lâng, òan-tò͘, iā bōe tit-tio̍h; lín saⁿ-chiⁿ cheng-chiàn; lín bô só͘ ū, in-ūi lín bô kiû.

3

lín kiû iā bô tit-tio̍h, in-ūi lām-sám kiû, sī beh khai-ēng i tī lín ê iàn-lo̍k.

4

Lín chiah ê îm-hū ah, kiám m̄ chai kap sè-kan chòe pêng-iú sī kap Siōng-tè chòe tùi-te̍k mah? Só͘-í kìⁿ-nā ài chòe sè-kan ê pêng-iú ê, chiū-sī chòe Siōng-tè ê tùi-te̍k.

5

Á-sī lín phah-sǹg sèng-keng sī khang-khang kóng mah? I só͘ siúⁿ-sù lán ê sîn, kiám lôan-bō͘ kàu tī òan-tò͘ mah?

6

Nā-sī I siúⁿ-sù khah tōa ê un. Só͘-í kóng, Siōng-tè tí-te̍k kiau-ngō͘ ê, siúⁿ-sù un hō͘ khiam-pi ê.

7

Só͘-í lín tio̍h sūn-ho̍k Siōng-tè; iā tio̍h tí-te̍k Mô͘-kúi, i chiū cháu-siám lín.

8

Chhin-kūn Siōng-tè, I chiū chhin-kūn lín. Lín hōan chōe ê, tio̍h sóe lín ê chhiú; nn̄g iūⁿ sim ê lâng, tio̍h chheng-khì lín ê sim.

9

Tio̍h iu-khó͘, ai-siong, thî-khàu; lín ê chhiò tio̍h ōaⁿ-chòe ai-siong, lín ê hoaⁿ-hí tio̍h ōaⁿ-chòe iu-būn.

10

Tio̍h ka-kī khiam-pi tī Chú ê bīn-chêng, I chiū beh ko-seng lín.

11

Hiaⁿ-tī ah, bo̍h-tit saⁿ húi-pòng; húi-pòng hiaⁿ-tī, á-sī phoe-phêng i ê hiaⁿ-tī ê, chiū-sī húi-pòng lu̍t-hoat, phoe-phêng lu̍t-hoat. Lí nā phoe-phêng lu̍t-hoat, chiū m̄ sī kiâⁿ lu̍t-hoat ê, chiū-sī chòe phoe-phêng ê.

12

Lı̍p-hoat ê, phoe-phêng ê, chí ū chı̍t-ê, I ōe kiù iā ōe bia̍t; lí sī sím-mı̍h lâng teh phoe-phêng chhù-piⁿ ah?

13

Taⁿ, lín teh kóng, Kin-á-jı̍t á-sī bîn-á-jı̍t, góan beh khì bó͘ ê siâⁿ, tòa tī hia chı̍t nî kú, chòe seng-lí thàn chîⁿ;

14

nā-sī bîn-á-jı̍t ê sū lín iáu m̄ chai. Lín ê o̍ah-miā sī cháiⁿ-iūⁿ? Lín sī hûn-bū chiām-sî chhut-hiān, āu-lâi chiū bô khòaⁿ-kìⁿ.

15

Lín khah hó tio̍h án-ni kóng, Chú nā gōan, góan chiū ōe o̍ah, iā beh chòe chit hāng hit hāng.

16

Taⁿ lín ēng chiah ê phín-phóng ê sū teh khoa-kháu; hōan-nā chit hō ê khoa-kháu, lóng sī pháiⁿ.

17

Só͘-í chai ū hó tio̍h kiâⁿ, iā m̄ kiâⁿ ê, chiū-sī i ê chōe.