Iâ-lī-bí 第 12 章 - 巴克禮全羅

1

Iâ-hô-hoa ah, góa kap Lí piān-lūn ê sî, Lí sī kong-gī; chóng-sī góa iáu ài kap Lí lí-lūn; pháiⁿ-lâng ê lō͘ ūi-hô heng-thong? tōa kiâⁿ khúi-chà--ê ūi-hô tit-tio̍h pêng-an?

2

Lí chai-pôe in, in ia̍h tèng kun, tōa-châng koh kiat ké-chí; chiàu in ê chhùi kóng, Lí sī kūn; chiàu in ê sim siūⁿ, Lí sī hn̄g.

3

Iâ-hô-hoa ah, Lí chai góa, Lí khòaⁿ-kìⁿ góa, chhì-giām góa ǹg Lí ê sim; kiû Lí chiong in thoa--chhut-lâi, chhin-chhiūⁿ beh thâi ê iûⁿ; hun-piat--i lâi thèng-hāu thâi ê jı̍t.

4

Chit ê tōe pi-ai, thong-kok ê chháu-chhài ko͘-tâ, beh kàu tī-sî ah? ūi-tio̍h khiā-khí hia ê peh-sìⁿ ê pháiⁿ, cheng-siⁿ pe-chiáu lóng bia̍t-bô; in-ūi in kóng, I bô khòaⁿ-kìⁿ góan ê kiat-kio̍k.

5

Iâ-hô-hoa kóng, Lí kap pō͘-kiâⁿ ê lâng saⁿ-kap cháu, siōng-chhiáⁿ ià-siān; thái-ōe kap bé tàu-pháu ah? lí tī pêng-an ê tōe, sui-jiân an-ún, tī Iok-tàn hô-piⁿ ê chhiū-nâ beh àn-cháiⁿ-iūⁿ?

6

In-ūi liân lí ê hiaⁿ-tī, liân lí ê lāu-pē ê ke, lóng ēng kan-chà khóan-thāi lí; in ia̍h tī lí ê āu-bīn tōa-siaⁿ kiò; sui-jiân tùi lí kóng hó-ōe, lí ia̍h bo̍h-tit sìn--in.

7

Góa lī-khui Góa ê chhù, pàng-sak Góa ê sán-gia̍p; chiong Góa ê sim só͘ thiàⁿ--ê, kau tī i ê tùi-te̍k ê chhiú.

8

Góa ê sán-gia̍p tùi Góa chhin-chhiūⁿ chhiū-nâ-lāi ê sai; i chhut-siaⁿ kong-kek Góa, in-ūi án-ni Góa òan-hūn i.

9

Góa ê sán-gia̍p tùi Góa kiám chhin-chhiūⁿ pan-tiám ê eng-chiáu mah? hiah ê eng-chiáu kiám tī i ê sì-ûi kong-kek i mah? lín tio̍h khì chū-chı̍p chhân-iá ê pah siù, hō͘ i lâi thun-chia̍h--i.

10

Chōe-chōe bo̍k-chiá húi-hōai Góa ê phû-tô-hn̂g, thún-ta̍h Góa ê hūn-gia̍h; hō͘ Góa hó-hó ê hūn-gia̍h pìⁿ-chòe pha-hng ê khòng-iá.

11

In hō͘ tōe pha-hng, tōe í-keng pha-hng, chiū tùi Góa pi-ai; chôan-tōe pha-hng, in-ūi bô lâng khòa-ì.

12

Chân-hāi--ê kàu khòng-iá-tiong it-chhè kng-khō-khō kôaiⁿ ê só͘-chāi; Iâ-hô-hoa ê to, tùi tōe ê chit-pêng kàu tōe ê hit-pêng, it-chīn châu-bia̍t; kìⁿ-ū hiat-khì--ê, lóng bô pêng-an.

13

In chèng be̍h, siu-sêng chhì-phè; lô-khó͘ ia̍h lóng bô lī-ek; in-ūi Iâ-hô-hoa ê tōa siū-khì, in beh ūi-tio̍h in ê thó͘-sán lâi kiàn-siàu.

14

Lūn-kàu it-chhè pháiⁿ chhù-piⁿ, chiū-sī hāi-tio̍h Góa só͘ hō͘ Góa ê peh-sìⁿ Í-sek-lia̍t sêng-chiap ê sán-gia̍p--ê, Iâ-hô-hoa ū án-ni kóng, Khòaⁿ ah, Góa beh chiong in pu̍ih-chhut in ê tōe; koh beh chiong Iû-tāi ke tùi in tiong-kan pu̍ih-chhut--lâi.

15

Góa pu̍ih-chhut in í-āu, Góa beh tò-tńg lâi lîn-bín in; chhōa in tò--lâi, ta̍k-lâng kui i ê pún-gia̍p, ta̍k-lâng kui i ê pún só͘-chāi.

16

In nā khéng un-khûn ha̍k-sı̍p Góa ê peh-sìⁿ ê tō-lō͘, kí Góa ê miâ chiù-chōa, kóng, Iâ-hô-hoa sī o̍ah--ê, chhin-chhiūⁿ in chêng kà-sī Góa ê peh-sìⁿ kí Pa-le̍k lâi chiù-chōa chı̍t-iūⁿ, in chiū beh tit-tio̍h kiàn-lı̍p tī Góa ê peh-sìⁿ ê tiong-kan.

17

In nā m̄ thiaⁿ, chiū Góa beh pu̍ih-chhut chit-kok, pu̍ih-chhut lâi bia̍t--i; che sī Iâ-hô-hoa kóng--ê.