Iok-su-a 第 24 章 - 巴克禮全羅

1

Iok-su-a chū-chı̍p Í-sek-lia̍t chèng chi-phài kàu tī Sī-kiàm, tiàu Í-sek-lia̍t ê tiúⁿ-ló, kap in ê cho̍k-tiúⁿ, sím-phòaⁿ-koaⁿ, í-kı̍p koaⁿ-tiúⁿ lâi; in chiū khiā tī Siōng-tè ê bīn-chêng.

2

Iok-su-a kā chèng peh-sìⁿ kóng, Iâ-hô-hoa Í-sek-lia̍t ê Siōng-tè án-ni kóng, Chāi-chá lín ê lia̍t-chó͘, chiū-sī A-pek-la̍h-hán ê lāu-pē, Ná-ho̍k ê lāu-pē, Tha-la̍h, tiàm tī Tōa-hô hit-pêng, ho̍k-sāi pa̍t ê siōng-tè.

3

Góa chhú lín ê chó͘ A-pek-la̍h-hán tùi Tōa-hô hit-pêng chhōa i piàn-kiâⁿ Ka-lâm chôan-tōe; koh hō͘ i ê kiáⁿ-sun chōe-chōe, ēng Í-sat siúⁿ-sù i;

4

koh ēng Ngá-kok kap Í-sò siúⁿ-sù Í-sat, chiong Se-jíⁿ soaⁿ siúⁿ-sù Í-sò chòe-gia̍p; āu-lâi Ngá-kok kap i ê kiáⁿ-sun lo̍h-khì Ai-kı̍p.

5

Góa chhe Mô͘-se kap A-lûn, Góa iā kàng chai-ē tī Ai-kı̍p, chiàu Góa tī hí tiong-kan só͘ kiâⁿ ê; jiân-āu chhōa lín chhut-lâi.

6

Góa chhōa lín ê lia̍t-chó͘ chhut Ai-kı̍p, lín chiū kàu hái-kîⁿ, Ai-kı̍p lâng chhōa in ê chhia kap bé-peng tui-jip lín ê lia̍t-chó͘ kàu Âng-hái;

7

in kiû-kiò Iâ-hô-hoa, I chiū ēng o͘-àm hē tī lín kap Ai-kı̍p lâng ê tiong-kan, koh hō͘ hái lâi im-ba̍t in; Góa tī Ai-kı̍p só͘ kiâⁿ ê sū lín chhin-ba̍k khòaⁿ-kìⁿ; lín tiàm tī khòng-iá chōe-chōe jı̍t.

8

Góa chhōa lín kàu khiā-khí tī Iok-tàn hit-pêng, A-mô͘-lī lâng ê tōe; in kap lín kau-chiàn; Góa chiong in kau tī lín ê chhiú; lín chiū tit-tio̍h in ê tōe; Góa châu-bia̍t in tī lín ê bīn-chêng.

9

Hit-sî Mô͘-ap ông Se-phoat ê kiáⁿ Pa-le̍k khí-lâi kap Í-sek-lia̍t kau-chiàn; chhe lâng khì kiò Pí-jíⁿ ê kiáⁿ Pa-lân lâi chiù-chó͘ lín.

10

Góa m̄-thiaⁿ Pa-lân ê ōe; só͘-í i liân-liân kā lín chiok-hok; án-ni, Góa chiū kiù lín thoat-lī i ê chhiú.

11

Lín kè Iok-tàn, kàu Iâ-lī-ko; Iâ-lī-ko lâng, A-mô͘-lī lâng, Pí-lī-sé lâng, Ka-lâm lâng, Hek lâng, Kek-ka-sat lâng, Hi-bī lâng, Iâ-pò͘-su lâng, lóng kap lín kau-chiàn ; Góa chiong in kau tī lín ê chhiú.

12

Góa chhe tōa-chiah-phang pe tī lín ê thâu-chêng, chiong A-mô͘-lī lâng nn̄g ê ông, tùi lín ê bīn-chêng kóaⁿ-chhut-khì; m̄-sī ēng lí ê to, iā m̄-sī ēng lí ê keng.

13

Góa siúⁿ-sù lín ê thó͘-tōe, m̄-sī lín só͘ tio̍h-bôa-ê, iā siúⁿ-sù lín siâⁿ, m̄-sī lín só͘ khí-chō-ê, lín chiū tiàm tī hí tiong-kan; koh m̄-sī lín só͘ chai-chèng ê phû-tô-hn̂g kaⁿ-ná-hn̂g, lín tit-tio̍h chia̍h i ê ké-chí.

14

Taⁿ lín tio̍h kèng-ùi Iâ-hô-hoa, sêng-sim sı̍t-ì ho̍k-sāi I, chiong lín lia̍t-chó͘ tī Tōa-hô hit-pêng kap tī Ai-kı̍p só͘ ho̍k-sāi ê siōng-tè tû-khì, lâi ho̍k-sāi Iâ-hô-hoa.

15

Nā sī lín lia̍h ho̍k-sāi Iâ-hô-hoa chòe m̄-hó, kin-á-jı̍t lín tio̍h kéng lín só͘ beh ho̍k-sāi-ê; khòaⁿ sī lín lia̍t-chó͘ tī Tôa-hô hit-pêng só͘ ho̍k-sāi hiah ê siōng-tè, á-sī lín só͘ khiā-khí in ê tōe, A-mô͘-lī lâng, hiah ê siōng-tè ah. Lūn-kàu góa kap góa ê ke, góan koat-tòan beh ho̍k-sāi Iâ-hô-hoa.

16

Peh-sìⁿ ìn kóng, Góan koat-tòan bô ì-sù beh khì-sak Iâ-hô-hoa khì ho̍k-sāi pa̍t ê siōng-tè.

17

In-ūi Iâ-hô-hoa góan ê Siōng-tè bat chhōa góan kap góan ê lia̍t-chó͘ tùi Ai-kı̍p tōe chòe lô͘-châi ê ke chhut-lâi, tī góan ê ba̍k-chiu-chêng kiâⁿ hiah ê tōa ê sîn-jiah, tī góan só͘ kiâⁿ it-chhè ê lô͘, só͘ keng-kè ê ta̍k-kok, lóng ū pó-hō͘ góan.

18

Iâ-hô-hoa iā tī góan ê bīn-chêng kóaⁿ-chhut lóng-chóng ê peh-sìⁿ, kóaⁿ-chhut khiā-khí chit ê só͘-chāi ê A-mô͘-lī lâng; só͘-í góan iā beh ho̍k-sāi Iâ-hô-hoa, in-ūi I sī góan ê Siōng-tè.

19

Iok-su-a tùi peh-sìⁿ kóng, Lín bōe-ōe ho̍k-sāi Iâ-hô-hoa, in-ūi I sī sèng ê Siōng-tè, koat-tòan bô iông-ún ēng pa̍t ê Siōng-tè phit-phòe I, bô beh sià-bián lín ê kè-sit, lín ê chōe-ok.

20

Lín nā lī-khui Iâ-hô-hoa khì ho̍k-sāi gōa-pang ê Siōng-tè, Iâ-hô-hoa tī kàng hok-khì hō͘ lín liáu-āu, beh o̍at-tńg lâi kàng chai-ē hō͘ lín, bia̍t-bô lín.

21

Peh-sìⁿ ìn Iok-su-a kóng, Bô-lah; góan tiāⁿ-tio̍h beh ho̍k-sāi Iâ-hô-hoa.

22

Iok-su-a tùi peh-sìⁿ kóng, Lín kéng Iâ-hô-hoa beh ho̍k-sāi I, lín ka-kī chòe lín ê kan-chèng. In ìn kóng, Hó, góan chòe kan-chèng.

23

Iok-su-a kóng, Lín taⁿ tio̍h tû-khì lín tiong-kan só͘ ū gōa-pang ê siōng-tè, hō͘ lín choan-sim kui-ǹg Iâ-hô-hoa Í-sek-lia̍t ê Siōng-tè.

24

Peh-sìⁿ ìn Iok-su-a kóng, Góan beh ho̍k-sāi Iâ-hô-hoa góan ê Siōng-tè, thiaⁿ-thàn I ê ōe.

25

Hit-jı̍t Iok-su-a chiū kap peh-sìⁿ lı̍p-iok, tī Sī-kiàm kā in siat-lı̍p lu̍t-lē hoat-tō͘.

26

Iok-su-a chiong chiah ê ōe lóng siá tī Siōng-tè lu̍t-hoat ê chheh, koh chiong chı̍t-tè tōa chio̍h-thâu khiā tī-hia, tī siōng-chhiū kha, Iâ-hô-hoa sèng-só͘ ê piⁿ-á.

27

Iok-su-a tùi chèng peh-sìⁿ kóng, Khòaⁿ ah, chit ê chio̍h-thâu beh chòe lán ê kan-chèng; in-ūi i ū thiaⁿ-kìⁿ Iâ-hô-hoa só͘ hoan-hù lán it-chhè ê ōe, só͘-í beh tùi lín chòe kan-chèng, kiaⁿ-liáu lín pōe-ge̍k lín ê Siōng-tè.

28

Iok-su-a chiū chhe peh-sìⁿ khì; ta̍k-lâng chiū tò-khì i só͘ tit-tio̍h ê tōe.

29

Chiah ê sū í-āu, Iâ-hô-hoa ê lô͘-po̍k, Lùn ê kiáⁿ Iok-su-a, chı̍t-pah it-cha̍p hè chiū sí.

30

In chiū bâi-chòng i tī i ê gia̍p ê kài-lāi, chiū-sī tī Í-hoat-liân soaⁿ-tōe ê Têng-ná-se-la̍h, tī Ka-sı̍t soaⁿ ê pak-sì.

31

Iok-su-a tī-teh ê jı̍t, kap Iok-su-a sí liáu-āu, hiah ê chai Iâ-hô-hoa ūi Í-sek-lia̍t lâng só͘ kiâⁿ chiah ê sū ê tióng-ló iáu tī-teh ê sî, Í-sek-lia̍t lâng ho̍k-sāi Iâ-hô-hoa.

32

Í-sek-lia̍t lâng tùi Ai-kı̍p só͘ tòa lâi Iok-sek ê kut-thâu, in bâi-chòng i tī Sī-kiàm, chiū-sī Ngá-kok chá-chêng ēng chı̍t-pah gûn tùi Sī-kiàm ê lāu-pē Hap-bo̍at hiah ê kiáⁿ só͘ bóe ê tōe; chiū chòe Iok-sek kiáⁿ-sun ê gia̍p.

33

A-lûn ê kiáⁿ Í-lī-a-sat iā sí; in chiū bâi-chòng i tī i ê kiáⁿ Hui-nî-hap só͘ tit-tio̍h ê soaⁿ-lūn-á, chiū-sī tī Í-hoat-liân ê soaⁿ-tōe.35