Iok-su-a 第 20 章 - 巴克禮全羅

1

Iâ-hô-hoa hoan-hù Iok-su-a kóng,

2

Lí hoan-hù Í-sek-lia̍t lâng, kóng, Lín tio̍h chiàu Góa thok Mô͘-se só͘ kā lín kóng ê, ūi ka-kī siat-lı̍p tô-siám ê siâⁿ;

3

hō͘ hit ê bô-ì-tiong chhò-gō͘ thâi-lâng-ê, thang cháu kàu hia; hiah ê siâⁿ thang chòe lín siám-pī pò-jîn-bēng ê lâng ê só͘-chāi.

4

I beh cháu kàu chiah ê siâⁿ ê chı̍t-ê, khiā tī siâⁿ-mn̂g-kháu, chiong i ê sū-chêng kóng hō͘ hit ê siâⁿ ê tiúⁿ-ló thiaⁿ; in chiū siu i jı̍p siâⁿ, hō͘ i chı̍t só͘-chāi, hō͘ i tiàm tī in tiong-kan.

5

Pò-jîn-bēng-ê nā tui-jip i, in m̄-thang ēng thâi-lâng-ê kau tī i ê chhiú; in-ūi i chhò-gō͘ thâi-sí i ê chhù-piⁿ, pêng-sò͘ bô òan-hūn i.

6

I beh tòa tī hit ê siâⁿ, thèng-hāu khiā tī hōe-chiòng ê bīn-chêng siū sím-phòaⁿ, thèng-hāu hit-sî ê chè-si-tiúⁿ í-keng sí, thâi-lâng-ê chiah thang tò-khì kàu pún-siâⁿ, pún-ke, chiū-sī i só͘ tùi hia cháu-chhut-lâi hit ê siâⁿ.

7

In chiū tiāⁿ-tio̍h siat tī Ná-hut-tha-lī soaⁿ-tōe, tī Ka-lī-lī ê Ki-te-su, kap tī Í-hoat-liân soaⁿ-tōe ê Sī-kiàm, í-kı̍p tī Iû-tāi soaⁿ-tōe ê Ki-lia̍t-a-pa, chiū-sī Hi-pek-lûn.

8

Koh tī Iok-tàn hit-pêng, kūn Iâ-lī-ko tang-sì, siat-lı̍p sio̍k Liû-piān chi-phài, tī khòng-iá, tī pîⁿ-iûⁿ ê Pí-sek; kap sio̍k Ka-tek chi-phài Ki-lia̍t ê La̍h-bo̍at; í-kı̍p sio̍k Má-ná-se chi-phài, Pa-san ê Ko-lân.

9

Chiah-ê sī ūi-tio̍h Í-sek-lia̍t chèng-lâng, kap kià-kha tī tiong-kan só͘ siat ê siâⁿ, hō͘ chhò-gō͘ thâi-lâng-ê lóng thang cháu kàu hia, bô sí tī pò-jîn-bēng ê lâng ê chhiú, thèng-hāu i khiā tī hōe-chiòng ê bīn-chêng.