Iok-ná 第 2 章 - 巴克禮全羅

1

Iok-ná tī hî ê pak-tó͘-lāi kî-tó i ê Siōng-tè Iâ-hô-hoa, kóng:

2

Góa tú-tio̍h hōan-lān kiû-kiò Iâ-hô-hoa; I chiū thiaⁿ góa; Góa tùi im-hú ê pak-lāi âu-kiò; Lí chiū thiaⁿ góa ê siaⁿ.

3

In-ūi Lí bat hiat góa lo̍h chhim-ian, chiū-sī tī hái-tóe; Tōa-chúi ûi góa; Kông-pho tōa-éng lóng khàm-ba̍t góa.

4

Góa chiū kóng, Góa siū kóaⁿ-tio̍k, lī-khui Lí ê ba̍k-chêng; Chóng-sī góa iáu teh ǹg Lí ê sèng-tiān.

5

Chiah ê chúi ûi góa hiám-hiám bô sìⁿ-miā; Chhim-ian ûi-khùn góa; Hái-chháu pau góa ê thâu-khak.

6

Góa lo̍h kàu soaⁿ-tóe: Tōe ê mn̂g-kông éng-éng kā góa koaiⁿ-teh; Iâ-hô-hoa, góa ê Siōng-tè ah, chóng-sī Lí ū kiù góa ê sìⁿ-miā thoat-lī sí-bô.

7

Góa ê sim-sîn hūn--khì ê sî, góa chiū siàu-liām Iâ-hô-hoa; Góa ê kî-tó kàu Lí ê bīn-chêng, jı̍p Lí ê sèng-tiān.

8

Kìⁿ-nā tùi-tiōng hu-ké ê lâng, Khì-sak in chû-ài ê Chú.

9

Chóng-sī góa beh ēng kám-un ê siaⁿ hiàn-chè hō͘ Lí, Siā góa só͘ hē ê gōan: Chín-kiù chhut tī Iâ-hô-hoa.

10

Iâ-hô-hoa bēng-lēng hit bé hî, i chiū thò͘-chhut Iok-ná tī ta-tōe.