Iâ-lī-bí 第 18 章 - 巴克禮全羅

1

Iâ-hô-hoa ê ōe lîm-kàu Iâ-lī-bí kóng,

2

Lí khí--lâi, lo̍h--khì sio-hûi lâng ê chhù; Góa tī-hia beh hō͘ lí thiaⁿ Góa ê ōe.

3

Góa chiū lo̍h---khì sio-hûi lâng ê chhù; tú-tn̄g i ēng lûn teh tńg, chòe i ê kang.

4

Sio-hûi lâng ēng thô͘ chòe ê khì-kū, tī i ê chhiú nā pháiⁿ-khì, i chiū ēng hit tè thô͘ lēng-gōa chòe pa̍t-hō ê khì-kū; chiàu sio-hûi lâng só͘ khòaⁿ-chòe hó--ê lâi chòe--i.

5

Iâ-hô-hoa ê ōe chiū lîm-kàu góa kóng,

6

Iâ-hô-hoa kóng, Í-sek-lia̍t ke ah, Góa khóan-thāi lín kiám bōe-ōe chhin-chhiūⁿ chit ê sio-hûi lâng ê só͘-chòe mah? Í-sek-lia̍t ke ah, thô͘ tī sio-hûi lâng ê chhiú-tiong cháiⁿ-iūⁿ, lín tī Góa ê chhiú-tiong ia̍h sī án-ni.

7

Góa sím-mı̍h sî lūn-kàu chı̍t-cho̍k á-sī chı̍t-kok kóng, Góa beh kā i pu̍ih--khí-lâi, kā i thiah-húi, kā i húi-hōai;

8

Góa só͘ kóng ê hit-chı̍t-cho̍k, nā hóan-hóe lī-khui i ê pháiⁿ, Góa chiū beh thè-hóe só͘ siūⁿ beh kàng hō͘ in ê chai-ē.

9

Góa sím-mı̍h sî lūn-kàu chı̍t-cho̍k á-sī chı̍t-kok, kóng beh kiàn-lı̍p, beh chai-chèng;

10

in nā kiâⁿ Góa khòaⁿ-chòe pháiⁿ ê sū, m̄ thiaⁿ-thàn Góa ê ōe, Góa chiū beh thè-hóe Góa só͘ kóng beh hō͘ in ê hok-khì.

11

Taⁿ lí tio̍h kā Iû-tāi lâng kap khiā-khí Iâ-lō͘-sat-léng ê peh-sìⁿ kóng, Iâ-hô-hoa án-ni kóng, Góa pī-pān chai-ē kong-kek lín, ia̍h siat kè-bô͘ kong-kek lín; lín ta̍k-lâng tio̍h o̍at-thâu, lī-khui i ê pháiⁿ-lō͘, kóe-chiàⁿ lín ê só͘-kiâⁿ lín ê só͘-chòe.

12

Chóng-sī in kóng, Bô ǹg-bāng; góan beh chiàu ka-kī ê kè-bô͘ lâi kiâⁿ, ta̍k-lâng chiàu i pháiⁿ-sim ê kong-ngī lâi chòe.

13

Só͘-í Iâ-hô-hoa án-ni kóng, Lín tio̍h khì ta̍k-kok chhâ-mn̄g khòaⁿ chī-chūi thiaⁿ-kìⁿ chit-hō sū; Í-sek-lia̍t ê peh-sìⁿ ū kiâⁿ ke̍k thang iàm-ò͘ⁿ ê sū.

14

Lī-pa-lùn ê seh tùi chhân-iá ê chio̍h-pôaⁿ kiám ōe cho̍at-tn̄g mah? tùi hn̄g-hn̄g ê só͘-chāi lâu-lo̍h ê léng-chúi kiám ōe ta--khì mah?

15

In-ūi Góa ê peh-sìⁿ bōe-kì--tit Góa, ǹg hu-ké ê sîn sio-hiuⁿ; in hō͘ in tī só͘ kiâⁿ ê lō͘, tī kū ê lō͘ tak--tio̍h, hō͘ in kiâⁿ phian-lō͘, bô thūn-kôaiⁿ-ê;

16

tì-kàu in ê tōe chòe thang gông-ngia̍h, tn̂g-tn̂g hō͘ lâng thí-chhiò; kìⁿ-nā tùi-hia kè--ê beh gông-ngia̍h iô thâu.

17

Góa beh chhin-chhiūⁿ ēng tang-hong tī tùi-te̍k ê bīn-chêng kóaⁿ-sòaⁿ in; in tú-tio̍h hōan-lān ê jı̍t, Góa beh ēng ka-chiah ǹg in, bô beh ēng bīn.

18

In chiū kóng, Lâi--ah, lán lâi siat kè-bô͘ kong-kek Iâ-lī-bí; in-ūi chè-si ū lu̍t-hoat, tì-hūi ê lâng ū kè-e̍k, sian-ti ū chhàm-gú ê ōe, lóng bōe cho̍at-tn̄g. Lâi--ah, lán tio̍h ēng chı̍h tú-tak i, i ê ōe lóng m̄-bián thiaⁿ i.

19

Iâ-hô-hoa ah, kiû Lí tì-ì góa, iā thiaⁿ hiah ê kap góa cheng-piān ê lâng ê ōe.

20

Kiám thang ēng pháiⁿ pò hó mah? in-ūi in khui hām-khiⁿ beh hāi góa ê sìⁿ-miā. Kiû Lí kì--tit góa tī Lí ê bīn-chêng thòe in kiû hok-khì, hō͘ Lí ê tōa siū-khì tùi in o̍at-tò-tńg.

21

Gōan Lí chiong in ê kiáⁿ-jî kau hō͘ ki-hng, chiong in kau hō͘ to-kiàm; hō͘ in ê bó͘ bô kiáⁿ, chòe kóaⁿ-hū; hō͘ in ê ta-po͘-lâng hō͘ sí-bô só͘ bia̍t, in ê siàu-liân lâng tī chiàn-tīn hō͘ to thâi-sí.

22

Lí hō͘ kun-tūi hut-jiân lîm-kàu in ê sî, gōan tùi in ê chhù thiaⁿ-kìⁿ thî-khàu ê siaⁿ; in-ūi in ku̍t hām-khiⁿ beh lia̍h góa, siat lô-bāng beh pòaⁿ góa ê kha.

23

Iâ-hô-hoa ah, in beh hāi góa hiah ê kè-bô͘, Lí lóng chai; bo̍h-tit sià-bián in ê chōe-kòa; ia̍h bo̍h-tit tùi Lí ê bīn-chêng chhat-siau in ê chōe-ok; tio̍h hō͘ in tī Lí ê bīn-chêng po̍ah-tó; Lí siū-khì ê sî, tio̍h pān--in.