Iâ-lī-bí 第 7 章 - 巴克禮全羅

1

Ū ōe tùi Iâ-hô-hoa kàu Iâ-lī-bí, kóng,

2

Lí tio̍h khiā tī Iâ-hô-hoa ê chhù ê mn̂g, tī-hia soan-thôan chit ê ōe, kóng, Hōan-nā sio̍k Iû-tāi jı̍p chiah ê mn̂g, kèng-pài Iâ-hô-hoa--ê, tio̍h thiaⁿ Iâ-hô-hoa ê ōe.

3

Bān-kun ê Iâ-hô-hoa, Í-sek-lia̍t ê Siōng-tè, án-ni kóng, Lín tio̍h kóe-chiàⁿ só͘-kiâⁿ só͘-chòe, Góa chiū hō͘ lín khiā-khí tī chit ê tōe-hng.

4

Lín m̄-thang óa-khò pe̍h-chha̍t ê ōe, kóng, Chiah-ê sī Iâ-hô-hoa ê tiān, sī Iâ-hô-hoa ê tiān, sī Iâ-hô-hoa ê tiān.

5

Lín nā it-chīn kóe-chiàⁿ só͘-kiâⁿ só͘-chòe; tī lâng kap chhù-piⁿ ê tiong-kan, chin-chiàⁿ ū kiâⁿ kong-pêng;

6

bô pháiⁿ khóan-thāi chhut-gōa lâng, í-kı̍p ko͘-jî kóaⁿ-hū; tī chit ê tōe-hng bô lâu bô-chōe ê lâng ê huih, ia̍h bô thàn pa̍t-hō ê siōng-tè lâi hām-hāi ka-kī;

7

Góa chiū hō͘ lín khiā-khí tī chit ê só͘-chāi, chiū-sī Góa só͘ siúⁿ-sù lín ê lia̍t-chó͘ ê tōe, tùi éng-óan kàu éng-óan.

8

Khòaⁿ ah, lín óa-khò pe̍h-chha̍t bô lī-ek ê ōe.

9

Lín thau-the̍h, thâi-lâng, kan-îm, lām-sám chiù-chōa, ǹg Pa-le̍k sio-hiuⁿ, ia̍h thàn lín pêng-sò͘ só͘ m̄-bat pa̍t-hō ê siōng-tè,

10

koh lâi khiā tī Góa ê bīn-chêng, tī chit-keng ēng Góa ê miâ lâi chheng-ho͘ ê chhù, kóng, Góan tit-tio̍h kiù lah; án-ni, sī beh hō͘ lín khì kiâⁿ chiah ê khó-ò͘ⁿ ê sū mah?

11

Chit-keng ēng Góa ê miâ lâi chheng-ho͘ ê chhù, lín khòaⁿ-chòe chha̍t-siū mah? Iâ-hô-hoa kóng, Khòaⁿ ah, Góa, Góa í-keng khòaⁿ-kìⁿ lah.

12

Lín taⁿ tio̍h khì Góa tī Sī-lô ê só͘-chāi, chiū-sī Góa khí-thâu siat-chòe kiû-kiò Góa ê miâ ê ūi, khòaⁿ Góa in-ūi Góa ê peh-sìⁿ Í-sek-lia̍t ê chōe-ok, cháiⁿ-iūⁿ khóan-thāi hit só͘-chāi.

13

Iâ-hô-hoa kóng, Taⁿ in-ūi lín kiâⁿ chiah ê it-chhè ê sū, Góa ū tùi lín kóng, ia̍h sī chá-chá khí--lâi kóng, nā-sī lín m̄ thiaⁿ; Góa koh kiò lín, nā-sī lín m̄ ìn;

14

só͘-í Góa beh khóan-thāi lín só͘ óa-khò chit-keng ēng Góa ê miâ chheng-ho͘ ê chhù, í-kı̍p Góa só͘ siúⁿ-sù lín kap lín ê lia̍t-chó͘ ê tōe, chhin-chhiūⁿ Góa chá khóan-thāi Sī-lô chı̍t-iūⁿ.

15

Góa iā beh kóaⁿ lín lī-khui Góa ê bīn-chêng, chhin-chhiūⁿ Góa bat kóaⁿ lín ê chèng hiaⁿ-tī, Í-hoat-liân it-chhè ê hō͘-è.

16

Só͘-í lí bo̍h-tit ūi-tio̍h chit ê peh-sìⁿ kî-tó, bo̍h-tit ūi-tio̍h in chhut-siaⁿ kî-kiû, ia̍h bo̍h-tit thòe in kiû Góa; in-ūi Góa bô beh thiaⁿ lí.

17

In tī Iû-tāi chiah ê siâⁿ-tiong, kap Iâ-lō͘-sat-léng ê koe-lō͘ só͘ kiâⁿ--ê, lí bô khòaⁿ-kìⁿ mah?

18

Kiáⁿ-jî khioh chhâ, lāu-pē hiâⁿ-hé, hū-jîn-lâng chhiau-mī chòe-piáⁿ, hiàn hō͘ Thian-hō͘; koh tùi pa̍t-hō ê siōng-tè kòan-tiān; beh kek Góa siū-khì.

19

Iâ-hô-hoa kóng, In kiám-sī kek Góa siū-khì? kiám m̄-sī kek in ka-kī, tì-kàu in ê bīn kiàn-siàu mah?

20

Só͘-í Chú Iâ-hô-hoa án-ni kóng, Khòaⁿ ah, Góa beh chiong Góa ê siū-khì, Góa ê thòng-hūn, piàⁿ tī chit só͘-chāi; chiū-sī piàⁿ tī lâng, kap cheng-siⁿ, í-kı̍p chhân-iá ê chhiū-ba̍k, kap thó͘-tōe ê chhut-sán; chhin-chhiūⁿ hé to̍h bōe hoa.

21

Bān-kun ê Iâ-hô-hoa Í-sek-lia̍t ê Siōng-tè án-ni kóng, Tio̍h chiong lín ê sio-chè chham-ka tī lín chiah ê chè, lâi chia̍h bah.

22

In-ūi Góa chhōa lín ê lia̍t-chó͘ chhut Ai-kı̍p ê jı̍t, lūn-kàu sio-chè kap chiah ê chè, Góa bē-bat tùi in kóng-khí lâi bēng-lēng in.

23

Góa to̍k-to̍k hoan-hù in chí chı̍t-hāng, kóng, Lín tio̍h thiaⁿ-thàn Góa ê siaⁿ, Góa chiū beh chòe lín ê Siōng-tè, lín ia̍h beh chòe Góa ê peh-sìⁿ; koh kiâⁿ Góa lóng-chóng bēng-lēng lín ê lō͘, chiū thang tit-tio̍h hok-khì.

24

Chóng-sī in m̄ thiaⁿ-thàn, ia̍h m̄ àⁿ hī-khang; kéng-jiân chiàu in ê kè-bô͘, kap kong-ngī ê pháiⁿ-sim, thè-āu bô chìn-chêng.

25

Tùi lín ê lia̍t-chó͘ chhut Ai-kı̍p ê jı̍t kàu kin-á-jı̍t, Góa chhe Góa ê chèng lô͘-po̍k sian-ti kàu lín hia; koh ta̍k-jı̍t chá-chá khí--lâi chhe in.

26

In iáu-kú m̄ thiaⁿ Góa, ia̍h m̄ àⁿ hī-khang; hóan-tńg ngī in ê ām-kún; in kiâⁿ pháiⁿ pí in ê lia̍t-chó͘ khah siong-tiōng.

27

Lí tio̍h chiong chiah-ê it-chhè ê ōe kā in kóng; chóng-sī in bô beh thiaⁿ lí; lí kiò--in, in ia̍h bô beh ìn--lí.

28

Lí tio̍h tùi in kóng, Che chiū-sī m̄ thiaⁿ-thàn Iâ-hô-hoa in ê Siōng-tè ê siaⁿ, bô siū kàu-tok ê kok-bîn; sêng-sı̍t bô-khì, tùi in ê chhùi cho̍at-tn̄g.

29

Iâ-lō͘-sat-léng ah, tio̍h thì lí ê thâu-mn̂g hiat-ka̍k; tī kng-khō-khō kôaiⁿ ê só͘-chāi chhiùⁿ ai-siong ê koa; in-ūi Iâ-hô-hoa khì-sak lī-khui I só͘ siū-khì ê sè-tāi.

30

Iâ-hô-hoa kóng, Iû-tāi ê peh-sìⁿ kiâⁿ Góa só͘ khòaⁿ-chòe pháiⁿ ê sū; chiong khó-ò͘ⁿ ê mı̍h chhāi tī ēng Góa ê miâ chheng-ho͘ ê chhù, phah lâ-sâm--i.

31

In tī Piān-him-lùn ê soaⁿ-kok, khí Tô-hui-te̍k soaⁿ-thâu ê tôaⁿ; thang tī hé-tiong sio in ê kiáⁿ, cha-bó͘-kiáⁿ; che m̄-sī Góa só͘ hoan-hù--ê, ia̍h m̄-sī Góa ê sim só͘ siūⁿ--ê.

32

Iâ-hô-hoa kóng, In-ūi jı̍t-chí beh kàu, chit ê tōe-hng bô koh chheng-chòe Tô-hui-te̍k, kap Piān-him-lùn ê soaⁿ-kok; sī beh chheng-chòe Thâi-lâng ê soaⁿ-kok; in-ūi beh tī Tô-hui-te̍k bâi-chòng sí-lâng, kàu bô chhun só͘-chāi.

33

Koh chit ê peh-sìⁿ ê sin-si, beh hō͘ khong-tiong ê pe-chiáu, kap tōe-chiūⁿ ê iá-siù, chòe chia̍h-mı̍h; bô lâng kóaⁿ--i.

34

Hit-sî, tī Iû-tāi chiah ê siâⁿ kap Iâ-lō͘-sat-léng ê koe-chhī, Góa beh hō͘ hoaⁿ-hí ê siaⁿ, khòai-lo̍k ê siaⁿ, sin-kiáⁿ-sài ê siaⁿ, sin-niû ê siaⁿ, lóng-chóng soah; in-ūi chit ê tōe lóng beh pìⁿ-chòe pha-hng.