Iok-su-a 第 9 章 - 巴克禮全羅

1

Iok-tàn hit-pêng, he̍k-sī tī soaⁿ-tōe, he̍k-sī tī pîⁿ-iûⁿ, he̍k-sī tī tōa-hái Lī-pa-lùn saⁿ-tùi ê piⁿ-á, Hek-lâng, A-mō͘-lī lâng, Ka-lâm lâng, Pí-lī-sé lâng, Hi-bī lâng, Iâ-pò͘-su lâng, chiah ê ông chı̍t-ē thiaⁿ-kìⁿ che,

2

chiū lóng chū-chı̍p, tâng-sim ha̍p-ì, beh kap Iok-su-a kap Í-sek-lia̍t lâng kau-chiàn.

3

Chóng-sī Ki-piàn khiā-khí ê peh-sìⁿ thiaⁿ-kìⁿ Iok-su-a tùi Iâ-lī-ko kap Ai siâⁿ só͘ kiâⁿ ê sū;

4

chiū siat khúi-kè, ké-chòe sù-chiá, ēng kū ê tē, kap phòa-lı̍h koh pó͘ ê kū chiú-tē, hō͘ lû tô i;

5

kha-nı̍h chhēng kè-pó͘ ê kū-ôe, seng-khu chhēng kū-saⁿ, in só͘ pī-pān ê piáⁿ lóng sī ta koh chhàu-phú.

6

In kàu Kiat-kah iâⁿ-tiong kìⁿ Iok-su-a, tùi i kah Í-sek-lia̍t lâng kóng, Góan sī tùi chin-hn̄g ê só͘-chāi lâi ê; taⁿ kiû lí kap góan lı̍p-iok.

7

Í-sek-lia̍t lâng tùi chiah ê Hi-bī lâng kóng, Kiám-chhái lín sī khiā-khí tī góan tiong-kan ê, beh cháiⁿ-iūⁿ kap lín lı̍p-iok ah?

8

In tùi Iok-su-a kóng, Góan sī lí ê lô͘-po̍k. Iok-su-a mn̄g in kóng, Lín sī sím-mı̍h lâng, sī tùi toh-lo̍h lâi ê?

9

In tùi i kóng, Lí ê lô͘-po̍k tùi ke̍k-hn̄g ê só͘-chāi lâi, ūi-tio̍h Iâ-hô-hoa lí Siōng-tè ê miâ; in-ūi góan í-keng thiaⁿ-kìⁿ I ê miâ-siaⁿ, kap I tī Ai-kı̍p it-chhè só͘ kiâⁿ ê;

10

í-kı̍p I tī Iok-tàn hit-pêng tùi A-mô͘-lī nn̄g ê ông, chiū-sī Hi-sı̍t-pún ông Se-hông, kap tī A-su-tha-lio̍k ê Pa-san ông Go̍k, it-chhè só͘ kiâⁿ ê sū.

11

Góan ê tióng-ló kap góan hia khiā-khí ê peh-sìⁿ chiū kā góan kóng, Lín chhiú tio̍h tòa lō͘-nı̍h ēng ê chia̍h-mı̍h, khì ngiâ-chih in, tùi in kóng, Góan sī lí ê lô͘-po̍k, taⁿ kiû lí kap góan lı̍p-iok.

12

Góan chhut-lâi beh lâi lín chia ê jı̍t, tùi chhù-lāi tòa-chhut chiah ê piáⁿ chòe lō͘-tiong ê lō͘-ēng, hit-sî iáu sio-sio; khòaⁿ ah, taⁿ í-keng lóng ta koh chhàu-phú lah;

13

chiah ê chiú-lông góan tóe-chiú ê sî, iáu sī sin-ê, khòaⁿ ah, taⁿ í-keng phòa-lı̍h; góan chiah ê saⁿ kap ôe iā lóng chhēng-kū, in-ūi lō͘ chin-hn̄g.

14

Í-sek-lia̍t lâng chiū tùi in ê chia̍h-mı̍h the̍h tām-po̍h, iā bô chhéng-mn̄g Iâ-hô-hoa.

15

Iok-su-a chiū kap in káng-hô, kap in lı̍p-iok, iông-ún in o̍ah; hōe-chiòng ê siú-léng iā tùi in chiù-chōa.

16

Kap in lı̍p-iok liáu-āu, kè saⁿ-jı̍t, chiah thiaⁿ-kìⁿ in sī kūn-kūn, tiàm tī in tiong-kan.

17

Í-sek-lia̍t khí-sin, tē-saⁿ jı̍t kàu in ê siâⁿ; hiah ê siâⁿ chiū-sī Ki-piàn, Ki-hui-la̍h, Pí-lio̍k, Ki-lia̍t-iâ-lîm.

18

In-ūi hōe-chiòng ê siú-léng í-keng chí Iâ-hô-hoa Í-sek-lia̍t ê Siōng-tè tùi in chiù-chōa, só͘-í Í-sek-lia̍t lâng bô phah in; chôan hōe-chiòng chiū ai-òan hiah ê siú-léng.

19

Chèng siú-léng tùi chôan-hōe kóng, Góan í-keng chí Iâ-hô-hoa Í-sek-lia̍t ê Siōng-tè tùi in chiù-chōa, taⁿ lán m̄-thang kha̍p-tio̍h in.

20

Lán tio̍h án-ni khóan-thāi in, iông-ún in o̍ah-teh, kiaⁿ-liáu lán ūi-tio̍h só͘ tùi in chiù-chōa-ê, siū-khì kàu tī lán.

21

Siú-léng koh tùi in kóng, Tio̍h iông-ún in o̍ah; tùi án-ni in chiū kā hōe-chiòng chòe phòa-chhâ chhiūⁿ-chúi ê lâng, chiàu siú-léng só͘ kā in kóng ê ōe.

22

Iok-su-a kiò in lâi, kā in kóng, Siáⁿ-sū phiàn góan kóng, Góan lī-khui lín chin-hn̄g ah? Kî-sı̍t lín sī tiàm tī góan tiong-kan.

23

Taⁿ lín sī siū chiù-chó͘-ê, lín tiong-kan chòe lô͘-châi-ê éng bô tn̄g, kā góa Siōng-tè ê tiān chòe phòa-chhâ chhiūⁿ-chúi ê.

24

In ìn Iok-su-a kóng, In-ūi ū lâng khak-sı̍t pò lí ê lô͘-po̍k kóng, Iâ-hô-hoa lí ê Siōng-tè bat bēng-lēng I ê lô͘-po̍k Mô͘-se, chiong chit ê chôan-tōe siúⁿ-sù lín, iā tī lín ê thâu-chêng châu-bia̍t chit ê só͘-chāi it-chhè khiā-khí ê peh-sìⁿ; só͘-í góan in-ūi lín ê iân-kò͘, kiaⁿ-liáu bô-miā, chiah chòe chit ê tāi-chì.

25

Taⁿ góan tī lí ê chhiú-thâu; lí khòaⁿ-chòe hó chòe chèng-tı̍t ê, chiàu án-ni kiâⁿ lâi khóan-thāi góan.

26

Iok-su-a chiū án-ni khóan-thāi in, kiù in thoat-lī Í-sek-lia̍t lâng ê chhiú; só͘-í in chiū bô thâi in.

27

Tng hit-jı̍t Iok-su-a hō͘ in kā hōe-chiòng kap Iâ-hô-hoa ê tôaⁿ, chòe phòa-chhâ kap chhiūⁿ-chúi ê lâng, tī I só͘ beh kéng ê só͘-chāi, kàu kin-á-jı̍t.