Iok-su-a 第 6 章 - 巴克禮全羅

1

(Iâ-lī-ko ê siâⁿ-mn̂g, in-ūi Í-sek-lia̍t lâng ê iân-kò͘, chiū koaiⁿ tiâu-tiâu, bô lâng chhut, iā bô lâng jı̍p.)

2

Iâ-hô-hoa kā Iok-su-a kóng, Khòaⁿ ah, Góa ū chiong Iâ-lī-ko kap i ê ông, kap i tōa-la̍t ê ióng-sū, lóng kau tī lí ê chhiú.

3

Lín it-chhè ê chiàn-sū tio̍h ûi-se̍h chit ê siâⁿ chı̍t-pái; la̍k-jı̍t lóng tio̍h án-ni kiâⁿ;

4

chhit ê chè-si tio̍h kia̍h chhit ki iûⁿ-kak ê hō-tâng kiâⁿ tī iok-kūi ê thâu-chêng, kàu tē-chhit jı̍t lín tio̍h se̍h-siâⁿ chhit-pái, chè-si iā tio̍h pûn hō-tâng;

5

in pûn-kak ê siaⁿ thoa-tn̂g, lín thiaⁿ-kìⁿ hō-tâng ê siaⁿ, chèng peh-sìⁿ tio̍h tōa-siaⁿ hoah, siâⁿ-chhiûⁿ chiū beh tó pîⁿ-pîⁿ, ta̍k-lâng lóng tio̍h tı̍t-tı̍t chìn-chêng khì.

6

Lùn ê kiáⁿ Iok-su-a kiò chè-si lâi, kā in kóng, Lín tio̍h kng iok-kūi, chè-si chhit-lâng kia̍h chhit ki iûⁿ-kak ê hō-tâng tī Iâ-hô-hoa ê kūi-chêng.

7

Koh kā peh-sìⁿ kóng, Lín tio̍h chìn-chêng khì se̍h-siâⁿ, tòa kun-khì-ê tio̍h kiâⁿ tī Iâ-hô-hoa ê kūi-chêng.

8

Iok-su-a tùi peh-sìⁿ kóng soah, chhit ê chè-si kia̍h chhit ki iûⁿ-kak ê hō-tâng, kiâⁿ tī Iâ-hô-hoa ê bīn-chêng, pûn hō-tâng, Iâ-hô-hoa ê iok-kūi tè tī in ê āu-bīn;

9

tòa kun-khì-ê kiâⁿ tī pûn hō-tâng ê chè-si ê thâu-chêng, āu-tūi tè iok-kūi kiâⁿ; chè-si ná-kiâⁿ ná-pûn hō-tâng.

10

Iok-su-a bēng-lēng peh-sìⁿ kóng, Lín m̄-thang hoah, m̄-thang hō͘ lâng thiaⁿ-kìⁿ lín ê siaⁿ, liân chı̍t-kù iā m̄-thang chhut-chhùi, thèng-hāu góa hoan-hù lín hoah ê jı̍t, hit-sî chiah thang hoah.

11

Tùi án-ni, i hō͘ Iâ-hô-hoa ê iok-kūi ûi-siâⁿ, se̍h chı̍t-pái; in chiū tò-lâi iâⁿ-pôaⁿ, hioh tī iâⁿ-lāi.

12

Thiⁿ-kng Iok-su-a chá-chá khí-lâi, chè-si iā kng Iâ-hô-hoa ê iok-kūi.

13

Kia̍h chhit ki iûⁿ-kak ê hō-tâng ê chhit ê chè-si, tī Iâ-hô-hoa ê kūi-chêng tı̍t-tı̍t kiâⁿ, pûn hō-tâng; tòa kun-khì-ê tī in ê thâu-chêng kiâⁿ; āu-tūi tè Iâ-hô-hoa ê iok-kūi kiâⁿ, chè-si ná-kiâⁿ ná-pûn hō-tâng;

14

tē-jī jı̍t in se̍h-siâⁿ chı̍t-pái; chiū tò-lâi iâⁿ-pôaⁿ; la̍k-jı̍t lóng sī án-ni kiâⁿ.

15

Tē-chhit jı̍t phah-phú-kng ê sî, in chá-chá khí-lâi, chiàu án-ni se̍h-siâⁿ chhit-pái; chí-ū chit-jı̍t se̍h-siâⁿ chhit-pái.

16

Kàu tē-chhit pái, chè-si pûn hō-tâng ê sî, Iok-su-a kā peh-sìⁿ kóng, Tio̍h hoah ah, in-ūi Iâ-hô-hoa ēng siâⁿ kau hō͘ lín lah.

17

Chit ê siâⁿ kap kî-tiong it-chhè só͘-ū-ê, lóng tio̍h hun-piat kui hō͘ Iâ-hô-hoa; chí-ū chhiong-ki Lat-ha̍p, í-kı̍p it-chhè kap i tī chhù-lāi-ê, thang o̍ah-teh; in-ūi i ū khǹg-ba̍t lán só͘ chhe ê sù-chiá.

18

Lín tī eng-kai bia̍t ê mı̍h tio̍h ka-kī kín-sīn, kiaⁿ-liáu lín the̍h eng-kai bia̍t ê mı̍h, tì-kàu ka-kī iā chòe eng-kai bia̍t-ê; koh liân-lūi Í-sek-lia̍t chôan-iâⁿ iā chòe eng-kai bia̍t-ê, lâi hāi-tio̍h i.

19

Chí-ū kim, gûn, kap tâng thih ê khì-kū, lóng tio̍h hun-piat kui hō͘ Iâ-hô-hoa, siu-jı̍p Iâ-hô-hoa ê hú-khò͘.

20

Peh-sìⁿ chiū hoah, chè-si iā pûn hō-tâng; peh-sìⁿ thiaⁿ-kìⁿ hō-tâng ê siaⁿ, chiū tōa-siaⁿ hoah, siâⁿ-chhiûⁿ chiū tó kàu pîⁿ-pîⁿ, peh-sìⁿ chiū chìn-chêng jı̍p siâⁿ, ta̍k-lâng tı̍t-tı̍t khì; tùi án-ni chhú hit ê siâⁿ.

21

Koh chiong siâⁿ-lāi só͘-ū-ê, bô-lūn lâm-lú ló-iù, gû, iûⁿ, kap lû, lóng ēng to it-chīn bia̍t i.

22

Iok-su-a kā cheng-thàm hit ê tōe hí nn̄g lâng kóng, Lín jı̍p-khì hit ê chhiong-ki ê chhù, chiàu lín tùi i só͘ chiù-chōa-ê, chhōa hit ê hū-jîn-lâng kap it-chhè sio̍k tī i-ê lóng tùi-hia chhut-lâi.

23

Hiah ê chòe cheng-thàm ê siàu-liân lâng chiū jı̍p-khì, chhōa Lat-ha̍p kap i ê lāu-pē, lāu-bú, hiaⁿ-tī, í-kı̍p it-chhè sio̍k tī i-ê chhut-lâi, iā chhōa i ê chhin-chhek chhut-lâi, hō͘ in tòa tī Í-sek-lia̍t ê iâⁿ-gōa.

24

In chiū ēng hé sio hit ê siâⁿ kap kî-tiong it-chhè só͘-ū-ê; to̍k-to̍k kim, gûn, kap tâng thih ê khì-kū, lóng hē tī Iâ-hô-hoa chhù-lāi ê hú-khò͘.

25

Iok-su-a chiū pó-chôan chhiong-ki Lat-ha̍p, kap i lāu-pē ê ke-kòan, kap it-chhè sio̍k tī i-ê ê o̍ah-miā; in-ūi i ū khǹg-ba̍t Iok-su-a só͘ chhe thau-khòaⁿ Iâ-lī-ko ê sù-chiá; i chiū tiàm tī Í-sek-lia̍t tiong, kàu kin-á-jı̍t.

26

Tng-sî Iok-su-a tùi chèng-lâng chiù-chōa kóng, Kìⁿ-nā khí-lâi khí-chō chit ê Iâ-lī-ko siâⁿ ê, tio̍h tī Iâ-hô-hoa ê bīn-chêng siū chiù-chó͘; i hē tōe-ki ê sî, beh sí tōa-kiáⁿ, hē-mn̂g ê sî beh sí soah-bé-kiáⁿ.

27

Iâ-hô-hoa kap Iok-su-a saⁿ-kap tī-teh, i ê miâ-siaⁿ móa-móa tī hit só͘-chāi.