Iâ-lī-bí 第 33 章 - 巴克禮全羅

1

Iâ-lī-bí iáu-kú koaiⁿ tī khu-liû-só͘ ê īⁿ-lāi, Iâ-hô-hoa ê ōe tē-jī-pái lîm-kàu i kóng,

2

Kiâⁿ i--ê ê Iâ-hô-hoa, kè-e̍k lâi kiàn-lı̍p i--ê ê Iâ-hô-hoa sī I ê miâ, I án-ni kóng,

3

Lí kiû Góa, Góa chiū ìn lí, ia̍h chiong lí só͘ m̄-chai, tōa koh oh-tit ê sū, chí-sī lí.

4

Lūn-kàu chit ê siâⁿ-lāi ê chhù, kap Iû-tāi ông ê chhù, chiū-sī thiah-húi lâi tí-tng tùi-te̍k ê thô͘-tui, kap tí-tng to-kiàm--ê;

5

Í-sek-lia̍t ê Siōng-tè Iâ-hô-hoa án-ni kóng, Lâng beh lâi kap Ka-le̍k-tí lâng kau-chiàn, put-kò sī hō͘ sin-si chhiong-móa chiah ê chhù, chiū-sī Góa tī siū-khì kap tōa siū-khì ê tiong-kan só͘ thâi-sí ê lâng, in-ūi in it-chhè ê pháiⁿ, Góa chiū ng Góa ê bīn, m̄-khòaⁿ chit ê siâⁿ.

6

Khòaⁿ ah, Góa beh hō͘ i ê siong ho̍k-gôan, koh ēng hó-io̍h i-hó--i; koh chiong hong-sēng ê pêng-an kap sêng-sı̍t hián-bêng tī in.

7

Góa ia̍h beh hō͘ Iû-tāi siū-lia̍h--ê, kap Í-sek-lia̍t siū-lia̍h--ê, tò-tńg lâi; koh kiàn-lı̍p in chhin-chhiūⁿ khí-thâu.

8

Góa beh sóe-tû in it-chhè kan-hōan Góa ê chōe; Góa ia̍h beh sià-bián in it-chhè kan-hōan Góa, pōe-pōan Góa chiah ê chōe.

9

Chit ê siâⁿ beh tī bān-kok kā Góa chòe hoaⁿ-hí ê miâ, chòe o-ló, chòe êng-kng; in-ūi bān-kok thiaⁿ-kìⁿ Góa só͘ siúⁿ-sù tī in it-chhè ê hok-khì, iā ūi-tio̍h Góa só͘ siúⁿ-sù it-chhè ê hok-khì kap pêng-an, beh kiaⁿ-hiâⁿ ngia̍uh-ngia̍uh-chhoah.

10

Iâ-hô-hoa án-ni kóng, Lín lūn-kàu chit ê tōe-hng ū kóng, Sī pha-hng, bô lâng, bô cheng-siⁿ ê tōe-hng; chóng-sī tī chit só͘-chāi í-kı̍p pha-hng, bô lâng, bô jîn-ian, bô cheng-siⁿ ê Iû-tāi chiah ê siâⁿ, kap Iâ-lō͘-sat-léng ê koe-chhī,

11

beh koh thiaⁿ-kìⁿ ū hoaⁿ-hí ê siaⁿ, khòai-lo̍k ê siaⁿ, sin-kiáⁿ-sài ê siaⁿ, sin-niû ê siaⁿ; ia̍h ū lâng ê siaⁿ, chiū-sī hiah ê tòa siā-un ê chè kàu Iâ-hô-hoa ê chhù--ê, teh kóng, Tio̍h kám-siā bān-kun ê Iâ-hô-hoa, in-ūi Iâ-hô-hoa sī hó, I ê chû-ài éng-óan tī-teh; in-ūi Góa beh hō͘ chit só͘-chāi siū-lia̍h ê lâng tò-tńg--lâi, chhin-chhiūⁿ khí-thâu chı̍t-iūⁿ; che sī Iâ-hô-hoa kóng--ê.

12

Bān-kun ê Iâ-hô-hoa án-ni kóng, Tī chit ê pha-hng, bô lâng, bô cheng-siⁿ ê tōe-hng, kap kî-tiong só͘ ū ê siâⁿ, beh koh ū bo̍k-chiá khiā-khí, hō͘ in ê iûⁿ-kûn tó tī-hia.

13

Tī soaⁿ-tōe chiah ê siâⁿ, pîⁿ-iûⁿ chiah ê siâⁿ, lâm-hng chiah ê siâⁿ, Piān-ngá-bín, Iâ-lō͘-sat-léng ê chiu-ûi, kap Iû-tāi chiah ê siâⁿ, beh koh ū iûⁿ-kûn keng-kè sǹg ê lâng ê chhiú; che sī Iâ-hô-hoa kóng--ê.

14

Iâ-hô-hoa kóng, Khòaⁿ ah, jı̍t-chí beh kàu, Góa èng-ún Í-sek-lia̍t-ke kap Iû-tāi-ke ê hó-ōe, Góa beh hō͘ i chiâⁿ.

15

Tng hit-jı̍t hit-sî Góa beh kā Tāi-pı̍t hoat-siⁿ gī ê Ki, I beh tī tōe-chiūⁿ kiâⁿ kong-pêng kap kong-gī.

16

Tī hit-jı̍t Iû-tāi beh tit-tio̍h kiù, Iâ-lō͘-sat-léng beh an-jiân khiā-khí; i ê miâ beh chheng-chòe, Iâ-hô-hoa lán ê gī.

17

In-ūi Iâ-hô-hoa án-ni kóng, Tāi-pı̍t beh éng-óan ū lâng chē Í-sek-lia̍t ê pó-chō.

18

Chè-si, Lī-bī lâng, ia̍h éng-óan ū lâng hiàn sio-chè lé-mı̍h; siông-siông pān-lí hiàn-chè ê sū tī Góa ê bīn-chêng.

19

Iâ-hô-hoa ê ōe lîm-kàu Iâ-lī-bí kóng,

20

Iâ-hô-hoa án-ni kóng, Lín nā ōe hòe-bô Góa só͘ lı̍p jı̍t--sî ê iok, mî--sî ê iok, hō͘ jı̍t-mî bô chiàu in ê sî;

21

chiū ōe hòe-bô Góa kap Góa ê lô͘-po̍k Tāi-pı̍t só͘ lı̍p ê iok, hō͘ i bô ū kiáⁿ tī i ê pó-chō chòe ông; ia̍h ōe hòe-bô Góa kap ho̍k-sāi Góa ê chè-si Lī-bī lâng só͘ lı̍p ê iok.

22

Thiⁿ ê siōng bōe sǹg--tit, hái ê soa bōe niû--tit, Góa beh chiàu án-ni hō͘ Góa ê lô͘-po̍k Tāi-pı̍t ê hō͘-è, kap ho̍k-sāi Góa ê Lī-bī lâng, ke-thiⁿ chōe-chōe.

23

Iâ-hô-hoa ê ōe koh lîm-kàu Iâ-lī-bí kóng,

24

Chiah ê peh-sìⁿ só͘ kóng ê ōe, lí bô thiaⁿ-kìⁿ mah? in kóng, Iâ-hô-hoa só͘ kéng ê nn̄g-cho̍k, I í-keng khì-cho̍at--i, in án-ni khòaⁿ-khin Góa ê peh-sìⁿ, lia̍h-chòe bōe koh chiâⁿ kok tī in ê bīn-chêng.

25

Iâ-hô-hoa án-ni kóng, Góa só͘ lı̍p jı̍t--sî mî--sî ê iok nā ōe bô--khì, Góa nā bô siat thiⁿ-tōe ê tēng-lē;

26

Góa chiū ōe khì-sak Ngá-kok kap Góa ê lô͘-po̍k Tāi-pı̍t ê hō͘-è tì-kàu bô tùi i ê hō͘-è chhú lâng tī-lí A-pek-la̍h-hán, Í-sat, Ngá-kok ê hō͘-è. In-ūi Góa beh hō͘ in siū-lia̍h ê lâng tò-lâi, ia̍h beh lîn-bín in.