Iâ-lī-bí 第 16 章 - 巴克禮全羅

1

Iâ-hô-hoa ê ōe koh lîm-kàu góa kóng,

2

Lí tī chit só͘-chāi m̄-thang chhōa-bó͘, siⁿ kiáⁿ cha-bó͘-kiáⁿ.

3

In-ūi lūn-kàu chit só͘-chāi só͘ siⁿ ê kiáⁿ cha-bó͘-kiáⁿ, koh lūn-kàu chit ê kok-lāi siⁿ--in ê pē-bú, Iâ-hô-hoa án-ni kóng:

4

In beh tú-tio̍h tāng-pīⁿ lâi sí; bô lâng thî-khàu; bōe tit-tio̍h bâi-chòng; beh tī tōe-chiūⁿ chhin-chhiūⁿ pùn-sò; koh beh tùi to-kiàm, tùi ki-hng lâi bia̍t-bô; in ê sin-si beh hō͘ khong-tiong ê pe-chiáu, kap tōe-chiūⁿ ê iá-siù chòe chia̍h-mı̍h.

5

Iâ-hô-hoa án-ni kóng, Bo̍h-tit jı̍p song-sū ê ke, bo̍h-tit khì kā i thî-khàu, ia̍h bo̍h-tit ūi in pi-siong; in-ūi Góa chiong Góa ê pêng-an, chiū-sī un-tián kap lîn-bín, tùi chit ê peh-sìⁿ chhiúⁿ--khì; che sī Iâ-hô-hoa kóng--ê.

6

Tùi tōa kàu sòe, beh sí tī chit ê tōe-hng; bōe tit-tio̍h bâi-chòng; bô lâng ūi in thî-khàu, ia̍h bô lâng ūi in koah-bah, thì kng thâu.

7

In tú-tio̍h song-sū, bô lâng ūi in peh-piáⁿ, in-ūi sí-lâng lâi an-ùi in; in sí-pē sí-bú, ia̍h bô lâng ēng an-ùi ê poe hō͘ in lim.

8

Lí ia̍h m̄-thang jı̍p iàn-lo̍k ê ke, kap in chē-teh lim-chia̍h.

9

In-ūi bān-kun ê Iâ-hô-hoa, Í-sek-lia̍t ê Siōng-tè, án-ni kóng, Lín iáu o̍ah-teh ê jı̍t, tī lín ê ba̍k-chêng, Góa beh hō͘ hoaⁿ-hí ê siaⁿ, khòai-lo̍k ê siaⁿ, sin-kiáⁿ-sài ê siaⁿ, sin-niû ê siaⁿ tī chit só͘-chāi lóng soah.

10

Lí chiong chiah ê it-chhè ê ōe chí-sī chit ê peh-sìⁿ; in tùi lí kóng, Iâ-hô-hoa siáⁿ-sū kóng, Beh kàng-lo̍h chit ê tōa chai-ē kong-kek góan ah? góan ū sím-mı̍h chōe-kòa? góan ū sím-mı̍h chōe-kòa, tek-chōe góan ê Siōng-tè Iâ-hô-hoa ah?

11

Lí tio̍h kā in kóng, Iâ-hô-hoa kóng, In-ūi lín ê lia̍t-chó͘ pàng-sak Góa, khì thàn pa̍t-hō ê siōng-tè, ho̍k-sāi in, kūi-pài in;

12

koh pàng-sak Góa, bô siú Góa ê lu̍t-hoat; koh lín kiâⁿ-pháiⁿ, pí lín ê lia̍t-chó͘ khah-pháiⁿ; khòaⁿ ah, lín ta̍k-lâng thàn pháiⁿ-sim ê kong-ngī khì kiâⁿ; sīm-chì bô thiaⁿ-thàn Góa.

13

Só͘-í Góa beh kóaⁿ lín chhut chit só͘-chāi, kàu lín í-kı̍p lín ê lia̍t-chó͘ só͘ m̄-bat ê tōe; tī-hia lín beh jı̍t-mî ho̍k-sāi pa̍t-hō ê siōng-tè; tī-hia Góa bô beh si-un hō͘ lín.

14

Iâ-hô-hoa kóng, Khòaⁿ ah, jı̍t-chí beh kàu, lâng kí Iâ-hô-hoa ê éng-o̍ah lâi chiù-chōa, bô beh kóng, I sī chhōa Í-sek-lia̍t ê hō͘-è tùi Ai-kı̍p tōe chiūⁿ--lâi-ê;

15

in kí Iâ-hô-hoa ê éng-o̍ah lâi chiù-chōa, sī beh kóng, I chhōa Í-sek-lia̍t ê hō͘-è tùi pak-hng ê tōe, ia̍h tùi kìⁿ-nā I só͘ kóaⁿ in kàu ê tōe chiūⁿ--lâi; koh Góa beh chhōa in tò-lâi in ê tōe, chiū-sī Góa chêng só͘ siúⁿ-sù in ê lia̍t-chó͘--ê.

16

Iâ-hô-hoa kóng, Khòaⁿ ah, Góa beh tiàu chōe-chōe lia̍h-hî--ê lâi lia̍h in; jiân-āu Góa beh tiàu chōe-chōe phah-la̍h--ê, tùi chiah ê soaⁿ, chiah ê soaⁿ-thâu, chiah ê chio̍h-khang, lâi phah in.

17

In-ūi Góa ê ba̍k-chiu teh khòaⁿ in it-chhè ê kiâⁿ-chòe; in bô jia-khàm tī Góa ê bīn-chêng; in ê chōe-kòa ia̍h bô khǹg-ba̍t tī Góa ê ba̍k-chiu-chêng.

18

Góa beh tāi-seng ka-kī pò-èng in ê chōe-kòa kap chōe-ok; in-ūi in ēng thang iàm-chiān--ê ê sin-si phah lâ-sâm Góa ê thó͘-tōe; koh ēng in khó-ò͘ⁿ ê mı̍h chhiong-móa Góa ê sán-gia̍p.

19

Iâ-hô-hoa ah, Lí sī Góa ê khùi-la̍t, sī Góa ê ōe-só͘; tī khó͘-lān ê jı̍t, sī góa tô-siám ê só͘-chāi; lia̍t-kok ê lâng beh tùi tōe-ke̍k lâi lí chia, kóng, Ū-iáⁿ ah, góan ê lia̍t-chó͘ só͘ sêng-chiap-ê put-kò sī hu-ké, kî-tiong bô ū lī-ek--ê.

20

Lâng kiám thang ūi ka-kī chō siōng-tè mah? in sı̍t-chāi m̄-sī Siōng-tè.

21

Khòaⁿ ah, Góa chiong chí-chit-pái hō͘ in chai; Góa beh hō͘ in chai Góa ê chhiú-tōaⁿ kap Góa ê lêng-le̍k; in chiū beh chai Góa ê miâ sī Iâ-hô-hoa.