Iok-hān 第 19 章 - 巴克禮全羅

1

Tùi án-ni, Pí-lia̍p-to ēng piⁿ phah Iâ-so͘.

2

. Peng-teng ēng chhì-á piⁿ chòe bián-liû, tì tī I ê thâu-khak, koh ēng chí-sek ê phàu kā I chhēng;

3

. chiū-kūn I, kóng, Iû-thài lâng ê ông, Pêng-an ah. Chiū siàn I.

4

. Pí-lia̍p-to koh chhut-khì gōa-bīn kā in kóng, Lí khòaⁿ, góa chhōa I chhut-lâi hō͘ lín, hō͘ lín chai góa chhâ-liáu khòaⁿ I bô chōe.

5

. Iâ-so͘ tì chhì-á ê bián-liû, chhēng chí-sek ê phàu, chhut-lâi gōa-bīn; Pí-lia̍t-to koh kā in kóng, Lí khòaⁿ, chit ê lâng!

6

. Chiah ê chè-si-thâu kap chhe-ia̍h khòaⁿ-kìⁿ I, chiū tōa siaⁿ âu-kiò kóng, Tèng I sı̍p-jī-kè, tèng I sı̍p-jī-kè. Pí-lia̍p-to kā in kóng, Lín ka-kī lia̍h-khì tèng; in-ūi góa khòaⁿ I bô chōe.

7

. Iû-thài lâng ìn i kóng, Góan ū lu̍t-hoat, iā chiàu chit ê lu̍t-hoat I eng-kai sí, in-ūi I lia̍h pún-sin chòe Siōng-tè ê Kiáⁿ.

8

. Pí-lia̍p-to thiaⁿ-kìⁿ chit ê ōe, chiū it-hoat kiaⁿ;

9

. koh jı̍p kong-tn̂g, kā Iâ-so͘ kóng, Lí tùi tá-lo̍h lâi? Nā-sī Iâ-so͘ bô ìn i.

10

. Pí-lia̍p-to chiū kā I kóng, Lí m̄ kap góa kóng mah? Kiám m̄ chai góa ū kôan thang pàng lí, ia̍h ū kôan thang tèng lí tī sı̍p-jī-kè mah?

11

. Iâ-so͘ ìn i kóng, Nā m̄ sī tùi téng-bīn hō͘ lí, chiū lí bô kôan thang pān góa; só͘-í chiong góa kau hō͘ lí ê lâng, i ê chōe koh khah tāng.

12

. Tùi án-ni Pí-lia̍p-to ài beh pàng I; Iû-thài lâng tōa siaⁿ âu-kiò, kóng, Lí nā pàng chit ê lâng, chiū m̄ sī Kai-sat ê pêng-iú; in-ūi hōan-nā lia̍h ka-kī chòe ông ê, sī pōe-pōan Kai-sat.

13

. Pí-lia̍p-to thiaⁿ-kìⁿ chiah ê ōe, chiū chhōa Iâ-so͘ chhut-lâi; iā ka-kī chē tī kong-chō, tī chı̍t-ê miâ kiò Pho͘-chio̍h ê só͘-chāi, Hi-pek-lâi ê ōe kiò chòe Lek-pa-tāi.

14

. Hit jı̍t chiū-sī pī-pān pôaⁿ-kè-choeh ê jı̍t; iok-lio̍k jı̍t tiong-tàu. Chiū kā Iû-thài lâng kóng, Lí khòaⁿ, lín ê ông!

15

. In tōa siaⁿ âu-kiò, kóng, Tû-khì, tû-khì, tèng I tī sı̍p-jī-kè. Pí-lia̍p-to kā in kóng, Góa chiong lín ê ông tèng sı̍p-jī-kè mah? Chiah ê chè-si-thâu ìn kóng, Kai-sat í-gōa, góan bô ông.

16

. Tùi án-ni, chiū chiong Iâ-so͘ kau hō͘ in khì tèng sı̍p-jī-kè.

17

. In chiū siu I; Iâ-so͘ ka-kī giâ i ê sı̍p-jī-kè chhut-khì, kàu chı̍t-ê miâ kiò Thâu-khak-óaⁿ ê só͘-chāi, Hi-pek-lâi ê ōe kiò chòe Kok-kok-thaⁿ;

18

. tī hia tèng I sı̍p-jī-kè, koh ū nn̄g lâng kap I tâng tèng, chı̍t pêng chı̍t-ê, Iâ-so͘ tī tiong-ng.

19

. Pí-lia̍p-to ia̍h siá chám-tiâu, hē tī sı̍p-jī-kè, siá kóng, Iû-thài lâng ê ông, Ná-sat-le̍k lâng Iâ-so͘.

20

. Iû-thài lâng chōe-chōe tha̍k chit ê chám-tiâu; in-ūi Iâ-so͘ siū tèng ê só͘-chāi kūn siâⁿ; koh só͘ siá ê, sī ēng Hi-pek-lâi, Lô-má, Hi-lī-nî ê bûn-jī.

21

. Só͘-í Iû-thài lâng chiah ê chè-si-thâu kā Pí-lia̍p-to kóng, Bo̍h-tit siá, Iû-thài lâng ê ông; tio̍h siá, I ka-kī kóng, Góa sī Iû-thài lâng ê ông.

22

. Pí-lia̍p-to ìn kóng, góa só͘ siá ê, í-keng siá-liáu lah.

23

. Peng-teng í-keng tèng Iâ-so͘ tī sı̍p-jī-kè, chiū the̍h I ê saⁿ, pun chòe sì hūn, ta̍k ê peng tit-tio̍h chı̍t hūn; koh the̍h I ê lāi-saⁿ; chit niá lāi-saⁿ bô kap-chōa, sī téng-ē thàu-chit ê.

24

. Só͘-í saⁿ-kap kóng, Bo̍h-tit thiah-lı̍h, tio̍h lâi liam-khau, khòaⁿ chī-chūi tit-tio̍h; che sī beh èng-giām sèng-keng só͘ kóng, In saⁿ-kap pun góa ê saⁿ, Liam-khau góa ê i-ho̍k.

25

. Peng-teng kó-jiân chòe chiah ê sū. Khiā tī Iâ-so͘ sı̍p-jī-kè piⁿ, ū I ê lāu-bú, kap I ê lāu-bú ê chí-bē, Kek-liû-pa ê bó͘ Má-lī-a, kap Bo̍at-tāi-lia̍p ê Má-lī-a.

26

. Iâ-so͘ khòaⁿ-kìⁿ lāu-bú kap só͘ thiàⁿ ê ha̍k-seng khiā tī piⁿ-thâu, chiū tùi lāu-bú kóng, Lāu-bú ah, khòaⁿ, lí ê kiáⁿ!

27

. Koh tùi ha̍k-seng kóng, Khòaⁿ, lí ê lāu-bú! Tùi hit sî, hit ê ha̍k-seng chih-chiap i kàu ka-kī ê ke.

28

. Chit ê tāi-chì í-āu, Iâ-so͘ chai chèng hāng sū í-keng bêng-pe̍k, in-ūi beh hō͘ sèng-keng ê ōe èng-giām, chiū kóng, Góa chhùi-ta.

29

. Tī hia ū chı̍t ê khì-kū tóe chhò͘ móa-móa; in chiū the̍h hái-jiông chìm chhò͘, hâ gû-chhek-chháu, thuh kàu I ê chhùi.

30

. Iâ-so͘ í-keng siū chhò͘; chiū kóng, Sū bêng-pe̍k lah; chiū àⁿ thâu khùi tn̄g.

31

. Hit sî sī pī-pān choeh ê jı̍t, Iû-thài lâng ài bián-tit tī an-hioh-jı̍t lâu sin-si tī sı̍p-jī-kè, in-ūi chit ê an-hioh-jı̍t sī tōa ê jı̍t; só͘-í kiû Pí-lia̍p-to kah lâng kòng-chı̍h in ê kha-kut, lâi siu in.

32

. Peng-teng kàu, kòng-chı̍h thâu chı̍t ê ê kha-kut, í-kı̍p hit ê kap i tâng tèng ê ê kha-kut;

33

. kàu tī Iâ-so͘, khòaⁿ-kìⁿ I í-keng sí chiū bô kòng-chı̍h I ê kha-kut;

34

. to̍k-to̍k ū chı̍t ê peng, ēng chhiuⁿ chha̍k I ê hia̍p-ē, huih kap chúi liâm-piⁿ lâu-chhut.

35

. Khòaⁿ-kìⁿ ê lâng chòe kan-chèng, i ê kan-chèng sī chin; ka-kī chai só͘ kóng sī sı̍t, hō͘ lín ia̍h ōe sìn.

36

. In-ūi chiah ê tāi-chì chiâⁿ, sī beh èng-giām sèng-keng só͘ kóng, I ê kut bô chı̍t ki beh siū phah-chhùi.

37

. Koh sèng-keng ū chı̍t kù kóng, Lâng beh khòaⁿ in só͘ chha̍k ê.

38

. Chiah ê tāi-chì í-āu, ū A-lī-má-thài ê Iok-sek, sī Iâ-so͘ ê ha̍k-seng, to̍k-to̍k kiaⁿ Iû-thài lâng, chiah àm-chīⁿ chòe ha̍k-seng, i lâi kiû Pí-lia̍p-to, chún i khì siu Iâ-so͘ ê sin-si; Pí-lia̍p-to ún-chún. Chiū lâi, siu I ê sin-si khì.

39

. Koh ū Nî-ko-tí-bó͘, khí-thâu bat mî-sî chiū-kūn Iâ-so͘ ê, ia̍h lâi, tòa bu̍t-io̍h chhiau tîm-hiuⁿ, iok-lio̍k chı̍t pah kun.

40

. In chiū siu Iâ-so͘ ê sin-si, ēng iù-tōe pò͘ kap hiuⁿ-liāu pau I, chiàu Iû-thài lâng bâi-chòng ê lē.

41

. Tèng sı̍p-jī-kè ê só͘-chāi ū hn̂g; hn̂g-lāi ū sin ê bōng, lóng bē bat ū lâng chòng ê.

42

. Hit jı̍t sī Iû-thài lâng pī-pān choeh ê jı̍t, koh in-ūi hit ê bōng kūn, só͘-í an-tì Iâ-so͘ tī hia.