Iok-hān 第 13 章 - 巴克禮全羅

1

Pôaⁿ-kè-choeh chêng, Iâ-so͘ chai I lī-khui chit sè-kan kui tī Pē ê sî kàu, í-keng thiàⁿ tī sè-kan sio̍k I ê lâng, kàu bé ia̍h thiàⁿ in.

2

. Chia̍h ê-hng tǹg ê sî, Mô͘-kúi í-keng chiong bōe Iâ-so͘ ê ì-sù hē tī Ka-lio̍k lâng Se-bûn ê kiáⁿ Iû-tāi ê sim;

3

. Iâ-so͘ chai Pē í-keng chiong bān mı̍h kau tī I ê chhiú, koh chai I tùi Siōng-tè chhut, ia̍h beh kui tī Siōng-tè,

4

. chiū lī-khui toh, thǹg saⁿ; the̍h kun ka-kī hâ.

5

. Tò chúi tī pôaⁿ-nı̍h, sóe ha̍k-seng ê kha, chiong só͘ hâ ê kun kā in chhit.

6

. Sóe kàu Se-bûn Pí-tek. Pí-tek kā I kóng, Chú ah, lí sóe góa ê kha mah?

7

. Iâ-so͘ ìn i kóng, Góa só͘ chòe ê, lí hiān-kim m̄ chai, āu-lâi chiū ōe hiáu-tit.

8

. Pí-tek kóng, Lí éng-óan bô thang sóe góa ê kha. Iâ-so͘ ìn i kóng, Góa bô kā lí sóe, lí chiū kap góa bô kan-sia̍p.

9

. Se-bûn Pí-tek kā I kóng, Chú ah, m̄ nā góa ê kha, liân chhiú kap thâu-khak ia̍h tio̍h.

10

. Iâ-so͘ kā i kóng, Lâng sóe-e̍k liáu, chí-ū tio̍h sóe kha, chiū chiâu-chn̂g chheng-khì; lín chiah-ê sī chheng-khì, nā-sī bô ta̍k-ê án-ni.

11

. In-ūi Iâ-so͘ chai bōe I ê lâng sī chī-chūi; só͘-í kóng, Lín bô ta̍k-ê chheng-khì.

12

. Í-keng sóe in ê kha, chhēng saⁿ koh chē, chiū kā in kóng, Góa tùi lín só͘ ū kiâⁿ ê, lín chai mah?

13

. Lín chheng-ho͘ góa Sian-siⁿ ah, Chú ah; lín ê ōe tio̍h; góa sı̍t-chāi sī.

14

. Góa chòe Chú, chòe Sian-siⁿ, siōng-chhiáⁿ kā lín sóe kha, lín ia̍h tio̍h saⁿ-kāng sóe kha.

15

. In-ūi góa í-keng ēng bô͘-iūⁿ hō͘ lín, hō͘ lín chiàu góa só͘ tùi lín kiâⁿ ê lâi kiâⁿ.

16

. Góa sı̍t-sı̍t kā lín kóng, Lô͘-po̍k bô khah tōa i ê chú-lâng; hōng chhe ê bô khah tōa chhe i ê.

17

. Lín kì-jiân chai chiah ê sū, nā khì kiâⁿ i, chiū ū hok-khì.

18

. Góa m̄ sī chí lín chèng lâng lâi kóng; góa só͘ kéng ê, góa chai in; to̍k-to̍k beh hō͘ sèng-keng èng-giām, Chia̍h góa ê piáⁿ ê lâng kia̍h-khí kha-āu-tiⁿ that góa.

19

. Taⁿ tāi-chì iáu-bē chiâⁿ, góa seng kā lín kóng; kàu tāi-chì chiâⁿ, hō͘ lín sìn góa chiū-sī I.

20

. Góa sı̍t-sı̍t kā lín kóng, Chiap-la̍p góa só͘ chhe ê, chiū-sī chiap-la̍p góa, chiap-la̍p góa, chiū-sī chiap-la̍p chhe góa ê.

21

. Iâ-so͘ kóng án-ni, sim-lāi tōa peh-pak, chiū kan-chèng kóng, Góa sı̍t-sı̍t kā lín kóng, lín tiong-kan chı̍t lâng beh bōe góa.

22

. Ha̍k-seng saⁿ-khòaⁿ, siūⁿ m̄ chhut I sī kóng sím-mı̍h lâng.

23

. Ū chı̍t ê ha̍k-seng, chiū-sī Iâ-so͘ só͘ thiàⁿ ê, the kūn Iâ-so͘ ê heng-chêng.

24

. Se-bûn Pí-tek tìm thâu kā i kóng, Chhiáⁿ kā góan kóng, I só͘ kóng ê sī sím-mı̍h lâng.

25

. I chiū hiàⁿ sin óa Iâ-so͘ ê heng-khám, kā I kóng, Chú ah, sī chī-chūi?

26

. Iâ-so͘ chiū ìn kóng, Góa ùn chı̍t tè-á mı̍h hō͘ i, hit ê lâng chiū-sī. Sûi-sî ùn chı̍t tè-á, the̍h hō͘ Ka-lio̍k lâng Se-bûn ê kiáⁿ Iû-tāi.

27

. I siū mı̍h liáu-āu, Sat-tàn chiū jı̍p i ê sim. Iâ-so͘ chiū kā i kóng, Lí só͘ chòe ê, kín-kín khì chòe.

28

. Tâng toh ê lâng, bô lâng chai ūi-tio̍h cháiⁿ-iūⁿ tùi i kóng chit-ê.

29

. In-ūi Iû-tāi kóan chîⁿ-tē, ū lâng phah-sǹg, káⁿ sī Iâ-so͘ kā i kóng, Lí khì bóe lán siú choeh só͘ khiàm-ēng ê; á-sī kah i khì chín-chè sòng-hiong lâng.

30

. Iû-tāi chih-tio̍h hit ê mı̍h, liâm-piⁿ chhut-khì; hit sî mî-sî.

31

. Í-keng chhut-khì, Iâ-so͘ kóng, Taⁿ Jîn-chú tit-tio̍h êng-kng, Siōng-tè ia̍h tī I tit-tio̍h êng-kng;

32

. koh Siōng-tè beh tī pún-sin êng-kng Jîn-chú, ia̍h beh liâm-piⁿ êng-kng I.

33

. Sòe-kiáⁿ ah, góa iáu ū tiap-á-kú kap lín tī-teh. Lín beh chhē góa; góa só͘ khì ê só͘-chāi, lín bōe-ōe kàu; góa bat kā Iû-thài lâng kóng, taⁿ ia̍h án-ni kā lín kóng.

34

. Góa ēng sin ê kài-bēng hō͘ lín, chiū-sī lín tio̍h saⁿ-thiàⁿ; chhin-chhiūⁿ góa bat thiàⁿ lín, lín ia̍h tio̍h án-ni saⁿ-thiàⁿ.

35

. Lín nā saⁿ-thiàⁿ, chèng lâng beh tùi án-ni chai lín sī góa ê ha̍k-seng.

36

. Se-bûn Pí-tek kā I kóng, Chú ah, beh tá-lo̍h khì? Iâ-so͘ ìn i kóng, Góa só͘ khì ê só͘-chāi, lí hiān-sî bōe tè góa; āu-lâi beh tè góa.

37

. Pí-tek kā I kóng, Chú ah, góa hiān-sî cháiⁿ-iūⁿ bōe tè lí ah? Góa beh ūi-tio̍h lí pàng-sak sìⁿ-miā.

38

. Iâ-so͘ ìn kóng, Lí beh ūi-tio̍h góa pàng-sak lí ê sìⁿ-miā mah? Góa sı̍t-sı̍t kā lí kóng, Koe iáu-bē thî, lí beh saⁿ pái m̄ jīn góa.