Iâ-lī-bí 第 26 章 - 巴克禮全羅

1

Iû-tāi ông Iok-se-a ê kiáⁿ Iok-ngá-kèng khí-thâu chē-ūi ê sî, ū chit ê ōe tùi Iâ-hô-hoa lâi, kóng, Iâ-hô-hoa án-ni kóng,

2

Lí tio̍h khiā tī Iâ-hô-hoa ê chhù ê īⁿ-lāi; ū Iû-tāi chiah ê siâⁿ lâi Iâ-hô-hoa ê chhù kèng-pài--ê; lí tio̍h ēng Góa lóng-chóng bēng-lēng lí tùi in kóng ê ōe, kā in kóng; m̄-thang chió chı̍t-kù.

3

Kiám-chhái in khéng thiaⁿ-thàn, ta̍k-lâng hôe-thâu lī-khui in ê pháiⁿ-lō͘; chiū Góa ūi-tio̍h in só͘ kiâⁿ ê pháiⁿ, siūⁿ beh kàng hō͘ in ê chai-ē, thang thè-hóe.

4

Lí tio̍h kā in kóng, Iâ-hô-hoa án-ni kóng, Lín nā m̄-khéng thiaⁿ Góa, lâi kiâⁿ Góa só͘ siat tī lín bīn-chêng ê lu̍t-hoat;

5

lâi thiaⁿ-thàn Góa só͘ chhe kàu lín hia Góa chiah ê lô͘-po̍k, chèng sian-ti ê ōe; chiū-sī Góa chá-chá khí--lâi só͘ chhe--ê, (chóng-sī lín bô thiaⁿ);

6

chiū Góa beh hō͘ chit keng chhù chhin-chhiūⁿ Sī-lô; hō͘ chit ê siâⁿ chòe tōe-chiūⁿ bān-kok chiù-chó͘ ê ōe-pìⁿ.

7

Iâ-lī-bí tī Iâ-hô-hoa ê chhù-lāi kóng chiah-ê ōe; chè-si, sian-ti, kap chèng peh-sìⁿ lóng ū thiaⁿ-kìⁿ.

8

Iâ-lī-bí chiong Iâ-hô-hoa hoan-hù i tùi chèng peh-sìⁿ kóng ê ōe, it-chīn kóng-liáu; chè-si, sian-ti, kap chèng peh-sìⁿ lóng lâi lia̍h--i, kóng, Lí tek-khak tio̍h sí.

9

Lí siáⁿ-sū thok Iâ-hô-hoa ê miâ lâi chhàm-gú, kóng, Chit keng chhù beh chhin-chhiūⁿ Sī-lô, chit ê siâⁿ beh pha-hng, bô lâng khiā-khí ah? Tùi án-ni chèng peh-sìⁿ lóng tī Iâ-hô-hoa ê chhù chū-chı̍p kàu Iâ-lī-bí hia.

10

Iû-tāi ê kùi-cho̍k thiaⁿ-kìⁿ chiah ê tāi-chì, chiū tùi ông-kiong chiūⁿ-kàu Iâ-hô-hoa ê chhù; chē tī Iâ-hô-hoa ê chhù sin-mn̂g ê mn̂g-kháu.

11

Chè-si, sian-ti, tùi kùi-cho̍k kap chèng peh-sìⁿ kóng, Chit lâng tio̍h gí i sí-chōe; in-ūi i ū chhàm-gú kong-kek chit ê siâⁿ; tú-tú chhin-chhiūⁿ lín chhin-hī só͘ thiaⁿ--ê.

12

Iâ-lī-bí chiū tùi chiah ê kùi-cho̍k kap chèng peh-sìⁿ kóng, Iâ-hô-hoa chhe góa chhàm-gú, kong-kek chit keng chhù, kap chit ê siâⁿ; kóng-khí lín só͘ ū thiaⁿ-kìⁿ chiah-ê it-chhè ê ōe.

13

Só͘-í lín taⁿ tio̍h kóe lín ê lō͘, kap lín ê só͘ chòe; thiaⁿ-thàn lín ê Siōng-tè Iâ-hô-hoa ê siaⁿ; Iâ-hô-hoa chiū beh thè-hóe I só͘ beh kàng hō͘ lín ê chai-ē.

14

Lūn-kàu góa, khòaⁿ ah, góa tī lín ê chhiú-thâu; lín khòaⁿ chòe hó, khòaⁿ chòe eng-kai--ê, chiū chiàu án-ni khóan-thāi góa.

15

Chóng-sī lín tio̍h khak-sı̍t chai; nā hāi-sí góa, chiū beh hō͘ bô-chōe ê huih kui tī lín, kap chit ê siâⁿ, kap kî-tiong khiā-khí ê peh-sìⁿ; in-ūi Iâ-hô-hoa sı̍t-chāi ū chhe góa kàu lín chia, chiong chiah-ê it-chhè ê ōe, thôan kàu lín ê hī-khang.

16

Kùi-cho̍k kap chèng peh-sìⁿ chiū kā chè-si sian-ti kóng, Chit-lâng m̄ eng-kai gí i sí-chōe; in-ūi i sī thok Iâ-hô-hoa, lán ê Siōng-tè ê miâ, lâi tùi lán kóng.

17

Kok-lāi ê lāu-tōa chiū ū kúi-nā lâng khí--lâi, tùi chū-hōe ê chèng peh-sìⁿ kóng,

18

Tng Iû-tāi ông Hi-se-ka ê jı̍t, ū Mô͘-lī-sa lâng, Bí-ka, tùi Iû-tāi ê chèng-lâng chhàm-gú, kóng, Bān-kun ê Iâ-hô-hoa án-ni kóng, Sek-an beh hō͘ lâng lôe chhin-chhiūⁿ chhân-hn̂g; Iâ-lō͘-sat-léng beh pìⁿ-chòe thô͘-tui; chit keng tiān ê soaⁿ beh chhin-chhiūⁿ chhiū-nâ kôaiⁿ ê só͘-chāi.

19

Iû-tāi ông Hi-se-ka kap chèng Iû-tāi lâng, kiám ū hō͘ i sí mah? Hi-se-ka kiám m̄-sī kèng-ùi Iâ-hô-hoa, khún-kiû Iâ-hô-hoa ê un; Iâ-hô-hoa chiū thè-hóe I só͘ kóng beh kàng hō͘ in ê chai-ē mah? Taⁿ nā hāi-sí chit-lâng, lán chiū-sī chòe tōa pháiⁿ, hāi ka-kī ê sìⁿ-miā.

20

Koh ū chı̍t-lâng thok Iâ-hô-hoa ê miâ lâi soan-thôan; sī Ki-lia̍t-iâ-lîm lâng Sī-má-ngá ê kiáⁿ Ou-lī-a; i chiàu Iâ-lī-bí it-chhè ê ōe lâi soan-thôan, kong-kek chit ê siâⁿ kap chit ê tōe.

21

Iok-ngá-kèng ông kap i ê chèng ióng-sū kùi-cho̍k thiaⁿ-kìⁿ i ê ōe, ông chiū siūⁿ beh hō͘ i sí; Ou-lī-a thiaⁿ-kìⁿ chiū kiaⁿ, cháu-khì Ai-kı̍p.

22

Iok-ngá-kèng ông chhe lâng khì Ai-kı̍p, chiū-sī A-kek-pho ê kiáⁿ Í-lī-ná-tan kap kúi-nā lâng kàu Ai-kı̍p.

23

In chiū tùi Ai-kı̍p lia̍h Ou-lī-a chhut--lâi, sàng kàu Iok-ngá-kèng ông hia; ông ēng to thâi i, hiat i ê sin-si tī pêng-siông lâng ê bōng.

24

Chóng-sī Sa-hoan ê kiáⁿ A-hi-kam pó-hō͘ Iâ-lī-bí, chiah bô kau tī peh-sìⁿ ê chhiú, hō͘ i sí.