Iâ-lī-bí 第 5 章 - 巴克禮全羅

1

Lín tio̍h cháu-lâi cháu-khì tī Iâ-lō͘-sat-léng ê koe-lō͘ lâi khòaⁿ lâi thàm-thiaⁿ, tī i ê khoan-khoah ê só͘-chāi lâi chhē, khòaⁿ ōe tú-tio̍h chı̍t-lâng, á-sī ū lâng kiâⁿ kong-gī, kiû sêng-sı̍t; Góa chiū beh sià-bián chit ê siâⁿ.

2

In sui-jiân kóng, Iâ-hô-hoa sī o̍ah--ê, in só͘ chiù ê chōa sı̍t-chāi sī ké.

3

Iâ-hô-hoa ah, Lí ê ba̍k-chiu kiám-m̄-sī ǹg sêng-sı̍t mah? Lí phah in, in iā bô iu-siong; Lí húi-bia̍t in, in m̄-khéng siū kàu-tok; in hō͘ in ê bīn pí chio̍h khah-tēng, m̄-khéng hôe-thâu.

4

Góa chiū kóng, Chiah ê lâng sı̍t-chāi sī sòng-hiong, sī gû-gōng, in-ūi m̄-bat Iâ-hô-hoa ê lō͘, kap in ê Siōng-tè ê hoat-tō͘;

5

góa beh khì kìⁿ in ê sè-ka, kap in kóng-ōe; in-ūi in bat Iâ-hô-hoa ê lō͘, kap in ê Siōng-tè ê hoat-tō͘. Nā-sī in tâng-sim at-chı̍h taⁿ, phah-tn̄g pa̍k i ê soh.

6

Só͘-í chhiū-nâ ê sai beh chhut-lâi kā-sí in; ê-hng-sî ê chhâi-lông beh thun-chia̍h in, pà beh tī chiah ê siâⁿ-gōa tng-tán in, kìⁿ-nā chhut-siâⁿ-ê tek-khak hō͘ in thiah-chhùi, in-ūi in ê chōe-kòa chin-chōe, pōe-ge̍k ná siong-tiōng.

7

Che Góa thái ōe sià-bián lí ah? lí ê kiáⁿ-jî lī-khui Góa, koh kí chiah ê m̄-sī Siōng-tè--ê lâi chiù-chōa; Góa hō͘ in pá-chiok, in chiū kiâⁿ kan-îm, kui-tīn chū-chı̍p tī chhiong-ki ê chhù.

8

In chhin-chhiūⁿ chhī-pá ê bé sì-kòe pháu; ta̍k-ê ǹg i chhù-piⁿ ê bó͘ chhin-chhiūⁿ bé ki-ki-háu.

9

Iâ-hô-hoa kóng, Góa kiám bô in-ūi chiah ê sū lâi pān in mah? Góa ê sim kiám bô beh tùi chit hō ê kok-bîn lâi pò-siû mah?

10

Lín tio̍h chiūⁿ i ê phû-tô-hn̂g ê chhiûⁿ lâi húi-hōai i, chóng-sī m̄-thang húi kàu-liáu; tio̍h tû--khì i ê ki, in-ūi in bô sio̍k tī Iâ-hô-hoa.

11

In-ūi Í-sek-lia̍t ke kap Iû-tāi ke tōa-tōa kiâⁿ khúi-chà, kong-kek Góa; che sī Iâ-hô-hoa kóng ê.

12

In m̄-jīn Iâ-hô-hoa, chiū kóng, Che pēng m̄-sī I; chai-ē bô beh lîm-kàu góan; to-kiàm kap ki-hng góan iā bōe-ōe tú-tio̍h.

13

Sian-ti ê ōe beh chiâⁿ-chòe hong, Chú ê ōe bô tī in ê sim; beh chiàu án-ni hō͘ in tú-tio̍h.

14

Só͘-í bān-kun ê Siōng-tè Iâ-hô-hoa kóng, In-ūi lín kóng chit ê ōe; khòaⁿ ah, Góa beh hō͘ Góa ê ōe tī lí ê chhùi chòe hé, hō͘ chit ê peh-sìⁿ chòe chhâ, chit ê hé beh sio-bia̍t in.

15

Iâ-hô-hoa kóng, Í-sek-lia̍t ê ke ah, lí khòaⁿ, Góa beh hō͘ chı̍t-kok tùi hn̄g-hn̄g lâi kong-kek lín, chiū-sī kiông ê kok, tùi kó͘-chá chiū ū ê kok, i ê giân-gú lí bōe hiáu-tit, iā bōe bêng-pe̍k i só͘ kóng--ê.

16

In ê chìⁿ-tē sī khui-khui ê bōng; in lóng sī ióng-sū.

17

In beh chia̍h-liáu lí ê gō͘-kak kap lí ê bí-niû, chiū-sī lí ê kiáⁿ cha-bó͘-kiáⁿ só͘ tio̍h chia̍h ê; iā beh chia̍h-liáu lí ê iûⁿ-kûn, gû-kûn; chia̍h-liáu lí ê phû-tô kap bû-hoa-kó; koh beh ēng to húi-hōai lí só͘ óa-khò kian-kò͘ ê siâⁿ.

18

Iâ-hô-hoa kóng, Chiū-nā kàu hit-sî Góa iā bô beh it-chīn châu-bia̍t lín.

19

Hit-sî lín nā kóng, Iâ-hô-hoa góan ê Siōng-tè ūi-tio̍h siáⁿ-sū tùi góan kiâⁿ che it-chhè ê sū ah? lí tio̍h ìn i kóng, Chhin-chhiūⁿ lín í-keng pàng-sak Góa, ho̍k-sāi pa̍t-hō ê siōng-tè tī lín ê tōe-hng, án-ni lín iā beh ho̍k-sāi gōa-pang lâng tī bô sio̍k lín ê tōe-hng.

20

Lín tio̍h thôan tī Ngá-kok ke, pò tī Iû-tāi kóng,

21

Gōng-gōng bû-ti ê peh-sìⁿ ah, lín ū ba̍k-chiu bōe khòaⁿ, ū hī-khang bōe thiaⁿ, taⁿ tio̍h thiaⁿ chit ê ōe;

22

Iâ-hô-hoa kóng, Lín m̄ kiaⁿ Góa mah? bô ngia̍uh-ngia̍uh-chhoah tī Góa ê bīn-chêng mah? Góa siat éng-óan ê lē, ēng soa chòe hái ê kài-hān, i bōe pôaⁿ-kè; i ê éng sui-jiân giâ kôaiⁿ, iā bōe-ōe iâⁿ; sui-jiân hōa-hōa-háu, iā bōe-ōe pôaⁿ-kè.

23

To̍k-to̍k chit ê peh-sìⁿ ū hóan-pōan pōe-ge̍k ê sim; in pōe-ge̍k Góa chòe in khì.

24

In sim-lāi iā bô kóng, Taⁿ lán tio̍h kèng-ùi Iâ-hô-hoa lán ê Siōng-tè, I chiàu-sî siúⁿ-sù hō͘-chúi, chiū-sī chêng ê hō͘; āu ê hō͘; I iā ū tēng chiah ê siu-sêng ê sî-kî, lâu-teh hō͘ lán.

25

Lín ê chōe-gia̍t hō͘ chiah ê sū hóan-tńg lī-khui lín; lín ê chōe-ok hō͘ lín bōe-ōe tit-tio̍h hok-khì.

26

In-ūi tī Góa ê peh-sìⁿ-tiong ū chhē-tio̍h pháiⁿ-lâng; in bih--teh, chhin-chhiūⁿ siat o̍ah-tauh ê lâng teh tng-tán; in tiuⁿ lô-bāng lâi lia̍h lâng.

27

In ê chhù ū khúi-chà móa-móa, sī chhin-chhiūⁿ chiáu-lâng-lāi ū chiáu móa-móa; só͘-í in chiâⁿ-chòe tōa koh hó-gia̍h.

28

In pûi koh kng-siⁿ, chòe pháiⁿ kè-thâu; bô ūi-tio̍h lâng sin-oan, chiū-sī bô ūi-tio̍h bô-pē ê kiáⁿ sin-oan, hō͘ i heng-thong; ia̍h bô in-ūi sòng-hiong lâng phòaⁿ-tòan.

29

Iâ-hô-hoa kóng, Góa kiám bô in-ūi chiah ê sū lâi pān in mah? Góa ê sim kiám bô beh tùi chit-hō ê kok-bîn lâi pò-siû mah?

30

Chit ê thó͘-tōe ū kî-īⁿ khó-ò͘ⁿ ê sū;

31

sian-ti thôan hu-ké, chè-si óa-khò in lâi pà-kôan; Góa ê peh-sìⁿ ia̍h ài i án-ni; kàu kiat-kio̍k, lín beh cháiⁿ-iūⁿ chòe?