Iok-su-a 第 2 章 - 巴克禮全羅

1

Lùn ê kiáⁿ Iok-su-a tùi Sı̍p-têng àm-chīⁿ chhe nn̄g-lâng chòe cheng-thàm, hoan-hù in kóng, Lín khì khòaⁿ hit ê tōe, kap Iâ-lī-ko. In chiū khì, kàu chı̍t ê chhiong-ki Lat-ha̍p ê chhù, chiū hioh tī-hia.

2

Ū lâng pò Iâ-lī-ko ông kóng, Khòaⁿ ah, kin-àm ū Í-sek-lia̍t lâng lâi chia thau-khòaⁿ chit ê tōe.

3

Iâ-lī-ko ông chhe lâng khì Lat-ha̍p hia kóng, Hiah-ê lâi lí chia, jı̍p lí ê chhù ê lâng, lí tio̍h chhōa in chhut-lâi; in-ūi in lâi, sī beh thau-khòaⁿ chit ê chôan-tōe.

4

Hū-jîn-lâng chiong hí nn̄g-lâng khǹg-ba̍t, chiū ìn kóng, Chin-chiàⁿ ū lâng lâi góa chia; chóng-sī in tùi toh-lo̍h lâi, góa m̄-chai;

5

jı̍t àm, beh koaiⁿ siâⁿ-mn̂g ê sî, hiah ê lâng chhut-khì; in khì toh-lo̍h góa m̄-chai, lín kín-kín khì jip, chiū ōe jip-tio̍h.

6

(Chóng-sī hū-jîn-lâng í-keng chhōa in chiūⁿ chhù-téng, chiong só͘ pâi tī chhù-téng ê môa-kó lâi khàm in.)

7

Hiah ê lâng chiū àn Iok-tàn hit tiâu lō͘ jip i, kàu lō͘-thâu; jip in ê lâng chı̍t-ē chhut-khì, siâⁿ-mn̂g chiū koaiⁿ.

8

Nn̄g-lâng iáu-bē khì khùn, hū-jîn-lâng chiū chiūⁿ chhù-téng kàu in hia;

9

tùi in kóng, Góa chai Iâ-hô-hoa í-keng chiong chit ê tōe siúⁿ-sù lín, koh in-ūi lín ê iân-kò͘ góan lóng kiaⁿ, chit só͘-chāi it-chhè khiā-khí ê peh-sìⁿ, tī lín ê bīn-chêng lóng sit-táⁿ.

10

In-ūi góan ū thiaⁿ-kìⁿ lín chhut Ai-kı̍p ê sî, Iâ-hô-hoa cháiⁿ-iūⁿ tī lín ê thâu-chêng hō͘ Âng-hái ê chúi ta-khì; koh lín cháiⁿ-iūⁿ khóan-thāi Iok-tàn hit pêng nn̄g ê A-mô͘-lī ông, Se-hông kap Go̍k, chiū-sī lín só͘ húi-bia̍t-ê.

11

Góan chı̍t-ē thiaⁿ-kìⁿ chiah ê sū, chiū sit-táⁿ, in-ūi lín ê iân-kò͘ ta̍k-ê sîn put-hū-thé; in-ūi Iâ-hô-hoa lín ê Siōng-tè, tī thiⁿ-téng tōe-ē chòe Siōng-tè.

12

Taⁿ góa í-keng hó khóan-thāi lín, chhiáⁿ lín kí Iâ-hô-hoa tùi góa chiù-chōa, beh hó khóan-thāi góa lāu-pē ê ke, sòa hō͘ góa chı̍t-ê sı̍t-chāi ê kì-hō;

13

beh kiù-o̍ah góa ê lāu-pē, lāu-bú, góa ê hiaⁿ-tī, chí-bē, kap it-chhè sio̍k in só͘-ū-ê, chín-kiù góan ê sìⁿ-miā bián sí.

14

Nn̄g-lâng ìn i kóng, Lí nā bô lāu-siat góan chit ê sū, góan kam-gōan ēng góan ê sìⁿ-miā thòe lín, kàu Iâ-hô-hoa chiong chit ê tōe siúⁿ-sù góan ê sî, góan beh ēng chû-ài sêng-sı̍t khóan-thāi lí.

15

Tùi án-ni i ēng soh tùi thang-á kā in tūi-lo̍h-khì; in-ūi i ê chhù khí tī siâⁿ-chhiûⁿ, i iā khiā-khí tī chhiûⁿ-téng.

16

I tùi in kóng, Lín tio̍h chiūⁿ-khì soaⁿ-nı̍h, kiaⁿ-liáu tui-jip ê lâng tú-tio̍h lín; tio̍h tī-hia bih saⁿ-jı̍t, thèng-hāu tui-jip ê lâng tò-lâi; jiân-āu chiah thang kiâⁿ lín ê lō͘.

17

Nn̄g-lâng tùi i kóng, Lí kah góan só͘ chiù-chōa ê, góan tek-khak bô ūi-tio̍h hit-ê lâi hōan-chōe;

18

góan nā kàu chit só͘-chāi ê sî, lí tio̍h chiong chit-tiâu chu-âng ê soh pa̍k tī tūi góan lo̍h-khì ê thang-á-nı̍h; iā tio̍h chū-chı̍p lí ê lāu-pē, lāu-bú, hiaⁿ-tī, kap lí ê lāu-pē chôan-ke lóng tiàm lí ê chhù-lāi;

19

kìⁿ-nā chhut lí ê ke ê mn̂g khì koe-lō͘-ê, i ê sí sī chū-chhú-ê, bô góan ê chōe; kìⁿ-nā kap lí tī chhù-lāi-ê, nā ū lâng hē-chhiú hāi i, chiū i ê sí sī góan ê chōe;

20

chóng-sī lí nā lāu-siat góan chit ê sū, chiū lí só͘ kah góan chiù-chōa-ê, kap góan bô kan-sia̍p.

21

I kóng, Thang chiàu lín ê ōe lâi kiâⁿ. Tùi án-ni i chhe in khì; in chiū khì; i ēng chu-âng ê soh pa̍k tī thang-á.

22

Nn̄g-lâng khì kàu soaⁿ-nı̍h, tiàm hia saⁿ-jı̍t, thèng-hāu tui-jip ê lâng tò-khì, tui-jip ê lâng iân-lō͘ chhē in, iā chhē-bô-tio̍h.

23

Nn̄g-lâng chiū lo̍h-soaⁿ tò-lâi, kè hô kàu Lùn ê kiáⁿ Iok-su-a hia; tùi i kóng-khí in só͘ tú-tio̍h it-chhè ê sū.

24

Koh tùi Iok-su-a kóng, Iâ-hô-hoa kó-jiân ēng hit ê chôan-tōe kau tī lán ê chhiú; hit só͘-chāi it-chhè khiā-khí ê peh-sìⁿ, tī lán ê bīn-chêng lóng sit-táⁿ.