Iok-hān 第 17 章 - 巴克禮全羅

1

Iâ-so͘ kóng chiah-ê, chiū kia̍h ba̍k ǹg thiⁿ, kóng, Pē ah, sî kàu lah; gōan lí êng-kng lí ê Kiáⁿ, thang hō͘ Kiáⁿ êng-kng lí;

2

. chhin-chhiūⁿ lí bat hō͘ Kiáⁿ ū kôan tī-lí kìⁿ ū jio̍k-thé ê, beh hō͘ I chiong éng-o̍ah siúⁿ-sù kìⁿ-nā lí só͘ hō͘ I ê lâng.

3

. Chit ê éng-o̍ah, chiū-sī bat lí to̍k-it chin ê Siōng-tè, kap lí só͘ chhe ê Iâ-so͘ Ki-tok.

4

. Góa í-keng êng-kng lí tī tōe-chiūⁿ; chiū-sī lí só͘ kau-tāi góa kiâⁿ ê kang, góa í-keng chiâⁿ i.

5

. Pē ah, taⁿ tio̍h hō͘ góa kap lí saⁿ-kap ū êng-kng, chiū-sī bē ū sè-kan í-chêng góa kap lí saⁿ-kap ū ê êng-kng.

6

. Lí só͘ siúⁿ-sù góa chhut tī sè-kan ê lâng, góa í-keng ēng lí ê miâ tùi in hián-bêng; in pún sī lí ê, lí ēng in siúⁿ-sù góa; in ia̍h í-keng siú lí ê tō-lí.

7

. Taⁿ in chai kìⁿ-nā lí só͘ hō͘ góa ê, lóng sī tùi lí lâi;

8

. in-ūi lí só͘ hō͘ góa ê ōe, góa í-keng hō͘ in; in sêng-siū i, ia̍h khak-sı̍t chai góa tùi lí chhut, koh sìn lí chhe góa.

9

. Góa ūi-tio̍h in kiû; m̄ sī ūi-tio̍h sè-kan kiû, chiū-sī ūi-tio̍h lí só͘ hō͘ góa ê lâng; in-ūi in sī lí ê.

10

. Kìⁿ-nā góa ê, chiū-sī lí ê; lí ê, chiū-sī góa ê; koh góa tī in ū tit-tio̍h êng-kng.

11

. Taⁿ liáu-āu góa bô tī sè-kan; in tī sè-kan, góa kui tī lí. Sèng ê Pē ah, gōan lí tī lí ê miâ, chiū-sī lí só͘ hō͘ góa ê, lâi pó-siú in, hō͘ in chòe chı̍t-ê, chhin-chhiūⁿ lán chı̍t iūⁿ.

12

. Góa kap in tī-teh ê sî, bat tī lí ê miâ, chiū-sī lí só͘ hō͘ góa ê, lâi pó-siú in; góa ia̍h ū chiàu-kò͘ in, kî-tiong bô chı̍t-ê tîm-lûn; chí ū hit ê tîm-lûn ê lâng nā-tiāⁿ, hō͘ sèng-keng tit-tio̍h èng-giām.

13

. Taⁿ góa chiū-kūn lí; góa iáu tiàm sè-kan kóng chiah ê ōe, beh hō͘ in ū góa ê hoaⁿ-hí móa-móa tī in ê sim-lāi.

14

. Góa í-keng chiong lí ê tō-lí hō͘ in; sè-kan òan-hūn in, in-ūi in bô sio̍k sè-kan, chhin-chhiūⁿ góa bô sio̍k sè-kan.

15

. Góa m̄ sī kiû lí hō͘ in chhut sè-kan, chiū-sī pó-siú in thoat-lī pháiⁿ-ê.

16

. In bô sio̍k sè-kan, chhin-chhiūⁿ góa bô sio̍k sè-kan.

17

. Gōan lí ēng chin-lí hō͘ in chiâⁿ-sèng; lí ê tō-lí chiū-sī chin-lí.

18

. Chhin-chhiūⁿ lí chhe góa jı̍p sè-kan, góa ia̍h ū chhe in jı̍p sè-kan.

19

. Góa ūi-tio̍h in lâi chòe sèng, hō͘ in ia̍h tùi chin-lí lâi chiâⁿ-sèng.

20

. Góa m̄ nā ūi-tio̍h chiah ê lâng kiû, ia̍h ūi-tio̍h tùi in ê ōe lâi sìn góa ê lâng kiû;

21

. hō͘ in lóng chòe chı̍t-ê; chhin-chhiūⁿ Pē, lí tiàm-tī góa, góa tiàm-tī lí, hō͘ in ia̍h án-ni tiàm-tī lán; chiū hō͘ sè-kan sìn lí chhe góa.

22

. Lí só͘ hō͘ góa ê êng-kng, góa í-keng hō͘ in; hō͘ in chòe chı̍t-ê, chhin-chhiūⁿ lán ê chòe chı̍t-ê;

23

. góa tiàm-tī in, lí tiàm-tī góa, hō͘ in ōe ôan-chôan lâi chòe chı̍t-ê; hō͘ sè-kan chai lí chhe góa, ia̍h chai lí thiàⁿ in chhin-chhiūⁿ thiàⁿ góa chı̍t iūⁿ.

24

. Pē ah, lí só͘ hō͘ góa ê, góa ài in tī góa só͘ tī-teh ê só͘-chāi, ia̍h kap góa saⁿ-kap tī hia; hō͘ in khòaⁿ-kìⁿ lí só͘ siúⁿ-sù góa ê êng-kng; in-ūi chhòng-chō sè-kan í-chêng lí í-keng thiàⁿ góa.

25

. Gī ê Pē ah, sè-kan bē bat lí; to̍k-to̍k góa ū bat lí; chiah ê lâng ia̍h bat lí ū chhe góa;

26

. góa bat ēng lí ê miâ chí-sī in, koh beh chí-sī in; hō͘ lí thiàⁿ góa ê thiàⁿ-thàng tiàm-tī in, góa ia̍h tiàm-tī in.