Iâ-lī-bí 第 30 章 - 巴克禮全羅

1

Iâ-hô-hoa ê ōe lîm-kàu Iâ-lī-bí kóng,

2

Í-sek-lia̍t ê Siōng-tè Iâ-hô-hoa án-ni kóng, Kìⁿ-nā Góa só͘ bat kā lí kóng ê ōe, lóng tio̍h siá tī chheh--nih.

3

Iâ-hô-hoa kóng, Khòaⁿ ah, jı̍t-chí beh kàu, Góa beh hō͘ Góa ê peh-sìⁿ Í-sek-lia̍t kap Iû-tāi siū-lia̍h ê lâng tò-tńg--lâi; Góa ia̍h beh hō͘ in tò--lâi Góa só͘ siúⁿ-sù in ê lia̍t-chó͘ ê tōe; in chiū tit-tio̍h chit ê tōe chòe-gia̍p; che sī Iâ-hô-hoa kóng--ê.

4

Iâ-hô-hoa lūn-kàu Í-sek-lia̍t kap Iû-tāi ê ōe, kì tī ē-tóe.

5

Iâ-hô-hoa án-ni kóng, Góan ū thiaⁿ-kìⁿ ngia̍uh-ngia̍uh-chhoah, kiaⁿ-hiâⁿ, bô pêng-an ê siaⁿ.

6

Taⁿ lín tio̍h khì mn̄g-khòaⁿ ū ta-po͘-lâng siⁿ kiáⁿ bô; cháiⁿ-iūⁿ Góa khòaⁿ-kìⁿ lâng-lâng ēng chhiú jı̍h io, chhin-chhiūⁿ beh siⁿ-kiáⁿ ê hū-jîn-lâng, bīn lóng piàn chhiⁿ?

7

Chhám--ah, hit ê jı̍t sī tōa, bô thang pí-phēng; sī Ngá-kok tú-tio̍h hōan-lān ê kî-jı̍t; chóng-sī i beh tit-tio̍h kiù lâi thoat-chhut.

8

Bān-kun ê Iâ-hô-hoa án-ni kóng, Kàu hit-jı̍t, Góa beh tùi lí ê ām-kún at-chı̍h i ê taⁿ, chhoah-tn̄g pa̍k lí ê soh; gōa-pang lâng bô koh ēng i chòe chhe-ēng.

9

In sī beh ho̍k-sāi in ê Siōng-tè Iâ-hô-hoa, kap in ê ông Tāi-pı̍t, chiū-sī Góa beh kā in heng-khí--ê.

10

Iâ-hô-hoa kóng, Góa ê lô͘-po̍k Ngá-kok ah, án-ni lí bo̍h-tit kiaⁿ; Í-sek-lia̍t ah, bo̍h-tit kiaⁿ-hiâⁿ; in-ūi Góa beh tùi hn̄g ê só͘-chāi chín-kiù lí; ia̍h beh tùi siū-lia̍h--khì ê tōe chín-kiù lí ê hō͘-è; Ngá-kok beh tò--lâi tit-tio̍h an-chēng, pêng-an; bô lâng hō͘ i kiaⁿ.

11

In-ūi Góa kap lí tī-teh, lâi chín-kiù lí; ia̍h beh chiong Góa só͘ kóaⁿ lí kàu hiah ê kok it-chīn châu-bia̍t; chóng-sī bô it-chīn châu-bia̍t lí; beh chiàu só͘ ha̍p-gî--ê chek-pī lí; tòan-tòan bōe-ōe bô hêng-ho̍at lí; che sī Iâ-hô-hoa kóng--ê.

12

Iâ-hô-hoa án-ni kóng, Lí ê siong bōe i--tit, lí ê siong-hûn chin siong-tiōng.

13

Bô lâng thòe lí piān-hō͘, hō͘ lí ê siong-hûn tit-tio̍h pau; lí bô i-tī ê hó-io̍h.

14

Thiàⁿ lí ê lâng lóng bōe-kì-tit lí, bô lâi thàm lí; in-ūi lí ê chōe-kòa chin-tāng, chōe-ok chin-chōe; Góa ēng tùi-te̍k hit-khóan ê phah lâi phah lí; ia̍h ēng chân-jím--ê ê kéng-kài, lâi kéng-kài lí.

15

Lí siáⁿ-sū in-ūi lí ê siong lâi âu-kiò ah? lí ê thòng-khó͘ bōe i--tit; in-ūi lí ê chōe-kòa chin-tāng, chōe-ok chin-chōe; Góa só͘-í ēng chiah-ê khóan-thāi lí.

16

Só͘-í kìⁿ-nā thun-chia̍h lí ê, beh siū thun-chia̍h; lí ê tùi-te̍k, chı̍t-ê chı̍t-ê lóng hō͘ lâng lia̍h-khì; chhiúⁿ lí--ê, beh hō͘ lâng chhiúⁿ, kiap lí--ê, Góa beh hō͘ i siū kiap.

17

Iâ-hô-hoa kóng, Góa beh hō͘ lí ê sin-thé ho̍k-gôan, i-hó lí ê siong-hûn; in-ūi lâng lóng chheng lí chòe siū kóaⁿ-tio̍k--ê, kóng, Che sī Sek-an, bô lâng chhē-kìⁿ--ê.

18

Iâ-hô-hoa án-ni kóng, Khòaⁿ ah, Góa beh hō͘ Ngá-kok siū chhian-sóa ê pò͘-pîⁿ tò-tńg--lâi, ia̍h beh khó-lîn i khiā-khí ê só͘-chāi; siâⁿ beh khí tī gôan-kū ê chhiûⁿ-ki, ông-kiong ia̍h chiàu-kū ū lâng khiā-khí.

19

Beh ū kám-siā kap khòai-lo̍k--ê ê siaⁿ tùi in tiong-kan chhut--lâi; Góa iā beh hō͘ in ke-thiⁿ chōe-chōe, put-tì kiám-chió; hō͘ in chun-kùi, put-tì pi-bî.

20

In ê kiáⁿ-jî beh chhin-chhiūⁿ chá-jı̍t; in ê hōe-chiòng beh khiā-chāi tī Góa ê bīn-chêng; hōan-nā ap-chè in--ê, Góa beh pān i.

21

In ê kun-ông tek-khak sī sio̍k tī in--ê; chiáng-kóan in--ê, beh tùi in tiong-kan chhut; Góa beh hō͘ i kūn-óa, i ia̍h beh chhin-kūn Góa; nā m̄-sī án-ni, chī-chūi káⁿ hó-táⁿ chhin-kūn Góa; che sī Iâ-hô-hoa kóng--ê.

22

Lín beh chòe Góa ê peh-sìⁿ, Góa beh chòe lín ê Siōng-tè.

23

Khòaⁿ ah, Iâ-hô-hoa ê siū-khì chhin-chhiūⁿ tōa hong hoat-chhut; chiū-sī sàu-bia̍t ê tōa-hong, beh tńg-se̍h kong-kek pháiⁿ-lâng ê thâu-khak.

24

Iâ-hô-hoa ê sim só͘ gí-tiāⁿ--ê iáu-bē chòe, iáu-bē chiâⁿ ê tāi-seng, I ê tōa siū-khì tek-khak bô siu tò-tńg; jı̍t-āu lín beh bêng-pe̍k.