Iok-ná 第 4 章 - 巴克禮全羅

1

Chóng-sī chit ê sū Iok-ná chin bô hoaⁿ-hí, tōa-tōa siū-khì;

2

chiū kî-tó Iâ-hô-hoa kóng, Iâ-hô-hoa ah, taⁿ kiû Lí, góa tī pún-kok ê sî, kiám-m̄-sī án-ni kóng? Só͘-í góa kóaⁿ-kín cháu-khì Tha-si, in-ūi góa chai Lí sī ū un-tián ê Siōng-tè, chhiong-móa lîn-bín, bô khòai siū-khì, ū hong-sēng ê chû-ài, koh thè-hóe só͘ kóng beh kàng-lo̍h ê chai-ē.

3

Iâ-hô-hoa ah, taⁿ kiû Lí chhú góa ê sìⁿ-miā; in-ūi góa sí pí o̍ah khah-hó.

4

Iâ-hô-hoa kóng, Lí án-ni siū-khì ha̍p-lí mah?

5

Tùi án-ni Iok-ná chhut-siâⁿ, chē tī siâⁿ ê tang--sì, tī-hia ūi ka-kī tah liâu-á, chē tī ìm-ńg-ē, ài-beh khòaⁿ hit ê siâⁿ tàu-tí cháiⁿ-iūⁿ.

6

Iâ-hô-hoa Siōng-tè pī-pān chı̍t-châng pi-môa, hō͘ i hoat-siⁿ khah-kôaiⁿ Iok-ná, chòe ìm-ńg jia i ê thâu-khak, hō͘ i bián kan-khó͘; Iok-ná in-ūi chit châng pi-môa, tōa-tōa hoaⁿ-hí.

7

Chóng-sī keh-jı̍t, thiⁿ-phú-kng, Siōng-tè pī-pān chı̍t bé thâng, chia̍h chit châng pi-môa, tì-kàu ko͘-tâ.

8

Jı̍t chhut ê sî, Siōng-tè pī-pān iām-jia̍t ê tang-hong, koh jı̍t pha̍k Iok-ná ê thâu-khak, hō͘ i hūn--khì; i chiū ūi ka-kī kiû sí, kóng, Góa sí pí o̍ah khah-hó.

9

Siōng-tè tùi Iok-ná kóng, Lí in-ūi chit châng pi-môa siū-khì ha̍p-lí mah? Ìn kóng, Góa siū-khì kàu-sí ia̍h ha̍p-lí.

10

Iâ-hô-hoa kóng, Chit châng pi-môa, lí bô ūi i tio̍h-bôa, lí bô hō͘ i tōa-châng, chı̍t-mî hoat-siⁿ, chı̍t-mî sí-khì, lí iáu-kú thiàⁿ-sioh;

11

hô-hòng Góa, Góa kiám-m̄-tio̍h thiàⁿ-sioh Nî-nî-bî, chit ê tōa-siâⁿ mah? Kî-tiong bōe-ōe hun-piat chó-iū chhiú--ê, m̄-nā cha̍p-jī-bān, koh ū chōe-chōe cheng-siⁿ?