Iâ-lī-bí 第 14 章 - 巴克禮全羅

1

Lūn-kàu khòng-hān ê sū, Iâ-hô-hoa ê ōe lîm-kàu Iâ-lī-bí.

2

Iû-tāi pi-ai, siâⁿ-mn̂g soe-pāi, lâng chhēng o͘-saⁿ chē tī thô͘-kha; Iâ-lō͘-sat-léng pi-ai ê siaⁿ thàu kàu téng-bīn.

3

In ê sè-ka chhe gín-ná-kang khì chhiūⁿ-chúi; in kàu chíⁿ--nih, chhē bô chúi; chiū tòa khang ê khì-kū tò--lâi; kiàn-siàu, làu-khùi, tà thâu-khak.

4

Choh-chhân lâng kiàn-siàu, tà thâu-khak; sī in-ūi bô lo̍h hō͘, thô͘(**thó͘)-tōe pit-lı̍h.

5

Chhân-iá ê lo̍k-bú siⁿ-kiáⁿ, chiū pàng hiat-ka̍k; in-ūi bô chháu.

6

Iá-lû khiā tī kng-khō-khō kôaiⁿ ê só͘-chāi, chhóan-khùi chhin-chhiūⁿ iá-káu; in-ūi bô chháu, ba̍k-chiu sit-bêng.

7

Iâ-hô-hoa ah, góan ê chōe-kòa sui-jiân chòe kan-chèng kò góan; iáu-kú kiû Lí ūi-tio̍h Lí ê miâ lâi chòe tāi-chì; góan ta̍uh-ta̍uh pōe-ge̍k, tek-chōe Lí.

8

Í-sek-lia̍t só͘ ǹg-bāng--ê, tī hōan-lān-tiong chòe Kiù-chú--ê ah, Lí siáⁿ-sū tī chit só͘-chāi chhin-chhiūⁿ kià-kha--ê, koh chhin-chhiūⁿ kè-lō͘ lâng o̍at--lâi hioh kè-mî ah?

9

Lí siáⁿ-sū chhin-chhiūⁿ gông-ngia̍h ê lâng, chhin-chhiūⁿ bōe-ōe kiù lâng ê ióng-sū ah? Iâ-hô-hoa ah, Lí iû-gôan tī góan tiong-kan; góan ia̍h chheng-chòe sio̍k Lí ê miâ ê lâng; m̄-thang pàng-sak góan.

10

Iâ-hô-hoa tùi chit ê peh-sìⁿ án-ni kóng, In ài hòng-tōng, bô iok-sok in ê kha; só͘-í Iâ-hô-hoa m̄ chiap-la̍p in, taⁿ beh kì-tit in ê chōe-kòa, pān in ê chōe-ok.

11

Iâ-hô-hoa koh tùi góa kóng, Bo̍h-tit ūi-tio̍h chit ê peh-sìⁿ kî-tó, kiû hok-khì.

12

In kìm-chia̍h ê sî, Góa m̄-thiaⁿ in ê kiû-kiò; in hiàn sio-chè kap lé-mı̍h, Góa ia̍h m̄ chiap-la̍p. Góa hóan-tńg beh ēng to-kiàm, ēng ki-hng, ēng un-e̍k lâi bia̍t in.

13

Góa chiū kóng, Hāi--ah, Chú Iâ-hô-hoa ah, khòaⁿ ah, hiah ê sian-ti tùi in kóng, Lín bōe khòaⁿ-kìⁿ to-kiàm, ia̍h bōe tú-tio̍h ki-hng; Iâ-hô-hoa beh tī chit ê tōe-hng siúⁿ-sù lín kú-tn̂g ê pêng-an.

14

Iâ-hô-hoa tùi góa kóng, Hiah ê sian-ti thok Góa ê miâ thôan pe̍h-chha̍t; Góa bô chhe in, bô hoan-hù in, ia̍h bô tùi in kóng; in thôan hō͘ lín--ê, sī hu-ké ê khé-sī, kap chiam-pok, kap bô-iáⁿ ê sū, í-kı̍p in ê sim ê khúi-chà.

15

Só͘-í Iâ-hô-hoa án-ni kóng, Lūn-kàu thok Góa ê miâ lâi thôan-pò͘ ê hiah ê sian-ti, Góa pēng-bô chhe in, in iáu-kú kóng, Chit ê tōe bōe-ōe tú-tio̍h to-kiàm, ki-hng; kî-sı̍t hiah ê sian-ti beh tùi to-kiàm ki-hng lâi bia̍t-bô.

16

Koh thiaⁿ in thôan-pò͘ ê peh-sìⁿ, beh in-ūi ki-hng to-kiàm siū hiat-ka̍k tī Iâ-lō͘-sat-léng ê koe-lō͘; in kap bó͘ kap kiáⁿ cha-bó͘-kiáⁿ, lóng bô lâng bâi-chòng; Góa beh chiong in ê pháiⁿ piàⁿ tī in ê sin-chiūⁿ.

17

Lí tio̍h chiong chit ê ōe kā in kóng, Gōan góa ê ba̍k-sái jı̍t-mî lâu bô soah; in-ūi góa ê peh-sìⁿ tú-tio̍h tōa húi-siong, phah kàu chin-thiám.

18

Góa nā chhut-khì chhân--nih, chiū khòaⁿ-kìⁿ ū hō͘ to thâi--ê; góa nā jı̍p siâⁿ, chiū khòaⁿ-kìⁿ ū tùi ki-hng lâi phòa-pīⁿ--ê; sian-ti kap chè-si tī kok-lāi sì-kòe kiâⁿ, ia̍h lóng bōe hiáu-tit.

19

Lí it-chīn khì-sak Iû-tāi mah? Lí ê sim iàm-ò͘ⁿ Sek-an mah? siáⁿ-sū phah góan, ia̍h bô thang tit-tio̍h i-hó? Góan ǹg-bāng pêng-an, ia̍h bô ū hok-khì; ǹg-bāng i-tī ê ki-hōe, bô phah-sǹg tú-tio̍h kiaⁿ-hiâⁿ.

20

Iâ-hô-hoa ah, góan jīn ka-kī ê chōe-ok, kap góan ê lia̍t-chó͘ ê chōe-kòa; in-ūi góan tek-chōe Lí.

21

Kiû Lí in-ūi Lí ê miâ ê iân-kò͘, bo̍h-tit iàm-ò͘ⁿ góan; bo̍h-tit lêng-jio̍k Lí êng-kng ê pó-chō; kiû Lí tui-liām, bo̍h-tit pōe Lí kap góan só͘ lı̍p ê iok.

22

Gōa-pang bô-iáⁿ-chiah ê sîn-bêng, ū chı̍t-ê ōe lo̍h-hō͘ mah? thiⁿ ōe ka-kī lo̍h tōa-hō͘ mah? Iâ-hô-hoa góan ê Siōng-tè ah, ōe án-ni--ê, kiám m̄-sī Lí mah? só͘-í góan iû-gôan beh thèng-hāu Lí; in-ūi che lóng sī Lí só͘ chòe--ê.